Link to home pageLanguagesLink to all Bible versions on this site

1 Ziiti pɛtɛ, niiti Ɠɔoɠɔ GALAGI ti yɛni zooi zu, ga ti ɠɛ ga ʋoluɠula anii Izelayɛle ʋɛ, tiya ɠa ti la ɠɛni Kanaan yooi zo fai ma ɠɔɔi ta ɠɔɔni. 2 Naa ɠɛ ungi ɠɛni ga ɠɛɠalama niinɛi, é wuzeɠezu Izelayɛle nuiti saama, niiti ti la kɔɔɠɔ vaa ɠwɛɛ, naati ti kɔɔɠɔ vai maalɛlɛ. 3 Ɠɔoɠɔ GALAGI Filiseti nuiti ta-masada lɔɔlugɔi ma nuɓusɛiti zɛni zooi zu, ta Kanaan nuiti kpein, ta Sidɔn nuiti, ta Ɠeeve nuiti ti ɠɛni zeini Liɓan ɠizeiti ma, é zo Ɓaale-Ɠɛɛlemɔn gizei ma, eyɛsu é zeeli Leɓo-Ɠamate. 4 Zooi naati ti ɠɛni ná, Izelayɛle ʋoluɠula vai ma, ni ta ɠolo deveiti bɛ, niiti Ɠɔoɠɔ GALAGI ti veeni ti-mɛmɛwolani zea ga Moize maaʋele.

5 Izelayɛle nuiti ti zeini Kanaan nuiti saama, ta Ɠɛte nuiti, ta Amɔɔl nuiti, ta Feeleeze nuiti, ta Ɠeeve nuiti, ta Yeeɓuse nuiti. 6 Ti zooi naati su nuiti ti-loun anzanuiti seini ga ti-anzaiti, ti ti-loun anzanuiti fe naati ti-loun zunuiti bɛ ga ti-anzaiti, ti ɗa ta-ɠalagiti dɛbi.

Wɔteniyɛle,
tukpɔɠaaleʋe nui Izelayɛle unda
7 Izelayɛle nuiti ti Ɠɔoɠɔ GALAGI wanama vai ɠɛɛni. Ti yeemani Ɠɔoɠɔ GALA ma, ta-ƓALAGI, ti li ti ɗa nɔkɔ Ɓaaleni bu, ta Aseelani. 8 Ɠɔoɠɔ GALAGI yiiɠaawanani Izelayɛle ma, é ti ʋɔdini Meezɔpɔtami masagi Kusan-Liseyatayime ma. Ti duɔlai ɠɛɛni Kusan-Liseyatayime yeezu ga kona dɔsaʋa. 9 Ti kpeei looni Ɠɔoɠɔ GALAGI woizu, naa unmɔɔ nu wuzeɠeni Izelayɛle nuiti bɛ, naa ti ɠizoni, Wɔteniyɛle ɠɛni ga naa, nii é ɠɛni ga Kenaze ná-doun zunui, Kalɛɓe deɠei. 10 Ɠɔoɠɔ GALAGI ná-Zɛnvui ɠɛni tɔun ba. É ɠɛni ga tukpɔɠaaleʋe nui Izelayɛle unda. É liini ga kɔɔi Kusan-Liseyatayime laalɔɠɔma, Meezɔpɔtami masagi, Ɠɔoɠɔ GALAGI zobogi veeni bɛ, é pilɛ sɔlɔɔ naa ma. 11 Ziilɛigi ɠɛni zooi zu ná pɛ, kona ʋuunaanigɔ (40) laawu. Kenaze ná-doun zunui Wɔteniyɛle zaani.
Eɠude,
tukpɔɠaaleʋe nui Izelayɛle unda
12 Izelayɛle nuiti ti Ɠɔoɠɔ GALAGI wanama vai ɠɛɛni mɔnɔ. Naa maaʋele ma, Ɠɔoɠɔ GALAGI Moaɓe masagi Egelon iɲɔdɔɔni, é wuzeɠe Izelayɛle laalɔɠɔma. 13 Egelon Amɔn nuiti kpɔni ɓɔɠɔ ʋa, ta Amalɛke nuiti, ti li ti laalɛ Izelayɛle wu, ti zobogi zɔlɔɔni ma, ti kpɛ ti kula Zeeliko ʋa, Dɔza Taa Wolai, ti so. 14 Izelayɛle nuiti ti lɔɔni duɔlai zu, Moaɓe masagi Egelon yeezu, kona puugɔ maazu lɔsaʋa (18) laawu.

15 Izelayɛle nuiti ti kpeei looni Ɠɔoɠɔ GALAGI woizu, naa unmɔɔ nu leʋeni ti ma ga Eɠude, Ɓɛnzamɛn nui, Geela ná-doun zunui, nii é ɠɛni ga kɔʋɛ nui. Izelayɛle nuiti ti valini ma ga é li ga maazoloo ganii Egelon ʋɔ, Moaɓe masagi. 16 Eɠude boɠa zɔkpɔi ɓɛtɛni ɓɔɠɔ ʋɛ, ga gaavelegi, é ɠɛ ga zeelo felegɔ ta tukpɛ (2,5), é gilini ná-saamaɠiligi ʋa ná-seɠei wu, ga zeezazu ʋele kpalai ma. 17 É liini é maazoloo ganii ve Egelon ya, Moaɓe masagi. Tama Egelon ɠɛni ga zunui, nii gola wɔɔlɔni. 18 Siɛgi zu é ɓeni da ga maazoloo ganii ve zea, é yeeɓeni zunuiti ba, ti li, tɛiti ti ʋaani ga anii naati. 19 Seeliai ma kɔɔɠɔ ganigiti pɔ bɛ, ti ga kɔtui, Gilegale ɠobaʋɛ, é ɠaleni ma ʋolu, é ɠɛ masagi ma: «Ee, masagi, keela woo ɠa zèa, è ʋɛ, é ga dɔɔɠuzu vaa.»

Masagi devei veeni ga ti ɓe ba, niiti kpein ti ɠɛni ná, naati pɛ ti ɠulani pɛlɛi wu. 20 Názu ɠa Eɠude maaɓuɠani la masagi ʋa, é ɠɛni zeini sangasoi wu maazuʋɛ, nii é makɛni ɓɔɠɔ ʋɛ dooɠo bosuʋɛ maazuʋɛ, fiilɛi ɠa. Eɠude ɠɛni ma: «GALA ná-keela wooi ɠa é zèa, ga é wo è ma.» Masagi wuzeɠeni ná-kpɔkpɔgi zu. 21 Eɠude ɠɔʋɛi maaleni yeezazu ʋelei, é boɠa zɔkpɔi mɛɛnni, é pu ba kogi zu. 22 Ma ungi ɓalaa lɔɔni, ma mɛɛngi lɔa ʋoluma, mawulɔi ziɛni ma mɛɛngi ma, é naa laaɠulu. Mazɔlɔɔ boɠa zɔkpɔi folokulani ga polu ʋelei, é la ɠɛni mɛɛnni, é ʋa kula. 23 Eɠude ɠulani ga pɛlɛ ʋolu ʋelei, é daaɠulu, é sɔɠɔgi loo.

24 Siɛgi zu é ɠulani la, masagi ná-botiɠɛ nuiti ti liini ti naa ʋɛtɛ, ti kaani ga sangasoi ma ʋɛlɛlaʋɛti daaɠuluni, sɔɠɔgi loo. Ti ɠɛni ma: «Tanisu, toɠa ɠɛ latini pɛlɛi ʋolu.» 25 Ti ɓɔlɔni ga maaɓɔunga, kɛlɛ tɛi é la ɠɛni sangasoi ma ʋɛlɛlaʋɛti daalaoni maazuʋɛ, ti kpakui zeɠeni, ti daalao, pɛtɛ ti-maliɠii ɠɛni laani zooi ma, saai.

26 Tɛi ti wola lɛbini maaɓɔungi ɠa, Eɠude ʋelani. Kɔɔɠɔ ganigiti ti ga kɔtui, é naati pɔ bɛ maazuɓudɛni, é ʋela é li Seyila. 27 Seeliai ma miná feya, é puʋugi vɛɛni Efelayime ɠize yooi zu. Izelayɛle nuiti ti yeini, ti zeɠe gize yooi zu, é loni ti untuɠɔ.

28 É ɠɛni ti ma: «À ʋilɛ pòlu, mazɔlɔɔ, Ɠɔoɠɔ GALAGI Moaɓe nuiti dɔa wo yeezu, wo zili nuiti.» Ti ʋilɛni polu, ti Zuludɛn maaleʋesuʋɛti so Moaɓe yooi letemaʋɛ, ti la nu nɔpɛ zɛni ná, é ʋa ziɛ wolai maazuɓudɛ. 29 Naama voloi, ti zunu waapuugɔ (10 000) ʋaani Moaɓe nuiti ba, ti pɛ ti ga zunuiti ti zuloga, kɔɔɠɔ nu ɠɛzɛɠɛzɛgiti, gila kpalaa ge la ɠulani. 30 Naama voloi, Moaɓe unmaayeini Izelayɛle yeewu. Ziilɛigi lɔɔni zooi zu, eyɛsu kona ʋuulɔsaʋa (80) laawu.

Samegaal,
tukpɔɠaaleʋe nui Izelayɛle unda
31 Tɔun poluma, Anate ná-doun zunui Samegaal ɠa é wuzeɠeni. É zunu undɔzita (600) ʋaani Filiseti nuiti ba, ga nikɛ maaɓɛɛ lukpɔi kɔlu ɠaazoɓagi ga. Tɔ ɓalaa é Izelayɛle nuɓusɛiti unmɔɔni.

<- Tukpɔɠaaleʋe Nuiti 2Tukpɔɠaaleʋe Nuiti 4 ->