1 Kɛ̀ɛleaiti, gaaɓelagi ɠa ga: À ɠoozunɛ wo ɠili vai zu Maliɠii ʋa. É la ɓaani nɔ̀un ma, ga gè naa wo ʋolu wo ma, nii gè sɛʋɛni, naa zoloogɛ wo ma. 2 À dama ga botiɠɛ nu ɲɔiti: gilɛi naati ti ɠiliai gola tatipɛlɛʋolu vai ʋa! 3 Mazɔlɔɔ ada ɠa de ga tatipɛlɛʋolu nu ɠiteɠitegiti, dɛi de GALA dɛbizu GALA Zɛnvui zaɓui zu, de ɓɔɠɔ wɔɔlɔzu ga Yesu Kilista ná-fai, dɛi de la ʋoluzeizu kpusɛi zu vaiti ba.

4 Anɛɛ naa ʋe, nà ɓɔɠɔi nà la zoo, gè ʋoluzei kpusɛi zu vaiti ba. Ni nui ta a ɠisiɛna ga toɠa waso ga kpusɛi zu vaiti, nɔ̀un nà, gaama ɠa ɠɛ zèa, gè leʋe naama nui ʋa. 5 Gè latini pɛlɛʋolu foloi lɔsaʋasiɛi ma, sɔlɔɔdai ma, nà ga Izilayɛle nui ɓɔɔɓɔgi, nà ga Ɓɛnzamɛn ná-bolodai zu nui, nà ga Eɓulu nui, Eɓulu nuiti ti sɔlɔɔgai. Tɔgi letemazu, gè ɠɛni ga Faliziɛn. 6 GALA fai ma yiizoolɛi letemazu, gè Egilisii wɔinzeɠeni. Tɔgi ma lelebodai letemazu, nu la ɓena zoo pèelalazu.

7 Kɛlɛ naama aniiti ti ɠɛni bɛ̀ ga kulanumai, nà naati pɛtɛsu niina ga wafuun gani, Kilista maaʋele ma. 8 Tɔun ɠite, gè anii pɛ pɛtɛga ga wafuun gani, Màliɠii Yesu Kilista ɠwɛɛ fai maaʋele ma, nii fizɔgai. Tɔun maaʋele ma, gè vaani bu ga gè ʋala ti pɛ ma, gè ti pɛ pɛtɛ ga kaʋai, nii a kɛ gè Kilista zɔlɔɔ, 9 gè ɠili tɔun ba ga pagɔ. Teleboda la mɔ zèa, nii é zɔlɔɔsu tɔgi zo fai zu, kɛni nii é zɔlɔɔsu ga kidaaleʋei maaʋele Kilista ma, telebodai nii é zɔlɔɔsu GALA zea, é feezu naati zea, niiti ti ɠidaaleʋezu. 10 Nii wɔin mà, naa ɠa ga gè Kilista ɠwɛɛ, ta zɛbɛi nii é buzeɠeni, é kula saai ya, gè nɔ̀nɔ zɔlɔɔ kpɔlɔiti su, é ti zɔlɔɔni, gè ʋokɔɠɔ ma ná-saai zu, 11 naa ɠa a kɛ, gè zoo ʋele-o-ʋele, gè wuzeɠe, gè ɠula saai ya.

12 É la ga gè zeelia ma ungi ma, ɓaa dàazeelia. Kɛlɛ nà ɠaaɓaazu gola, zèe ʋa zeeli kpizɛi ma ungi ma, gè sɔlɔɔ, tɔɔzei Yesu Kilista sɔ̀lɔɔga. 13 Kɛ̀ɛleaiti, gè la ɠisiɛzu ga gè ɓega ga ma zalai zɔlɔɔ, kɛlɛ faa ɠila ka gè kɛɛzu: Gè yeema pòluʋele vaiti ma, gè ɠaaɓa, zèezeeli kàkala ʋele gelei ma. 14 Nà nà-kpizɛi ʋa, gè ɗa li ma ungi ʋɔ pelei, naa ɠa a kɛ gè ma zalai zɔlɔɔ, nii GALA ge ade lolisu ma ga Yesu Kilista maaʋele, geeɠɔlɔgi zu.

15 Adɛiti de zuzeeliai na GALA fai zu, naama ɠisiɛi ɠɛ ade-yiimaʋɛ. Ni tanigaa ta wo zu, kisiɛ ɠili ge ti-yiimaʋɛ, GALA ka wo ɠisuɠala naa zu. 16 Tama, ʋɛ ade zeeliai ná, ade ɠaazulosu ɠɛ gila nɔ, de ɗa ziɛ ʋɔɔma.

17 Kɛ̀ɛleaiti, wo pɛ à ʋokɔɠɔ mà. Gi ɠɛa ga poogi wo ʋɛ. À ɠaazulo naati ba, niiti ti ziɛzu ga gi ziɛ ʋelei wo pɛtɛgai. 18 Ma mɔinmɔin ka ziɛzu, ti ga Kilista zaa wului zili nuiti. Gè ta-vai woni wo ma, nà bosu wo ma mɔnɔ, toɠa bɛ̀ ga gɔlɔ vaa. 19 Ti-ɠaaɓelagi ɠa ɠɛɛzu ga undaaʋiligi, mazɔlɔɔ ti-ɠogi ɠa é ga ta-ɠalagi, ta ɓɔɠɔ lɛɛzu su ga faiti ti ga ti unfe faiti, etea vaiti nɔ ɠa ti ɠigaiziɛzu ti zu. 20 Adɔun da ga taazeigiti geeɠɔlɔgi zu, da de Ɠizo Nui maaɓɔunsu gola, ga é ʋa, é zeɠe geeɠɔlɔgi zu, Maliɠii Yesu Kilista ya. 21 Maawɔin ɓusɛi é de ɠɔba, toɠa falibo, é pokɔɠɔ ná-lɛbiya ɓusɛi ma, naama zɛbɛi zu é zea, é aniiti pɛ kolozu la ná-zobogi wu.

<- Filipe 2Filipe 4 ->