Zelemi 25

Ʋɛ woozotalai a ɗa li ga nui ná

1 Wɛlɛ keela wooi ʋa Zelemi sɔlɔɔni Zuda nuɓusɛiti pɛ faa zu, Zuda masagi Yeɠoyakime, Zoziase ná-doun zunui, ná-kona naanisiɛi ma, nii é zolooni Ɓaɓilɔne masagi Neɓukadenɛzaal ná-kona mɔungi ma. 2 GALA goo wo nui Zelemi ɓɔɛni Zuda nuɓusɛiti pɛ pɔ ta Zeluzalɛme nuiti, é ɠɛni ti ma:

3 «É zo Zuda masagi Zoziase, Amon ná-doun zunui, ná-kona puugɔ maazu zaʋasiɛi ma (13), eyɛsu za, kona ʋuufelegɔ maazu saʋagɔ (23) ɠaa gè ɗa Ɠɔoɠɔ GALAGI laawooi woo wo ma, dooɠo ge la ba, kɛlɛ wo la woilosu ma. 4 Ɠɔoɠɔ GALAGI la ɓeni ná-botiɠɛ nuiti, GALA goo wo nuiti teʋe fai ʋa wo ma. Kɛlɛ wo la woiloni, wo la ɠidaani ma. 5 Ti ɠɛni wo ma: ‹Ɛsɛ ge ɠɛlɛ siɛ ʋele ɲɔi ʋa, ta faa ɲɔi é kɛɛzu! Naazu wa zoo wa-eteai ziɛzu zooi naa zu, nii Ɠɔoɠɔ GALAGI feeni wo ʋɛ, wa wo-mɛmɛwolani, eyɛsu ɠɔ. 6 À mina ʋilɛ gala kiligiti polu, wo ʋa ɗa ti lɛbi, wo ʋa ɗa nɔkɔ ti wu, wo mina zìiɠaawana ga kɔɔɠɔ ganigiti wo ti ɓɛtɛni ɓɔɠɔ ʋɛ, naazu gè la faa ɲɔu ɠɛa ga woye.› 7 ‹Kɛlɛ wo la ɠɛni woiloni gòoi ma,› Ɠɔoɠɔ GALAGI wooi ɠana. ‹Wo zìiɓɔlɔni ga kɔɔɠɔ ganigiti wo ti ɓɛtɛni ɓɔɠɔ ʋɛ, wo ɓɔɠɔ ɓɔlɔ vai ma.›

8 «Naa ɠa é ba, Ɠɔoɠɔ GALAGI, Fai-Pɛ-Maliɠii wooi ɠaa: ‹Tɔɔzei wo la woiloni dàawooiti ma, 9 nà nu ɠɔʋɛzu ʋele yooiti ma nuɓusɛiti kpein tolisu,› Ɠɔoɠɔ GALAGI wooi ɠana. ‹Nà nà-botiɠɛ nui Neɓukadenɛzaal lolisu, Ɓaɓilɔne masagi. Nà ʋaazu ga tiye zooi tɛi daalɔɠɔma, ta ná-nuɓusɛiti, ta zii ɠiligiti pɛ daalɔɠɔma ti maaɠoolii zu ɓalaa. Nà wo-ma zuwu ɠaaleʋe, wa-o, tiya-o. Nà niima yooi ɠoloɠolo, é la ɓɛtɛa eyɛsu ɠɔ, toɠa ɠɛ ga laavɔɔ vaa ta ɲɛɛɠulasu anii. 10 Nà faiti pɛ pɛɛ su mɛɛ, é ɠɛni ga fɛti ɠoozunɛɛi, ɓaa koozunɛ woo wolaiti, ɓaa vulu ɠɛa niinɛiti ta-wuye loo vaiti, ɓaa koda ziɠa lugi, anɛɛ lanbo wozakalagi. 11 Zooi ɲɛgɛlɛin ka ɠoloɠolo, gaaʋala ba, ta zii naati kpein ta ɠɛ Ɓaɓilɔne masagi yeezu kona ʋuulɔfela (70) laawu.›

12 « ‹Kɛlɛ siɛgi zu kona ʋuulɔfelai (70) laazeelizu la, nà laalɛ niina Ɓaɓilɔne masagi wu ta ná-nuɓusɛiti ta-ɲamaba vaiti faa zu,› Ɠɔoɠɔ GALAGI wooi ɠana. ‹Nà laalɛ ta-yooi wu, gè gaaʋala ba eyɛsu ɠɔ. 13 Faiti kpein gè ti wogai ma yeei luɠɔ, ti ga maanɔɠɔ vaiti, nà ʋa ga naati zooi tɛi daalɔɠɔma, ti pɛ sɛʋɛʋɛ sɛʋɛi nii zu, nii Zelemi ti woni ma yeeluɠɔ zii ɠiligiti daalɔɠɔma. 14 Ɓaɓilɔne nuiti ɓalaa ta ɠolo zii ɠiligiti bɛ, ta masagiti bɛ zobogi ti ʋɛ. Faa ɲɔi nii kpein ti kɛɛni, nà ti zala é zoloo naa ma.› »

Ziiɠaawana ɗaawɔi ziiti kpein daalɔɠɔma

15 Ɠɔoɠɔ GALAGI, Izilayɛle ná-GALAGI wooi ɠaa mà: «Nà niima ɗaawɔi veezu è ya, daavegai ga nà-ziiɠaawanai. Seɠe, è to ziiti kpein da, niiti gè è leʋe ti ma. 16 Ti kpɔle, ti ɠaazulati, tɔungi zuɠoloɠolo saai luɠɔ nii gè ʋaazu teʋesu ti zaama.»

17 Gè ziawɔi naa zoni, gè kula Ɠɔoɠɔ GALAGI ya, gè toni ziiti kpein da nii Ɠɔoɠɔ GALAGI ɠɛni tèʋesu ti ma. 18 Gè tɔɔzeini, gè to Zeluzalɛme la ta Zuda laa wolaiti, é ɓɔ masagiti ba ta kundiɠiiti, nii a kɛ ti ɠoloɠolo, zooi ʋu ya, ti ɠɛ ga ɲɛɛɠulasu anii, kotoai, eɠɛʋelei ti la zaaɠaza. 19 Naa ʋolu zii ɠiligiti tɔnɔi zeelini:

Ezipete masagi Falaɠɔn ta ná-kɔɔɠɔ ɠundiɠiiti, ta ná-nu wolaiti, ta ná-nuɓusɛiti pɛ, 20 ta nuɓusɛi ma zii pɛ ti zeini Ezipete yooi zu,

Use yooi zu masagiti kpein,

Filisiti nuiti ta-yooi zu masagiti kpein, é zo Asekalɔn, é li Gaza, ta Ekelɔn, ta Asadɔde nuiti ti yɛni ná,

21 Edɔme yooi, ta Moaɓe yooi, ta Amɔn nuiti,

22 Tiil masagiti kpein, ta Sidɔn masagiti kpein, ta kpoloɗɛi laaʋɛ yooi nii é kpoloɗɛi ʋoluʋɛ, naa ma masagiti,

23 Dedan nuɓusɛiti, ta Tema, ta Ɓuze, ta niiti ti ti-ɓakalagiti bosu,

24 Alaɓe yooi zu masagiti, ta nuɓusɛiti ma zii pɛ ti zeini teʋebai zu,

25 Zimili masagiti kpein ta Elame masagiti, ta Mɛde masagiti kpein,

26 masagiti pɛ ti lɛkpɛmaʋɛ nu ɠɔʋɛzuʋɛ, ti maaɓuɠaai ɓaa ti maaɠoozaai.

Masadai kpein é eteai zu, ti ɓɔɔleni ga ziawɔi naa ga gilagila. Ti pɛ poluma, Sesake masagi ɠa a ɓɔɔle la.

27 «Ɗa ɠɛ ti ma: ‹Ɠɔoɠɔ GALAGI, Fai-Pɛ-Maliɠii, Izilayɛle ná-GALAGI wooi ɠaa: À dɔɔi ɓɔle eyɛsu é wo zo, wo ɗa unpili, eyɛsu wo loo zooi ma, wo mina zoo wo ʋa wuzeɠe, wo ʋaa vai luɠɔ nii gè teʋesu wo zaama.› 28 Ni ti la ɠɛ kɛɛni ti ʋa ziawɔi zo, ti kula è ya, ti ʋa ɓɔɔle la, ɗa ɠɛ ti ma: ‹Ɠɔoɠɔ GALAGI, Fai-Pɛ-Maliɠii wooi ɠaa: Kɛɛɠeleɠele ge la ná, kɛni nɔ wo ɓɔɔle la! 29 Gè la ɓaazu taa wolai nii maazu feai bɛ̀, gè kpɔlɔ vai lɔɔzeiɗa. Wɔun wa, wa ɠula nɛi ɓaa? Wo la ɠulaa pɛ! Mazɔlɔɔ nà ʋaazu ga saai eteai zu nuɓusɛiti kpein daalɔɠɔma,› Ɠɔoɠɔ GALAGI, Fai-Pɛ-Maliɠii wooi ɠana.

30 «Maliɠii ɠɛni mà mɔnɔ: ‹Nii kpein gè boga è ma, ɗa naa laazeeli ti ma bɛ̀, ɗa ɠɛ ti ma ʋolu:

Ɠɔoɠɔ GALAGI zikɔ gooi ɠa ɠulazu geezuʋɛ.

Gooi ɠa ɠulazu, é zeɠe sei ʋɛlɛ ɲadegai wu.

Toɠa zikɔzu ná-nuɓusɛiti daalɔɠɔma.

Toɠa kpeei loozu zooi ɠaa nuɓusɛiti pɛ daalɔɠɔma

eɠɛ niiti ti dɔɔɓɔi gwaai ɠaayɔsu ɠɔɠɔwu.

31 Ma zɔngɔ wooi ɠa zeelizu zou ɓela ga ná pɛ,

Ɠɔoɠɔ GALAGI ɠa ziiti tukpɔɠaaleʋezu

toɠa nuɓusɛiti pɛ tukpɔɠaaleʋezu,

é faa ɲɔi ɠɛ nuiti dɔ boɠa zɔkpɔi laawu,› »

Ɠɔoɠɔ GALAGI wooi ɠana.

32 Ɠɔoɠɔ GALAGI, Fai-Pɛ-Maliɠii wooi ɠaa:

«Maanɔɠɔi ɠa vaza ziiti saama,

é zo zɔɔla ʋele, é li zɔɔla ʋele,

fiilɛ wola ɠila ka wuzeɠe zou ɓela ga.»

33 Naama voloiti su, niiti Ɠɔoɠɔ GALAGI a ti ʋaa, ta yɛ nɔ zooi maazuʋɛ, é zo zou ɓela ga, é li zɔɔla ʋelei. Nu nɔpɛ ge la ta-wɔlɔ woga, nu la ti ɠaalɛa ba, ti maa la ɠulua kaba zu. Ta ɠɛ ga kpoɠa pɔlɔ zooi ɠaaʋɛ.

34 À kpalagi wo, baala makɛ nuiti, à kpeei loo!

À ɠilikili zooi ma, togani makɛ nu wolaiti,

mazɔlɔɔ undaaʋili foloi zeelia wo ma.

Wa loo, wo ɓɔnɛkɛlɛ, eɠɛʋelei nu a ɗa aniɲaka ʋagɔi ɓezeɠele da.

35 Naazu dɔɔɠu wosu la ɠɛa baala makɛ nuiti bɛ,

dɔɔɠuzu nɔpɛ ge la mɔ togani makɛ nuiti bɛ.

36 Kpee wooi ɠa mɛnisu baala makɛ nuiti ti toozu,

ta togani makɛ nu wolaiti sɔngɔ wooi,

mazɔlɔɔ Ɠɔoɠɔ GALAGI ti-laamiizuʋɛ ɠoloɠologa.

37 Ɠɔoɠɔ GALAGI ná-ziiɠaawanai maaʋele ma,

tufa lɛnugiti su ɠaalɛiɗa tɔɔn eɠɛ saa ɠa loo.

38 Kɛɛʋɛ eɠɛ zalai é ɠulazu ná-pugi zu.

Ta-yooi ɠɛa ga teʋebai,

ti-zili nuiti ta-woɠa zɔkpɔi, ta ná-ziiɠaawana wolai maaʋele ma.

<- Zelemi 24 Zelemi 26 ->