2
Ɠimalai ɠa ga ani ɓiingi dɔɔɠuai
1 Dòun zunu, ni ɗa dàawooiti sona,
ni ɗa nà-deveiti makɛna è-yiimaʋɛ,
2 ni ɗa woilona ɠimalai ma,
è è-yii ve keleɠelegi ya,
3 ungo, ni ɗa wooɠulana faaɠaaɠai ma,
ni ɗa keleɠelegi ɠaiziɛna,
4 ni ɗa gaiziɛna ga walii ɠɛʋele,
ni ɗa daana ma kpɛ, è gaiziɛ ga naavolo ɠɛʋele,[a]
5 názu ɠa è Ɠɔoɠɔ GALAGI ɠaazuluabai ɠwɛɛsu da,
ɗa zoo è GALA kwɛɛ.
6 Mazɔlɔɔ Ɠɔoɠɔ GALAGI ɠa a ɗa ɠimalai ve,
daawooi ɠa a ɗa faaɠwɛgi ta keleɠelegi ve.
7 Toɠa undaanɛɛ vai makɛsu sɔle nuiti bɛ.
Eɠɛ kɔɔɠɔ zɛpɛgi, toɠa naati makɛ, niiti ti ziɛzu telebodai zu.
8 Niiti ti ta-eteai ziɛzu ga sɔledai, toɠa ɓɔ naati ba.
Niiti ti bɛ ga wooɠɛɠila nuiti, toɠa ɓaa naati ta-ʋelei maazu.
9 Ɗa zoo è faiti zɔɠɔzuɠa, telebodai, ta sɔle fai, ta faagaamai,
è pele ʋagɔiti kpein kwɛɛ.
10 Mazɔlɔɔ ɠimalai ɠa ʋa é zei è-yiimaʋɛ,
faaɠwɛgi ɠa ɠɛ ga è yiima vaiti.
11 Kidafaawui ɠa è makɛ,
keleɠelegi ɠa ɓaa è maazu,
12 ga ti è unmɔɔ, ti è ɠula pele ɲɔiti su,
ta nu ɲɔiti ta-yaava ɓɔɛiti,
13 niiti ti ɠɛlɛzu gaama ʋelei ʋa,
ti ɗa ziɛ ga pelei suɓidiai.
14 Ti-yiimai ga faa ɲɔu ɠɛɛ vai,
ti ɠoozunɛɛzu ga ti lɔ woya vai zu.
15 Ti ziɛ ʋeleiti maaʋegai,
ta-ʋeleiti suzeiʋɛ.
16 Naazu, ɗa ɠizo wɛɛnziɛ anzanui ná-tɛgai ma,
é ga koloɠolo anzanui woo nɛɛnɛgiti ti da,[b]
17 nii kɛlɛai sinigi ʋa, é ɠɛni zea ma niinɛ yeei,
é yeema ná-vulu minazeɠegi ma, nii é boni ná-GALAGI laaseigi zu.[c]
18 Mazɔlɔɔ maalaaʋena saai ʋɔ pelei, ʋɛ ná ga seizuʋɛ,
siɛ ʋelei ɠa liizu la gɔvɛalaazu.[d]
19 Niiti kpein ti liizu pɔ bɛ, taɠila kpalaa ge la ɠalega ma ʋolu, é ʋa ʋa,
taɠila kpalaa ge la zɛnvu ʋelei ɠaa.
20 Yiimazeɠe ga nu ʋagɔiti siɛ ʋelei,
ziɛ ga telebo nuiti siɛ ʋelei.
21 Mazɔlɔɔ sɔle nuiti ta zei zooi[e] zu,
gaama nuiti ta yɛ zeini ná.
22 Kɛlɛ nu ɲɔiti tɔɔ ɠa ɠula ná,