Zɔɓe 42

Zɔɓe ná-gooɠaaʋote gaaɓelagi

1 Zɔɓe Ɠɔoɠɔ GALAGI wooɠaaʋoteni, é ɠɛ ma:

2 «Gè kwɛni ga ɗa zoo é fai pɛ kɛ,

faa nɔpɛ ge la pele ɓesaga è luɠɔ, è ʋa ɓe ɗa-leveiti kɛɛzu.

3 È ɠɛni ɠɛɛzu mà: ‹Ɓɛ ɠa ga ɗe, è ʋa nà-deveiti gaaʋala ba ga ɠimalala ɓɔɛzuɠulaiti?›

Ungo, gè ɠɛa ɓɔɛzu é ʋilɛ faiti ba, gè la ɠɛni ti ɠaaɠaani,

ti ɓudɛai màazu, gè la ɠɛni ti ɠwɛɛni.

4 È ɠɛni ɠɛɛzu mà: ‹Woilo, nà ɓɔɛzu è ʋɔ,

nà ʋaazu è ɠaazaɠasu, ɗa kàlasu.›

5 Gè ɠɛa ɗa-vai mɛnisu,

kɛlɛ niizu gè ɠaazulaa è ma.

6 Naa ɠa é ba, gè ɓɔɠɔ ʋeelalaa,

gè nimiza, gè la fufiligi zu ta zuʋui.»

Zɔɓe ná-fai ɠaaɓela ʋelei

7 Ɠɔoɠɔ GALAGI ɓegai ma ga niima ɓɔɛiti bo Zɔɓe ma, Ɠɔoɠɔ GALAGI ɠɛni Teman nui Elifaze ma: «Zìiɠaawanaʋɛ è ma, wa è-wɔɔla felegɔiti, wo la ɓɔɛni ga gaamai é ʋa ʋilɛ bà, eɠɛʋelei nà-botiɠɛ nui Zɔɓe kɛai la. 8 Niizuʋɛ, à nikɛ zinɛ lɔfela zeɠe, ta baala sinɛ wola lɔfela, wo lii la nà-botiɠɛ zunui Zɔɓe ʋɔ bɛ, wo ti ɠula ga gala zalaɠai. Nà-botiɠɛ zunui Zɔɓe ɠa GALA fali wo ʋɛ, ʋelei gè unfesu ma la, gè la wo zoga eɠɛʋelei wa-ɠimalala vai la, mazɔlɔɔ wo la ɓɔɛni ga gaamai é ʋa ʋilɛ bà, eɠɛʋelei nà-botiɠɛ zunui Zɔɓe kɛɛni la.»

9 Elifaze nii é ga Teman nui, ta Ɓilidade nii é ga Suɠa nui, ta Sofaal nii é ga Naama nui, ti liini, ti naa ɠɛ, nii Ɠɔoɠɔ GALAGI boni ti ma. Ɠɔoɠɔ GALAGI woiloni Zɔɓe ná-fali wooi ma.

10 Naa ʋoluma Ɠɔoɠɔ GALAGI Zɔɓe wuzeɠeni ʋolu, siɛgi zu é GALA falini la bɔɔlaiti bɛ. Nii kpein Zɔɓe ʋalani ma, é naama ʋɛɛda felegɔi veeni zea vɔlɔ. 11 Zɔɓe kɛɛɠɛlointi kpein, zunu geleiti, ta anzanu geleiti, ta bɔɔla ʋagɔiti, ti ʋaani pɔ bɛ ná-pɛlɛi wu, ti laami ʋɔɔma. Ti ta-wɔinlai ɠulani bɛ kɛlɛma, ti gaanɛɛnɛ, tɔɔzei maanɔɠɔi kpein faa zu nii Ɠɔoɠɔ GALAGI seini ma. Ti ɠilagilagi ti wali ɠaei veeni zea, ta zanu balaɠaegi.

12 Ɠɔoɠɔ GALAGI tuya looni Zɔɓe ʋɛ ná-eteai ma ɠaaɓelagi zu, é leʋe ma mɔungi ʋa. Togani goiti é ti zɔlɔɔni, naa ɠɛni ga waapuugɔ maazu naani (14.000), ɲɔmɛi ɠɛni ga waadɔzita (6.000), nikɛi ɠɛni ga waafelegɔ (2.000), ta soovale saai ɠɛni ga waagila (1.000). 13 É doun zunu lɔfela zɔlɔɔni, ta doun anzanu saʋagɔ. 14 É anzanu loun mɔungi laasei pɛɛni ga Yemima (nii poluʋɛ ga «kpumagoi»). É felesiɛi laasei pɛɛni ga Kezia (nii poluʋɛ ga «gulɔ maku nɛɛnɛgi ma wului ma ʋuai»). Saʋasiɛi laa ɠɛni ga Kelɛn-Ɠapuke (nii poluʋɛ ga «gaazuɠɔpolu ʋodai»). 15 Pa anzanuiti kpein ti ɠɛni zooi ná zu, tanɔpɛ ge la ɠɛni ʋani ga Zɔɓe ná-doun anzanuiti kɛʋele. Ti-ɠɛɛ tɔnɔ veeni ti ya poganii zu, ga ti-ʋaazeelaiti kɛʋele.

16 Naama vaiti teʋe ga ʋoluma, Zɔɓe yɛni vulua, é kɛ ga kona ungila kona ʋuunaani (140), é ná-dointi ka, ta ná-doun zunuiti ti-lointi, eyɛsu ɠɛɠalama naanigɔ. 17 Naa ʋoluma, Zɔɓe zii zuɠoozani, é wɔlɔzaɠa gola é ʋa leɠa za.

<- Zɔɓe 41