1 Izelayɛle nuiti ti zeini Sitime. Nuɓusɛiti ti tɔɔzeini ga ɓɔɠɔ lɔa koloɠologi zu, ta Moaɓe anzanu lointi. 2 Naati ti ti lolini ga ti zalaɠai ɠula ta-ɠalagiti bɛ. Nuɓusɛiti ti vaani bu, ti zalaɠa laamii wo, ti nɔkɔ naati ta-ɠalagiti bu. 3 Ti ʋɔɔpɛɛni naati ta-ɠalagi Ɓaale-Peyɔɔl lɛbi vai ʋa. Naama vai Ɠɔoɠɔ GALAGI yiiɠaawanani ti laalɔɠɔma. 4 Ɠɔoɠɔ GALAGI ɠɛni Moize ma: «Nuɓusɛiti kpein gaalɛ ba, è ta-ɠundiɠiiti sɛlɛ guluiti ba, foloi ɠa, gàazu, naa ɠa a kɛ nà-ziiɠaawanai zeɠe Izelayɛle maala.» 5 Moize ɠɛni Izelayɛle lukpɔɠaaleʋe nuiti ma: «Wo ɠilagilagi ná-nuiti paa, niiti ti ʋɔɔpɛai Ɓaale-Peyɔɔl lɛbi vai ʋa.»

6 Zunu ɠila ge ɠɛni Izelayɛle nuiti saama, é ʋaani ga Madiyan anzanu ɠila kɛɛɠɛlointi saama, Moize ta Izelayɛle ʋɛbɛi kpein gaazu, naazu naati ti ɗa wɔlɔ, GALA daaɠomi seɠe ʋɛlɛi laaʋɛ. 7 Zalaɠa ɠula nui Aalɔn ná-doun zunui Eleazaal ná-doun zunui Finease naama vai ɠaai ma, é wuzeɠeni bɛbɛi zaama, é kpɛɛin zeɠe, 8 é ʋilɛ Izelayɛle zunui ʋolu ná-seɠe ɠotai wu, é ti felegɔ pɛ sɔ ʋɔɔma, kpɛɛin zunui volokula, é anzanui zo kobuʋɛ. Naazu nimiza vai ɓeni Izelayɛle nuiti saama. 9 Nu waaʋuufelegɔ maazu naanigɔ (24 000) ɠa é zaani nimizai naa zu.

10 Ɠɔoɠɔ GALAGI ɓɔɛni Moize ʋɔ, é ɠɛ ma: 11 «Zalaɠa ɠula nui, Aalɔn ná-doun zunui Eleazaal ná-doun zunui Finease ɠa é nà-ziiɠaawanai zeɠea Izelayɛle nuiti maala, nà-ziizoolɛi ɠa é ma ti zaama, naa ɠa é kɛa, nɛ̀i gè ga GALAGI, nà pɔ ga ti nà ɠila nɔ dɛ̀bi, nà-ziiɠaawanai zu, gè la mɔ Izelayɛle nuiti ma zuwu ɠaaleʋeni. 12 Naa ɠa é ba, ɗa ɠɛ ma: ‹Gè minazeɠegi ɠɛa tɔun bɛ, nii a ɠɛ ga ziilɛigi ma ungi. 13 Toɠa ɠɛ ga tɔun nɔnɔ, ta mavofodaiti. Zalaɠa ɠula wotii ɠa ɠɛ ga tɔnɔ, yeeɠɛɠalai pɛ su, tɔɔzei é ná-ziizoolɛi ɠulaʋɛ kɛlɛma ná-GALAGI ʋɛ, é koto gba vai ɠɛɛʋɛ Izelayɛle nuiti ta-vaa zu.»

14 Izelayɛle zunui ti paani ta Madiyan anzanui ʋɔɔma, daaseigi ɠɛni ga Zimeli, Salu ná-doun zunui. É ɠɛni ga Simiyɔn ná-pɛlɛyeɠe ɠundiɠii ta. 15 Madiyan anzanui nii ti paani, daaseigi ɠɛni ga Kɔzeɓi, kɛɛɠɛ laaseigi ɠɛni ga Suul, nii é ɠɛni ga bolodama mɔinmɔin ma ɠundiɠii, kulaai bolodai gila su Madiyan yooi zu.

16 Ɠɔoɠɔ GALAGI ɓɔɛni Moize ʋɔ, é ɠɛ ma: 17 «Vala Madiyan nuiti ba, è ti-ma zuwu ɠaaleʋe. 18 Mazɔlɔɔ ti ɠɛni ga wo zili nuiti, ti laavegai ga keleɠele ɲɔi, Peyɔɔl ná-fai zu, ta Kɔzeɓi, nii é ɠɛni ga Madiyan ɠundiɠii ta ná-doun anzanui, nii é zaani, Peyɔɔl ná-nimiza voloi.»

19 Nimiza vai naa leʋega ʋoluma,

<- Gaalu Sɛʋɛi 24Gaalu Sɛʋɛi 26 ->