1 Ɠɔoɠɔ GALAGI ɓɔɛni Moize ʋɔ, é ɠɛ ma: 2 «Ɓɔɛ Aalɔn ʋɔ, ta ná-doun zunuiti, ta Izelayɛle nuiti kpein, è ɠɛ ti ma: Wɛlɛ, nii ɠa Ɠɔoɠɔ GALAGI deveai:

3 «Ni Izelayɛle nui ta a nikɛi ɓaa baalagi, ɓaa bolii ɠɔdaaleʋena ga zalaɠai ti-ʋuuzuʋɛ, ɓaa ti-ʋuuzuʋɛ ʋoluʋɛ, 4 é la liini la GALA daaɠomi seɠe ʋɛlɛi laaʋɛ, é ʋa kɛ ga vebɛanii Ɠɔoɠɔ GALAGI ʋɛ ná-seɠe ʋɛlɛ ɲadegai ɠakalaʋɛ, naama nui ɠa ɠɛ ga sɔba nu, tɔɔzei é ɲamai ʋua. Kpe ka leʋe ná-nuɓusɛiti ba, é ɠula ti zaama. 5 Naa ɠa a kɛ, Izelayɛle nuiti ti mina mɔ ta-zalaɠa aniiti kula dɔɓɔiti su, kɛlɛ ti ɗa ʋa ga tiye zalaɠa ɠula nui ʋɔ, Ɠɔoɠɔ GALAGI ɠakala GALA daaɠomi seɠe ʋɛlɛi laaʋɛ, é ti ɠula ga zalaɠai Ɠɔoɠɔ GALAGI ʋɛ, ga ziilɛi zalaɠaiti. 6 Zalaɠa ɠula nui ɠa ma ɲamai vaza Ɠɔoɠɔ GALAGI ná-zalaɠa ɠulazuʋɛ ma, GALA daaɠomi seɠe ʋɛlɛi laaʋɛ, é ma wulɔi ɠala, nii makugi a nɛɛ Ɠɔoɠɔ GALAGI ʋɛ. 7 Ti la mɔ ta-zalaɠaiti kulaa zɛɛ ɠalagiti bɛ, niiti ti-ʋaaɠulabaiti ti ga boli zinɛiti, niiti ti ɠɛa ɓɔɠɔ ɠɔzɔzu ga tiye. Toɠa ɠɛ ga ɠɔoɠɔ tɔgi ti ʋɛ, ta ti-mavofodaiti kpein.

8 «Ɗa ɠɛ ti ma mɔnɔ: Ni Izelayɛle nui ta, ɓaa seikɔɠɔma nui ta, é ti zaama, a gala zalaɠai ɠulana, ɓaa zalaɠai taɠili, 9 é la liini la GALA daaɠomi seɠe ʋɛlɛi laaʋɛ, é ʋa kula ga zalaɠai Ɠɔoɠɔ GALAGI ʋɛ, naama nui ɓe ka leʋe ná-nuɓusɛiti ba.

10 «Ni Izelayɛle nui ta, ɓaa seikɔɠɔma nui ta, é ti zaama, a ɲamai ma zii tanɔpɛ miina, nà ʋoluave naama nui ʋa, nii é ɲamai miizu, nà naama nui ɓeteʋe ɓalaa ná-nuɓusɛiti ba, é ɠula ti zaama. 11 Mazɔlɔɔ ɲamai ɠa é ga kpɛtɛanii kpein zɛnvui. Gè feeʋɛ wo ya, ga wo koto gba vai ɠɛ la zalaɠa ɠulazuʋɛ, wo-yɛnvuiti faa zu, mazɔlɔɔ tɛi é ga zɛnvui ma ʋoogi, naa maaʋele ɠa ɲamai a kotoi gba la. 12 Naa ɠa é ba, gè bogɛ Izelayɛle nuiti ma ga, nu nɔpɛ ge mina ɲamai mi wo zaama, anɛɛ seikɔɠɔma nui ʋe, é mina ɲamai mi. 13 Ni Izelayɛle nui ta, ɓaa seikɔɠɔma nui ta, é ti zaama, a sua zona dɔɓɔ ziɛ su, ɓaa wɔnii, nii nu a mi, toɠa ma ɲamai ʋu zooi ma, é fufiligi ʋu gaazu. 14 Mazɔlɔɔ kpɛtɛanii kpein, ni nɔ toɠa vulua, zɛnvui ɠa ma ɲamai zu. Naa ɠa é ba, gè bogɛ Izelayɛle nuiti ma ga, wo la kpusɛi tanɔpɛ ma ɲamai mia, mazɔlɔɔ kpɛtɛanii kpein zɛnvui ɠa ná-ɲamai zu, nu nɔpɛ a ta miina, naa ɓe ka leʋe Izelayɛle nuɓusɛiti ba.

15 «Nu nɔpɛ, é ɠɛni zou loun zu, ɓaa seikɔɠɔma nuiti su, a sua miina saai ɓɔɠɔ ʋɛ, ɓaa baliʋaliai ga, toɠa ná-seɠeiti gba, é maagba. Kɔzɔai ɠa yɛ de, eyɛsu kpɔkɔi. Naa ʋolu, toɠa ɲade. 16 Ni é la ná-seɠeiti gbani, é ʋa maagba, ná-faaɠaaza golai ma ɠasɔi ɠa la unma.»

<- Leevi 16Leevi 18 ->