1 Ɠɔoɠɔ GALAGI ɓɔɛni Moize ʋɔ, é ɠɛ ma: 2 «Ɓɔɛ Eleazaal ʋɔ, zalaɠa ɠula nui Aalɔn ná-doun zunui, bo ma ga é ani maku nɛɛnɛ gala liɠiiti kula abui zu, é abulekaiti pu ya ɠoozama, mazɔlɔɔ diɠii naati ti ɲadega. 3 Nui niiti, ti zaai ta-ɠotoi maaʋele ma, à ta-ani maku nɛɛnɛ gala liɠiiti seɠe, wo ti loɠa, wo ti ɓɛtɛ ga kɔlu ɓɔi sɛpɛgiti, nii a ʋɛɛ zalaɠa ɠulazuʋɛ ma. Diɠii naati ti ɲadega, mazɔlɔɔ ti ʋaaʋɛ ga tiye pɔ̀. Ta ɠɛ ga poogi Izelayɛle nuiti bɛ.»

4 Zalaɠa ɠula nui Eleazaal ani maku nɛɛnɛ gala liɠiiti seɠeni, niiti ti ga kɔlu ɓɔigi, zunuiti niiti ti ʋaani ga tiye, abui naati galani. Ti ti loɠani, ti ti ɠɛ ga ma zɛpɛgiti, ti pɛɛ zalaɠa ɠulazuʋɛ ma. 5 Naa ɠa é ga ɠizɛsui Izelayɛle nuiti bɛ, ga nu nɔpɛ nii é la ga Aalɔn mavofodai, maa la nɛɛni, é ʋa maaɓuɠa Ɠɔoɠɔ GALAGI ʋa, é ʋa ani maku nɛɛnɛ kula ga zalaɠai gaazu, a ʋa ɠɛ eɠɛ Kɔlee ta ná-nuɓusɛiti, eɠɛʋelei Ɠɔoɠɔ GALAGI devei veeni la Moize ya ga é bo ma.

6 Poluma zobui Izelayɛle nuɓusɛiti kpein ti ɠɛni zelii losu Moize ta Aalɔn ma, ti ɠɛ ma: «Wo Ɠɔoɠɔ GALAGI ná-nuɓusɛiti paaʋɛ!» 7 Ti maaɓɔni ba Moize ta Aalɔn maaɠoolii zu. Ti ɠɛai ma latisu GALA daaɠomi seɠe ʋɛlɛi ʋɔ pelei, pɛtɛ, tonaɓiingi ʋɛɛni ma, Ɠɔoɠɔ GALAGI ná-lɛbiyai ɠulani kɛlɛma. 8 Moize ta Aalɔn ti liini, ti lo GALA daaɠomi seɠe ʋɛlɛi laaʋɛ. 9 Ɠɔoɠɔ GALAGI ɠɛni Moize ma: 10 «À ɠula bɛbɛi tɛi saama, nà ti-ma zuwu ɠaaleʋezu ɠani nɔ.» Ti laaʋɛɛni zooi ma. 11 Naa ʋolu Moize ɠɛni Aalɔn ma: «Ɗa-ani maku nɛɛnɛ gala liɠii zeɠe fala, abulekaiti seɠe zalaɠa ɠulazuʋɛ, è pu su, è ani maku nɛɛnɛgi ʋu ga. Suvilɛ, è lii la nuɓusɛiti pɔ bɛ, è koto gba vai ɠɛ, mazɔlɔɔ Ɠɔɠɔ GALAGI ná-ziiɠaawanai lokoleʋea, niizu maanɔɠɔi tɔɔzeiɗa.»

12 Aalɔn naa ɠɛɛni, nii Moize boni ma. É ani maku nɛɛnɛ gala liɠii zeɠeni, é ɓizɛ, é li nuɓusɛiti saama. Naazu maanɔɠɔi tɔɔzeini niina ga zeelia nuɓusɛiti ma. É ani maku nɛɛnɛgiti galani, é koto gba vai ɠɛ nuɓusɛiti bɛ. 13 É loni nuiti saama, niiti ti zaa ɠɛni de na, ta niiti ti ɠɛni vulua, maanɔɠɔi ɓeni. 14 Nui liegɔi é zaani naama maanɔɠɔi zu, é ɠɛni ga nu waapuugɔ maazu naanigɔ undɔfela (14 700), é ɠula niiti polu, ti undaaʋilini Kɔlee ná-fai zu. 15 Aalɔn ɠaleni ma Moize ʋɔ bɛ GALA daaɠomi seɠe ʋɛlɛi laaʋɛ, siɛgi zu maanɔɠɔi ɓeni la.

16 Ɠɔoɠɔ GALAGI ɓɔɛni Moize ʋɔ, é ɠɛ ma: 17 «Devei ve Izelayɛle nuiti zea, ga bolodama ɠundiɠii ɠilagilagi tukpɔi ɠila fe è ya. Tukpɔ puugɔ maazu felegɔ (12) ɠa bolodama ɠundiɠiiti ta fe è ya. È ti ɠilagilagi laaseigi zɛʋɛ ɛsɛ nɔnɔ ma. 18 Ɗa Aalɔn laaseigi zɛʋɛ Leevi ná-bolodai ná-tukpɔi ma, mazɔlɔɔ bolodama ɠundiɠi ɠilagilagi ná-tukpɔi ɠa ɠɛ ná. 19 Ɗa ti la GALA daaɠomi seɠe ʋɛlɛi wu, zeele woo ɠesui ɠakalaʋɛ, ʋɛ ada ɠɛ ɠomisu ná. 20 Zunui nii gè yiimazeɠezu la, naa ná-tukpɔi ɠa ʋɔnɔ ba, naa ɠa a kɛ gè Izelayɛle nuiti ta-unsuyelii ɓe, nii ti bosu gòizu yeenɔpɛ wo laalɔɠɔma.»

21 Moize naama leveiti feeni Izelayɛle nuiti zea. Bolodama ɠundiɠiiti gilagilagi tukpɔ ɠilagila feeni zea, é ɠɛ ga tukpɔ puugɔ maazu felegɔ (12). Aalɔn ná-tukpɔi ɠɛni tɔnɔiti saama. 22 Moize ti laani Ɠɔoɠɔ GALAGI ɠaazu, seɠe ʋɛlɛi wu, nii zeele woo ɠesui ɠɛni bu.

23 Poluma zobui, Moize lɛɛni seɠe ʋɛlɛi wu. É kaani ga Aalɔn ná-tukpɔi, nii é laani Leevi ná-bolodai laaseigi zu, é ʋɔnɔni ba, fulɔlɔiti gaaʋuye, gulu waai é ga amandegi, naa ma ɓɔigi ɠɛni ba. 24 Moize tukpɔi kpein seɠeni ʋolu seɠe ʋɛlɛi wu, Ɠɔoɠɔ GALAGI ɠaazu, é li, é dɛɛ ga Izelayɛle nuiti. Ti naa ɠaani nii kɛai, ɛsɛ ge ná-tukpɔ zeɠeni.

25 Ɠɔoɠɔ GALAGI ɠɛni Moize ma: «Aalɔn ná-tukpɔi la ʋolu zeele woo ɠesui ɠakalaʋɛ. Toɠa makɛsu ná eɠɛ poogi niiti bɛ, ta ɠɛ ti ɓaka, naa ɠa a kɛ è ti ɓeteʋe unsuyeli lo fai ʋa gàazu, ti ʋa za.» 26 Moize kɛɛni ɠana. É Ɠɔoɠɔ GALAGI wooi zoni, eɠɛʋelei naa deveni la.

27 Izelayɛle nuiti ti ɠɛni Moize ma: «Wɛlɛ, gi loa ya, gá zaazu ɲɛgɛlɛin! 28 Nu-o-nu a maaɓuɠa Ɠɔoɠɔ GALAGI ná-seɠe ʋɛlɛi ʋa, naa ɠa zaazu! Zekana gi pɛ gi ɠaaɓelazu la?»

<- Gaalu Sɛʋɛi 16Gaalu Sɛʋɛi 18 ->