Mamagi ɠa Ɠɔoɠɔ GALAGI ʋɛ, nà-fasai,

nii é kàlasu ga kɔɔɠɔ vai,

é kɛ̀ʋele ɓɛtɛzu kɔɔɠɔ vai ma.

2 Nà-wooɠɛɠila ƓALAGI ʋe, é mà ga siɠigi.

Toɠa ga dɔ̀ɔɠuzuʋɛ, ta ùnmɔɔ nui.

Toɠa ga nà-kɔɔɠɔ zɛpɛgi, nii gè lɔɔɠuzu poluʋɛ.

Tɔ ɠa é nà-nuɓusɛiti kolozu bɛ̀.

3 Ee, Ɠɔoɠɔ GALAGI, nui ɠa ga leeni, è ʋa li daazɔbosu?

Nuɓusɛi ɠa ga leeni, è ʋa li ɠisiɛzu ná-faa zu?

4 Nuɓusɛi ɠɛɛʋɛ eɠɛ fiilɛi,

ná-eteai ɠɛɛʋɛ eɠɛ niinigi, é leʋesu.

5 Ee, Ɠɔoɠɔ GALAGI, ɗa-ɠeeɠɔlɔgi ziɛ su, è yei ʋɛ.

Yeeɓeɠai vɔɔɠu lɛɛ gizeiti ba, duului ɠula ti ʋa.

6 Mainmainti saɠa lɛɛ, è sìli nuiti suvaza.

Ɗa-mɛɛinti pili, è ti zuvaza.

7 Yɛ geeɠɔlɔgi ungaʋɛ, è yeemaale,

ùnmɔɔ, kùla ziɛ wolaiti bu,

zii ɠiligiti ta-zobogi ya.

8 Ti-laaʋɛti ta ga zɛɛ wo daaʋɛti,

ta-ɠonaiti kpein ta ga kona nɔ.

9 Ee, GALA! Nà guye niinɛ loo è ʋɛ,

nà guyei loo è maamusɛ vai ma, kɔnigi ɠa nii galu puugɔi ga.

10 GALA ka é kpɔbai ɠɛɛzu masagiti bɛ,

é ná-botiɠɛ nui Davide ɠula boɠa zɔkpɔ ɲɔi laawu.

11 Ʋa è kìzo, è kùla zii ɠiligiti ta-zobogi ya,

ti-laaʋɛti ta ga zɛɛ wo daaʋɛti,

ta-ɠonaiti kpein ta ga kona zɔmaiti nɔ.

12 Gi-loun zunuiti, ta-loungo ziɛgi zu,

ti wuzeɠe eɠɛ siinziin ganigiti ti zuɓaai.

Gi-loun anzanuiti ti pagi wo,

eɠɛ kpɛdɛgiti ti maaʋɔnɛai, ti masa pɛlɛi wu.

13 Gá-molo ɠotaiti daave, é ʋooʋa ma

ga daamianigi ma zii pɛ.

Gá-logani goiti ti ɓalaɠaiti su, ti mɔin gola,

ti ɠɛ ga waawaagiti, ta waaʋuupuugiti.

14 Gá-nikɛiti ti ɠaawɔɔlɔ.

Gi ɠizo toosui ma ta duɔlai,

ta kidaaʋili kpeei taa zaamaʋɛ.

15 Undaanɛ nu ɠa ga nuɓusɛi naati, niiti naa ɠɛɛzu ti ʋɛ.

Undaanɛ nu ɠa ga nuɓusɛi naati, niiti Ɠɔoɠɔ GALAGI ga ta-ƓALAGI.

<- Guyeiti 143Guyeiti 145 ->