Zelemi 42

Pela wo fai ga Ezipete yooi zu ʋele

1 Salaʋusu ɠundiɠiiti kpein, é ɓɔ Kaleya ná-doun zunui Yoɠanan ʋa, ta Wosaya ná-doun zunui Yezania, ta nuɓusɛiti pɛ, ti liini, 2 ti ɠɛ GALA goo wo nui Zelemi ma: «Nii gi maaɠaazaɠabosu è ma, yeezei bu ga pagɔ: Ɗa-ƓALAGI, é ga Ɠɔoɠɔ GALAGI maanɛɛnɛ gi ʋɛ, gi mɔtaiti gi yɛgai ná. Mazɔlɔɔ gi mɔinni gola, gi maalɔiɗa, eɠɛʋelei è-ɠaazuʋɛ pɛtɛsu da. 3 Ɗa-ƓALAGI, Ɠɔoɠɔ GALAGI ɠaazaɠa, ʋɛ gá li ná, é naama ʋelei lɛ ga giye, ta nii maanɛai gi kɛ.»

4 GALA goo wo nui Zelemi ɠɛni ti ma: «Gè mɛniga. Nà ʋaazu Ɠɔoɠɔ GALAGI wa-ƓALAGI valizu, eɠɛʋelei wo bogai la mà. Naa ʋoluma, nà Ɠɔoɠɔ GALAGI ná-gooɠaaʋotegi lɛ ga woye, gè la tanɔpɛ dɔɔɠua wo ʋa.» 5 Ti ɠɛni Zelemi ma: «Gá minazeɠezu ga gá ziɛ ga naa nɔ, nii Ɠɔoɠɔ GALAGI ɗa-ƓALAGI a bo è ma, ga è bo gi ma. É ɠɛ ga gaama wo zeelei, nu la maaɠaalia, gá-minazeɠegi vaa zu. 6 É ɠɛni ga ma ʋagɔ, ɓaa ma ɲɔu, gá ɠolo Ɠɔoɠɔ GALAGI, gá-ƓALAGI wooi ʋɛ, nii gá ɓɔɠɔi gi è leʋega pɔ bɛ. Gi undaa ɠa nɛ ga ɠolona Ɠɔoɠɔ GALAGI, gá-ƓALAGI wooi ʋɛ.»

7 Folo puugɔ leʋegai ma, Ɠɔoɠɔ GALAGI gooɠaaʋotegi veeni Zelemi ya. 8 Zelemi Kaleya ná-doun zunui Yoɠanan lolini, ta salaʋusu ɠundiɠiiti pɛ ti ɠɛni polu, ta nuɓusɛi pɛ é ɠɛni ná, é zo ɓolomadɔɠɔiti ma, é li seizumaanɛgiti pɔ. 9 Naa ʋolu, é ɠɛni ti ma: «Ɠɔoɠɔ GALAGI, Izilayɛle ná-GALAGI wooi ɠaa, nii wo valini mà ga gè li, gè wo-maavai laazeeli ma: 10 ‹Ni wa yɛna zeini zooi nii zu, nà wa-nuɓusɛiti maamɔin ʋolu, gè la mɔ wo ɠoloɠologa, nà wo zapelɔ, gè la mɔ wo lɔɔɠulaa. Mazɔlɔɔ maanɔɠɔ vai gè kɛɛni ga woye, nà yee zeɠe naa ma. 11 À ɓena niina luazu Ɓaɓilɔne masagi ʋa, à mina lua ba,› Ɠɔoɠɔ GALAGI wooi ɠana. ‹Mazɔlɔɔ nà wo ʋa, gè wo ɠizo, gè la vaa bu é ʋa wo ɓɔlɔ. 12 Nà maawɔinɠai ɠɛ wo ʋɛ, naa ɠa a kɛ é nuɓɔɠɔlai ɠɛ wo ʋɛ, é wo yɛ ná, wo ɠale ma ʋolu wa-yooi zu.›

13 «Kɛlɛ ni wa ɠɛna: ‹Gi la zeizu zooi tɛi su, ni wo la ɠoloni Ɠɔoɠɔ GALAGI wa-ƓALAGI wooi ʋɛ,› 14 ni wa ɠɛna ma: ‹Ɓa, gá liizu Ezipete yooi zu, ʋɛ gi la kɔɔ ɠa ná, gi la kɔɔɠɔ ʋuʋu fɛɛ woomɛniga ná, ʋɛ pulu la gi ɓɔlɔa ná, miná ɠa gi zeizu ná,› 15 à woilo Ɠɔoɠɔ GALAGI laawooi ma, Zuda masadai zu nuɓusɛi mɔtaiti. Ɠɔoɠɔ GALAGI, Fai-Pɛ-Maliɠii, Izilayɛle ná-GALAGI wooi ɠaa: ‹Wa devena gaamazu ga wo li, wo zei Ezipete yooi zu, wa liina, wo lɔɔɠu ná, 16 kɔɔi é wo maaluazu, naa ɠa zeeli wo ma miná Ezipete yooi zu, pulu vai wo yiizoolɛzu la, naa ɠa ʋilɛsu wo ʋolu náʋɛ, ná ɠa wa za ná. 17 Zɔi pɛ a deve ga é li, é lɔɔɠu Ezipete yooi zu, naati ta za ga kɔɔi, ɓaa pului, ɓaa ɗɔfɔ zeeɓɛi. Taɠila kpalaa ge la ɠulaa maanɔɠɔi ya, nii nà sei ti ma.›

18 «Ɠɔoɠɔ GALAGI, Fai-Pɛ-Maliɠii, Izilayɛle ná-GALAGI wooi ɠaa: ‹Nà-ziiɠaawanai ʋooʋaai ma Zeluzalɛme nuiti daalɔɠɔma. Zenɔ ɠana nà-ziiɠaawanai ɠɛɛzu la wo laalɔɠɔma, ni wa liina Ezipete yooi zu. Ta ɠɛ yeezulazu ga woye kona wosuʋɛti, gaazuɗɛ ʋuu vaiti su, ta foovoo loozuʋɛti, ta ɓaaɠulama vaiti. Wo la mɔ niima yooi ɠaa ʋolu pɛ.›

19 «Zuda yooi zu nui mɔtaiti, Ɠɔoɠɔ GALAGI ɠɛ wo ma: ‹À mina li pa Ezipete yooi zu.› À ɠizɛ su ga pagɔ, gè ɠona wo ʋɛ za. 20 Wa ɓɔɠɔ ɠakasu, siɛgi zu wo tèʋeni la Ɠɔoɠɔ GALAGI wa-ƓALAGI ma, wo ɠɛni mà: ‹Ɠɔoɠɔ GALAGI gá-ƓALAGI maanɛɛnɛ gi ʋɛ, naa ʋoluma, nii Ɠɔoɠɔ GALAGI a bo, ti pɛ dɛɛ ga giye, gá ti ɠɛ.› 21 Za deɠɛmu, gè ʋaa wo ʋɔ ga Ɠɔoɠɔ GALAGI wa-ƓALAGI ná-gooɠaaʋotegi, kɛlɛ wo la woilosu naa ta ma, nii é boga ga gè bo wo ma. 22 Tama, wa za ga kɔɔi, ɓaa pului, ɓaa ɗɔfɔ zeeɓɛi, ʋɛ wo liizu lɔɔɠuzu ná!»

<- Zelemi 41 Zelemi 43 ->