Gaalu Sɛʋɛi 9

Pake fɛtii ɠula vai teʋebai zu

1 Konagi velesiɛi ma alu mɔungi ma, ti ɠula ʋoluma Ezipete yooi ʋa, Ɠɔoɠɔ GALAGI ɓɔɛni Moize ʋɔ, Sinayi gizei ma leʋebai zu. É ɠɛni ma: 2 «Kɛni Izelayɛle nuiti ti Pake fɛtii ɠula ma ɠu logai ma. 3 Wa ma vɛtii ɠula niima alugi ma volo puugɔ maazu naanisiɛi (14) ma, kpɔkɔi. Wa ma vɛtii ɠula, eɠɛʋelei nɔ deveiti ta tɔgiti feai la, é lo ba.»

4 Moize ɓɔɛni Izelayɛle nuiti pɔ ga ti Pake fɛtii ɠula. 5 Ti ma vɛtii ɠulani Sinayi teʋebai zu, alu mɔungi ma volo puugɔ maazu naanisiɛi (14) ma, kpɔkɔi, ti kɛ nɔ kpein, eɠɛʋelei Ɠɔoɠɔ GALAGI ma levei veeni la Moize ya.

Nuiti ti la ɲadeni,
é ʋa zoloo tɔgi ma

6 Nui tanigaani ti ɠɛni ná, ti la zooni ti ʋa Pake fɛtii ta ɠula, tɔɔzei ti ɓɔɠɔ ɠɔzɔni ga ti vɔɔɠu vai poomai ta ʋa. Ti liini ma volo ná nɔ Moize ʋɔ bɛ ta Aalɔn, 7 ti ɠɛ ma: «Tɔgi maaʋele ma gi ɓɔɠɔ ɠɔzɔʋɛ, tɔɔzei gi vɔɔɠuʋɛ poomai ʋa. Leeni vaa zu gi maa la nɛɛni, gi ʋa ʋa ga gá-vebɛanii, gi ʋa fe Ɠɔoɠɔ GALAGI ʋɛ ʋɔɔma, gá Izelayɛle nui zɔiti, ma ɠu logai ma?» 8 Moize ɠɛni ti ma: «À maaɓɔun ʋɛ, gè li, gè woilo Ɠɔoɠɔ GALAGI wooi ma, nii é bosu wa-vaa zu.»

9 Ɠɔoɠɔ GALAGI ɠɛni Moize ma: 10 «Ɓɔɛ Izelayɛle nuiti pɔ, è ɠɛ ti ma: Ni nui ta a ɠɛna ná wo zaama, niizu ɓaa yeeɠɛɠalaiti su ti ʋaazu, a ɓɔɠɔ ɠɔzɔna tɔgi letemazu, tɔɔzei fɔɔɠuʋɛ poomai ta ʋa, ɓaa é siɛ ma ɠoozama, toɠa zoo nɔ é Pake fɛtii ɠula Ɠɔoɠɔ GALAGI lɛbi vai ma. 11 Alugi velesiɛi ma volo puugɔ maazu naanisiɛi (14) ma, kpɔkɔi ɠa ta Pake fɛtii ɠula la, ti baala ziʋoi mi, ta ɓului nii lɛʋɛ la su, ti pɛɛ tufa wanaiti ba. 12 Ti mina tanɔpɛ zɛ sobu ʋa zeeli, ti mina ma ɠaei tanɔpɛ gale. Ta ziɛ eɠɛʋelei deveiti ti la, é lo Pakegi ʋa. 13 Kɛlɛ zɔi nɔpɛ ɲadegai tɔgi letemazu, é la siɛ ma, é Pake fɛti vai ɠɛ ga faalakobai, naa ɓe ka leʋe ná-nuɓusɛiti ba, ná-faaɠaazagi ma ɠasɔi ɠa la unma, tɔɔzei é la ná-vebɛanii veeni Ɠɔoɠɔ GALAGI ʋɛ ma ɠui ma. 14 Ni wɛɛin ta ɠa zeini wo zaama, é pɔ é Ɠɔoɠɔ GALAGI ná-Pake fɛtii ɠula, toɠa ziɛ eɠɛʋelei Pakegi ma lɔgi la ta ma leveiti. Seikɔɠɔma nu ʋɛɛ zou nu ʋa, niima lɔ gila kpe nɔ ɠa a zei ti ma.»

Tonaɓiingi nii é ɠɛni ga poogi ga
GALA ka ti zaama

(Ɛgezɔde 40:34-38)

15 Voloi seɠe ʋɛlɛ ɲadegai ɠaalɔni da, nii zeele woo ɠesui ɠɛni bu, tonaɓiingi ʋɛɛni ma. Kpɔkɔi, eyɛsu sobui, é ɠɛni seɠe ʋɛlɛ ɲadegai ma eɠɛ abuzogi. 16 É ɠɛni ɠana nɔ yeenɔpɛ su: Foloi, tonaɓiingi ɠɛni ʋɛɛzu seɠe ʋɛlɛi ma, kpidii ma ziɛgi zu, é ɠɛni ɠulazu eɠɛ abuzogi. 17 Siɛgi zu tonaɓiingi ɠɛni wuzeɠezu la, é zeɠe seɠe ʋɛlɛi maazu, názu ɠa Izelayɛle nuiti ti ɓena lii la, ʋɛ a la lona ná, ti ʋu miná. 18 Ɠɔoɠɔ GALAGI ná-devei ɠa Izelayɛle nuiti ti ɓena zeɠe la ti-ʋuuzuʋɛ, a la ná-devei veena, ti ʋu mɔnɔ. Ni nɔ tonaɓiingi ɠa dɛ ʋɛɛni seɠe ʋɛlɛ ɲadegai ma, ti la ɠɛni zeɠezu ná. 19 Anɛɛ tonaɓiingi a la lɛbi pa seɠe ʋɛlɛ ɲadegai maazu suɠooza, Izelayɛle nuiti ti ɠɛni ɠolozu Ɠɔoɠɔ GALAGI wooi ʋɛ, ti la ɠɛni liizu. 20 Tanisu tonaɓiingi ɠɛni foloi tanigaani nɔ ɠɛɛzu seɠe ʋɛlɛ ɲadegai maazuʋɛ, siɛnɔpɛ su, ti ɠɛni nɔ Ɠɔoɠɔ GALAGI ná-devei maaɓɔunsu, ti ʋa ʋu ti-ʋuuzuʋɛ, ɓaa ti ʋa wuzeɠe ti-ʋuuzuʋɛ. 21 Tanisu ɓalaa tonaɓiingi ɓena yɛ adaʋɛ ta nɔ kpɔkɔi eyɛsu geelaalao, ɓaa é kɛ nɔ ga folo ɠila, kpidi ɠila, é ɓena wuzeɠe nɔ feya, Izelayɛle nuiti ti wuzeɠe ti-ʋuuzuʋɛ. 22 Ni a la yɛna seɠe ʋɛlɛ ɲadegai ma, é kɛ ga folo felegɔ, ɓaa alu gila, ɓaa é wola lɛbi suɠooza, Izelayɛle nuiti ti la ɠɛni ti-ʋuuzuʋɛ valibosu, eyɛsu tonaɓiingi wuzeɠe. 23 Ɠɔoɠɔ GALAGI ɓena devei ve pɛ, Izelayɛle nuiti ti ʋa ʋu ti-ʋuuzuʋɛ, ɓaa ti ʋa wuzeɠe ti-ʋuuzuʋɛ. Ti ɠɛni ti-losuʋɛti kpein kɛɛzu, ti ɠolo Ɠɔoɠɔ GALAGI ná-deveiti bɛ, eɠɛʋelei é devei veeni la Moize ya.

<- Gaalu Sɛʋɛi 8 Gaalu Sɛʋɛi 10 ->