5
1 «Wooɠula lɛɛ, è pɛtɛ ni nu ɠa è wooɠaaʋote.
Geezuɠeela ɲadegaiti su, ɓɛgele ɠa ɗa wooɠula ma?
2 Mazɔlɔɔ ziiɠulagi ɠa a ɗa ɠimalala nui ʋa,
ziiɠaawanai ɠa ɗa faaɠaaɠalala nui undaaʋili.
3 Gaamazu, gè ɠimalala nui ɠaani, sape ɗa ziɛ,
su la ɠɛni ɠoozani, gè niima ɠotoi looni ná-pɛlɛyeɠei ma:
4 ‹Ná-dointi ti mina ʋoluzeizu nɔpɛ sɔlɔɔ,
ta ti ʋeelalana tukpɔɠaaleʋezuʋɛ,
nu mina zɔlɔɔ é ʋa ti maavaawo!
5 Nii a faza, naama lɔnɔgi ɠɛ ga taɠiligaa tɔnɔ,
ti li, ti so, anɛɛ ni ɠaingiti ta ná!
Unsuɲɔu nuiti ti ʋa, ti loo zeaɠɔligiti su!›
6 «Maanɔɠɔi la ʋɔnɔga é ʋa ɠula fufiligi zu,
kpɔlɔi la wuzeɠea é ʋa ɠula pɔlɔi ʋa.
7 Mazɔlɔɔ nui ɠa zɔlɔɔsu kpɔlɔi zɔlɔɔ fai ma,
eɠɛʋelei abuɓeɓelai a ɗa wuzeɠe koʋe fai ma la.
8 «Ni nà ɠɛni de, GALA nɔ ɠa nà la ʋoluzei ba,
ungo, GALA ka nà la nà-faiti daazeeli ma.
9 Niiti é ti ɠɛɛzu, naati ta ga faa wolaiti, nu la ti ɠaaɠa,
nu la zooga è ʋa ná-laavɔɔ vaiti gaalu.
10 Tɔ ɠa a ɗa tonai ʋu eteai zu ná pɛ,
é dɔɓɔi kpein kɔ ga ziɛi.
11 Niiti ti maayeiɗai, toɠa naati buzeɠe, ti ɠaaɠooza,
niiti ti yiizoolɛai, toɠa naati unmɔɔ, é ti ɠula.
12 Toɠa ɗa naati ta-vaazeikpasuiti suɠoloɠolo, niiti ti ga keleɠele nu ɲɔiti,
ti-yeeiti ti la zooga ti ʋa ɓɔ ti ʋa, ti ʋa li luɠɔma.
13 Toɠa ɗa ɠima nuiti so ga balii, nii é ga ta-ɠeleɠele ɲɔi,
ta-lɛnɛ ɲɔiti ti la faa ʋaa.
14 Ta ɗa ziɠa kpidii ʋa folo ɓekpegi,
ti ɗa yeeʋɛɛ mɛmɛ folo gaalɔgai.
15 GALA ka ɗa bala nui ɠula ti-laaʋɛ ma woɠa zɔkpɔi laawu,
toɠa ɗa maawɔin nui ɠizo, é kula zobobɛ nuiti zea.
16 Kito ka maawɔin nui ʋɛ,
ta toɠa ɗa faa ɲɔu ɠɛ nuiti pɛ daaɠulu.
17 «Naa ɠa é ba deɠɛmu, undaanɛ nui ɠa ga naa, zɔi GALA ge maaɠolozu.
Mina ɠɛlɛ Zɛbɛi-Pɛ-Maliɠii ná-maaɠoloi ʋa.
18 Mazɔlɔɔ GALA ka nu ɓɔlɔ, é è ɠɛdɛ ɓalaa.
Ni a nu maawanana, tɔ ɓɔɠɔi ɠa a kpe.
19 Kidaaʋili seizu lɔzita zu, toɠa è ɠula ti zu,
dɔfelasiɛi zu, faa ɲɔu la zeelia è ma.
20 Pului ma ziɛgi zu, toɠa è ɠizo saai ma,
kɔɔi ɓɔi ʋa, toɠa è-yɛnvui makɛ.
21 Ɗa lɔɔɠuzu zɔlɔɔ nu nɛgi ná-kpakɔi ʋa,
è la lua faa zuɠoloɠologi ʋa é ʋaazu.
22 Ɗa ɲɛɛɠula faa zuɠoloɠologi ta pului zu,
è la luaa dɔɓɔ zuaiti ba.
23 Mazɔlɔɔ minazeɠe ka ɠɛ wo yɔɠɔzu wa dɔɓɔzu ɠɔtuiti,
ta ziilɛigi ɠa ɠɛ wo yɔɠɔzu wa dɔɓɔ zuaiti.
24 Ziilɛigi ɠa ɠɛ ɗa-ʋɛlɛi wu ná pɛ,
siɛgi zu è wɛlɛzu la ɗa-logani ɓulugiti ma sasai zu, gaa la ʋalaga ta ʋa.
25 Ɗa pɛtɛ ga ɗa-ʋɛlɛyeɠei ɠaa ɠa wɔɔlɔ,
è-mavofodaiti ti ʋɔnɔ eɠɛ dɔɓɔzu lufaiti.
26 Ɗa yei kabai zu ga pɔlɔzaɠadai,
eɠɛ molo ɠili wolai nii daavegai.
27 Wɛlɛ, naa ɠa gi ɠidaai bu gola, tɔ ɠana.