1 Ɠɔoɠɔ GALAGI ɓɔɛni Moize ta Aalɔn ʋɔ, é ɠɛ ti ma: 2 «Pɛtɛ, devei nii ɠa é Ɠɔoɠɔ GALAGI ná-tɔgi zu: À bo Izelayɛle nuiti ma, ti ʋa ga nikɛ zaa ɓɔigi, nii nɛɛʋuzu la ba, ɓaa maa ʋa lɛɠɛfɛ, nii é la dɛ wozawolini. 3 Wa fe zalaɠa ɠula nui Eleazaal ya. Naa ɓalaagi ɠa lii la wo-ʋuuzuʋɛ ʋoluʋɛ, ti kɔdaaleʋe gaazu. 4 Toɠa ma ɲamai ta zo, é yeeɓeɠai lɔ bu, é faza ná zeizu ɠɛ lɔfela GALA daaɠomi seɠe ʋɛlɛi letema ʋelei. 5 Naa ʋolu, ta nikɛ zaai naa ɠala gaazu: ma ɠɔlɔi, naa ʋɛɛ ma zuai ʋa, ta ma ɲamai, naa ʋɛɛ ma ɓooiti pɛ ba. 6 Naa ʋolu, zalaɠa ɠula nui ɠa sɛdele gulu ɓuɠai zeɠe, ta ɠizɔɔpe tufa ɓifɔgi, ta geze ɓɔi sɔsɔgi, é ti ʋili abuzogi zaamaʋɛ, ʋɛ nikɛ zaa ɓɔigi ɠalazu ná. 7 Naa pɛ poluma, zalaɠa ɠula nui ɠa ná-seɠeiti gba, é ɓɔɠɔ maagba, aisa é ʋa ɠale ma wo-ʋuuzuʋɛ, anɛɛ naa ʋe, kɔzɔai ɠa yɛ de tɔgi letemazu eyɛsu kpɔkɔi zeeli. 8 Zɔi ɓalaagi a nikɛ zaai ɠala, naa ɠa ná-seɠeiti gba, é ɓɔɠɔ maagba, kɔzɔai ɠa yɛ de eyɛsu kpɔkɔi zeeli. 9 Zunu ɠila nii ɲadegai tɔgi letemazu, naa ɠa nikɛ zaai ma yuʋui ɠaalɛ ba, é lii la wo-ʋuuzuʋɛ ʋolu ʋelei, é pu ada ɲadegai ta, ʋɛ a makɛ ná Izelayɛle nuɓusɛiti bɛ, ɲade ɗɛi ɓɛtɛ vai zu, koto gba vai zu. 10 Zɔi a nikɛ zaai ma yuʋui ɠaalɛ ba, naa ɓalaa ɠa ná-seɠeiti gba, kɔzɔai ɠa yɛ de eyɛsu kpɔkɔi zeeli. Izelayɛle nuiti ta seikɔɠɔma nuiti, ta tɔgi nii zo eyɛsu ɠɔ.

11 «Nu-o-nu a vɔɔɠu nu ʋooma ʋa, kɔzɔai ɠa yɛ de, tɔgi letemazu, folo lɔfela laawu. 12 Ni a ɓɔɠɔ ɲadena foloi zaʋasiɛi ta dɔfelasiɛi, ga niima ɗɛi, toɠa ɲade. Ni naa la ɠɛɛni, kɔzɔai ɠa yɛ de. 13 Nu-o-nu nii a vɔɔɠu nu ʋooma ʋa, é la ɓɔɠɔ ɲade fai ɠɛɛni, toɠa Ɠɔoɠɔ GALAGI ná-seɠe ʋɛlɛ ɲadegai ɠɔzɔzu. Naama nui ɓe ka leʋe Izelayɛle nuiti ba. Tɔɔzei ɲade ɗɛi la vazani ma, kɔzɔai ɠa yɛ de.

14 «Tɔgi ʋɛtɛ, nii maanɛai ga wo so: Ni nu a zaana seɠe ɠotai wu, niiti kpein ti lɛɛzu ná, ta niiti kpein ti ɠɛni ná, ti ɠɔzɔai ɠa yɛ de folo lɔfela laawu. 15 Aniɲakai kpein daalaogai, dakulu ge la ʋɛɛni da, naa ɠa ɠɔzɔ. 16 Ni nu a vɔɔɠuna nu ʋooma ʋa dɔɓɔi zu, nu paa, ɓaa é za ɓɔɠɔ ʋɛ, ɓaa é vɔɔɠu nu ɠaei ɓaa kabai ʋa, kɔzɔai ɠa yɛ de folo lɔfela laawu.

17 «Nii a kɛ é ɲade, ta nikɛ zaai ma yuʋui zeɠe, nii kulaai ga zalaɠai, é ɠala, koto gba vai zu, ti pu aniɲakai zu, ti ziɛungi zu ɗɛi ʋu ma. 18 Zunui nii ɲadegai tɔgi letemazu, naa ɠa ɠizɔɔpe tufa ɓifɔgi gila seɠe, é dɔ ziɛi wu, é ta vaza seɠe ɠotai wu, ʋɛ nui ta zaai ná, ta aniɲakaiti ma, ta nuiti kpein ma ti ɠɛni ná. Toɠa kɛ ɠana nɔ naama nui ʋɛ, nii fɔɔɠuai nu ɠaeiti ba, ɓaa nu ʋoomai ʋa, nii nui ta paai, ɓaa saai ɓɔɠɔ ʋɛ, ɓaa nii fɔɔɠuai kabai ʋa. 19 Nui nii ɲadegai tɔgi letemazu, naa ɠa a ziɛi vaza zɔi ma nii kɔzɔai. Toɠa naa ɠɛ foloi zaʋasiɛi ta dɔfelasiɛi ma. Folo lɔfelasiɛi, zunui kɔzɔai, naa ɠa ná-seɠeiti gba, é ɓɔɠɔ maagba. Kpɔkɔi, toɠa ɲade.

20 «Kɛlɛ ni zunui nii kɔzɔai, é la ɓɔɠɔ ɲadeni, kpe ka leʋe Izelayɛle nuiti ba, mazɔlɔɔ toɠa Ɠɔoɠɔ GALAGI zeizu ɲadegai ɠɔzɔzu. Tɔɔzei ɲade ɗɛi la vazani ma, kɔzɔai ɠa yɛ de.

21 «Izelayɛle nuiti ta niima lɔgi zo eyɛsu ɠɔ. Zɔi a ɲade ɗɛi vazana, naa ɠa ná-seɠeiti gba. Zɔi a vɔɔɠuna naama ɗɛi ʋa, naa ɠa ɠɔzɔ eyɛsu kpɔkɔi zeeli. 22 Zunui kɔzɔai, anii kpein a vɔɔɠu ba, naati ta ɠɔzɔ, nu-o-nu a vɔɔɠu nui ʋa, nii kɔzɔai, tɔ ɓɔɠɔi ɠa ɠɔzɔ eyɛsu kpɔkɔi.»

<- Gaalu Sɛʋɛi 18Gaalu Sɛʋɛi 20 ->