1 Zeluzalɛme masagi Adoni-Sedɛke mɛnini ga Zozuwe taai zoga, nii é ga Ayi, é koloɠolo mɛtu, nii é kɛɛni ga Zeliko taai ta ná-masagi, naa ɠɛɠalai ɠa é kɛɛni ga Ayi ta ná-masagi. É mɛnini ɓalaa ga Gaɓaɠɔn nuiti ti yɔɠɔzuɓɛtɛni ta Izilayɛle nuiti, ta zeini ti zaama. 2 É wola luani, mazɔlɔɔ Gaɓaɠɔn ɠɛni ga taa ɓii gola, eɠɛʋelei nɔ masa taaiti ti la, é wɔɔlɔni Ayi ʋa, naa ʋɛɛ, zunuiti kpein ti ɠɛni ga kɔɔɠɔ nu ɠɛzɛɠɛzɛgiti. 3 Naa ɠa é kɛɛni, Zeluzalɛme masagi Adoni-Sedɛke keelaiti teʋeni Eɓelɔn masagi Woɠame ma, ta Yaalemute masagi Pileyame, ta Lakise masagi Yafia, ta Egelon masagi Deɓiil, ga é wo ti ma ga: 4 «À ʋa, wo yeeve bɛ̀, ade Gaɓaɠɔn zakpe, tɔɔzei ná-nuiti ti ziilɛi minazeɠegi woga yɔɠɔzu ta Zozuwe, ta Izilayɛle nuiti.»

5 Naa ɠa é kɛɛni, Amool nuiti ta-masa dɔɔlugɔiti, ti woolaani ma, Zeluzalɛme gelei, ta Eɓelɔn gelei, ta Yaalemute gelei, ta Lakise gelei, ta Egelon gelei, ti lo ta-zalaʋusuiti untuɠɔ, ti li Gaɓaɠɔn laalɔɠɔma. Ti Gaɓaɠɔn zeini kɛlɛ su, ti laalɛ taai wu.

6 Gaɓaɠɔn nuiti ti keelaiti teʋeni Zozuwe ma ti-ʋuuzuʋɛ Gilegale, ti ɠɛ ma: «Mina ɠɛlɛ ɗa-wotiɠɛ nuiti gi ʋa. Ʋa fala, è ɓɔ gi ʋa, è gi ɠizo, mazɔlɔɔ Amool nuiti ta-masagiti ti zeini gize yooi zu, ti yeezoga, ti ʋa gi laalɔɠɔma.»

7 Zozuwe ta kɔɔɠɔ nuiti kpein ti lɛɛni, ti zeɠe Gilegale, ta ná-kɔɔɠɔ nu ɠɛzɛɠɛzɛgiti. 8 Ɠɔoɠɔ GALAGI ɠɛni Zozuwe ma: «Mina lua naama masagiti ba, mazɔlɔɔ gè zobogi vea è ʋɛ, è vɔni ti ma, ti taɠila kpalaa ge la zooga é ʋa è zakpe.»

9 Zozuwe ɲiini piin ziɛzu, é zo Gilegale. É ɠulani ti viliba, é loo ti ma. 10 Ɠɔoɠɔ GALAGI ti zuvazani Izilayɛle nuiti tuɠɔ, kɔɔi ɠoloɠoloni ti ya Gaɓaɠɔn ɠakalaʋɛ. Izilayɛle nuiti ti pilɛ sɔlɔɔni ti ma, ti ʋilɛ ti ʋolu pelei zu, é lɛɛzu gize yɔɠɔzuʋɛ Ɓɛte-Ɠolon, eyɛsu ti zeeli Azeka ta Makeda. 11 Siɛgi zu Amool nuiti ti ɠɛni ʋelazu la Izilayɛle nuiti ba, ti ɗa yei ga pelei, é gize yɔɠɔzuʋɛ Ɓɛte-Ɠolon, Ɠɔoɠɔ GALAGI sakɔtu wolai yeini ti ma, é zeɠe geezuʋɛ, é ɗa ʋu ti ma, eyɛsu é zeeli Azeka. Naa nui wola ʋaani, é leʋe Izilayɛle nuiti ta-nu ʋaai ʋa ga boɠa zɔkpɔi.

12 Naama volo ná, Zozuwe wooɠulani Ɠɔoɠɔ GALAGI ma, yeei Ɠɔoɠɔ GALAGI feeni la Izilayɛle nuiti bɛ ga ti pilɛ sɔlɔɔ Amool nuiti ma. Zozuwe wooɠulani Izilayɛle nuiti kpein gaazu, é ɠɛ ma:

16 Masa dɔɔlugɔi naati ti ʋelani, ti lɔɔɠu Makeda, pugi zu. 17 Nui tanigaani ti Zozuwe ɠobavaawoni, ti ɠɛ ma: «Masa dɔɔlugɔiti dɔɔɠuʋɛ Makeda, pugi zu.» 18 Zozuwe ɠɛni ma: «À kɔtu wolaiti kilikili, wo da pugi laaʋɛ, wo zunuiti sei ná, ti naa makɛ. 19 Wɔun wa, à mina looɠo, à ʋilɛ wo zili nuiti polu, à pele leʋe ti luɠɔ, ti mina lɛ ta-laazuʋɛti, mazɔlɔɔ Ɠɔoɠɔ GALAGI wa-ƓALAGI ti lɔa wo yeezu.»

20 Zozuwe ta Izilayɛle nuiti ti ɓeni ga yeezeeli ti ma, nágo ti ʋa ti-ma zuwu ɠaaleʋe, kɛni pela geleiti nɔ, niiti ti liini ta-laaiti su, niiti siɠigi ti ma. 21 Naa ʋolu, nuɓusɛiti kpein gaazɔlegai ʋaani ga pagɔ ti-ʋuuzuʋɛ, Zozuwe ʋɔ bɛ, Makeda. Naa ʋoluma, ma yooi kpein su, nu nɔpɛ ge la mɔ ɠɛni ɓɔɛzu Izilayɛle nuiti daalɔɠɔma.

22 Zozuwe ɠɛni ti ma: «À pugi laalao, wo masa dɔɔlugɔiti kula su, wo ʋa ga tiye pɔ̀.» 23 Zekana ti kɛɛni la, ti masa dɔɔlugɔiti kulani pugi zu, ti li ga tiye pɔ, Zeluzalɛme masagi, Eɓelɔn masagi, ta Yaalemute masagi, naa ʋɛɛ Lakise masagi ʋa, ta Egelon masagi. 24 Siɛgi zu ti masagi naati kulani la, ti ʋa ga tiye Zozuwe ʋɔ, Zozuwe Izilayɛle zunuiti kpein tolini, ta kɔɔɠɔ nu ɠundiɠiiti niiti ti ɓɔni ba kɔɔɠɔzuʋɛ, é ɠɛ ti ma: «À maaɓuɠa bà, wo ɠɔɠɔlo masagi niiti kɔda.» Ti maaɓuɠani ba, ti ɠɔɠɔlo ti-ɠɔdaʋɛti. 25 Zozuwe ɠɛni ti ma: «À mina lua, wo zasu mina ɓali. À yiilɔɔ, wo zɛbɛzeɠe, mazɔlɔɔ ʋele ɠana Ɠɔoɠɔ GALAGI wo zili nuiti sosu da, niiti wo ʋaazu ti zakpesu.»

26 Naa ʋoluma, Zozuwe ti ʋaani, é ti zɛlɛ gulu lɔɔlugɔiti ba. Ti yɛni zɛlɛni ná eyɛsu kpɔkɔi. 27 Foloi daa ziɛgi zu, Zozuwe devei veeni, ga ti ti-ma ʋoomaiti kula guluiti ba, ti ti ʋili ya pugi zu, ʋɛ masagiti ti lɔɔɠuni ná. Naa ʋoluma, ti daaɠulu ga kɔtu wolaiti. Naati ta ná zaaɠaza.

28 Zozuwe Makeda zoni naama voloi nɔ. É taaʋeaiti kpein suwuɠaaleʋeni ta ta-masagi, é la ɠɛni gila kpalaa zɛni vulua. É Makeda masagi zoni, eɠɛʋelei é Zeliko masagi zoni da.

29 Zozuwe ta Izilayɛle nuiti ti zeɠeni Makeda, ti li Liɓina, ti laalɛ bu. 30 Ɠɔoɠɔ GALAGI taai naa ta taa masagi lɔɔni Izilayɛle nuiti zeezu. Ti taaʋeaiti kpein suwuɠaaleʋeni, ti la gila kpalaa zɛni vulua. Zozuwe ma masagi zoni, eɠɛʋelei é Zeliko masagi zoni da.

31 Zozuwe ta Izilayɛle nuiti ti zeɠeni Liɓina, ti li Lakise. Ti seini kɛlɛ su, ti laalɛ bu. 32 Ɠɔoɠɔ GALAGI Lakise lɔɔni ti yeezu, ti naa zoni foloi velesiɛi. Ti taaʋeaiti kpein suwuɠaaleʋe, niiti ti ɠɛni ná, eɠɛʋelei ti kɛɛni la ga Liɓina. 33 Gezɛɛl masagi Wolame ʋaani Lakise maalobosu. Kɛlɛ Zozuwe vɔnini ma, ta ná-nuɓusɛiti, é la gila kpalaa zɛni vulua.

34 Zozuwe ta Izilayɛle nuiti ti zeɠeni Lakise, ti li Egelon. Ti seini kɛlɛ su, ti laalɛ bu. 35 Ti soni ma volo ɠilagi nɔ. Ti taaʋeaiti kpein suwuɠaaleʋeni, niiti ti ɠɛni ná. Zozuwe ná zuɠoloɠoloni ma yee nɔ, eɠɛʋelei é kɛɛni la ga Lakise.

36 Zozuwe ta Izilayɛle nuiti ti zeɠeni Egelon, ti li Eɓelɔn, ti laalɛ bu. 37 Ti taai zoni, ti masagi ta nuɓusɛiti pɛ suwuɠaaleʋe, ta taa goiti ti ɠɛni ba, naati su nuɓusɛiti, eɠɛʋelei ti kɛɛni la ga Egelon. Zozuwe taai ɠoloɠoloni mɛtu, é la ɠɛni nu ɠila kpalaa zɛni vulua.

38 Naa ʋoluma, Zozuwe ta Izilayɛle nuiti ti ɠaleni ma Deɓiil ʋele, ti laalɛ bu. 39 Ti taai zoni, ti taa masagi zo, ta taa goiti kpein ti ɠɛni ba. Ti nuɓusɛi kpein suwuɠaaleʋeni, niiti ti ɠɛni ná, ti la gila kpalaa zɛni vulua. Zozuwe Deɓiil ta ná-masagi zoni, eɠɛʋelei é Eɓelɔn zoni da, ta ná-masagi, ta Liɓina ta ná-masagi.

40 Zozuwe zooi pɛ soni, é pilɛ sɔlɔɔni masagiti ma, ti ɠɛni gize yooi zu, ta lɛkpɛmaʋɛ nu yeezazuʋɛ yooi zu, ta ziɛlaʋɛ ma nɛmɛi, ta niiti ti ɠɛni gize ɠaaɠoozagiti ma. É nu vului kpein suwuɠaaleʋeni, é la nuɓusɛi ɠila kpalaa zɛni ná, eɠɛʋelei Ɠɔoɠɔ GALAGI, Izilayɛle ná-GALAGI ma levei veeni la. 41 É naa yɔɠɔzuʋɛ ma yooi pɛ soni, é zo Kadɛse-Ɓaaleneya, é zeeli Gaza, ta Gosɛn lugi zu, é zeeli Gaɓaɠɔn. 42 Kula laa ɠila kpegi nɔ zu, é zobo sɔlɔɔni masagiti kpein ma, é ta-yooiti pɛ so, mazɔlɔɔ Ɠɔoɠɔ GALAGI, Izilayɛle ná-GALAGI ɠɛni kɔɔi ɠɔɔzu ná-nuɓusɛiti bɛ.

43 Naa ʋoluma, Zozuwe ta Izilayɛle nuiti ti ɠaleni ma ti-ʋuuzuʋɛ Gilegale.

<- Zozuwe 9Zozuwe 11 ->