1 Zunui ta ɠɛni zeini Efelayime ɠize yooi zu, daaseigi ɠɛni ga Mika. 2 É ɠɛni dee ma: «È-ɠi ka su ga ti wali ɠaei waagila ungila (1 100) unmani è ya, è unma nui voovooni gàazu. Nà ɠa gè walii naa ɠulani è ya, toɠa pɔ̀ bɛ.»

Dee ɠɛni ma: «Ɠɔoɠɔ GALAGI tuya loo dòun zunui ʋɛ!»

3 É wali ɠaei waagila ungilagi (1 100) veeni dee ya, naa ɠɛni ma: «Nà niima wali ɠaei veezu Ɠɔoɠɔ GALAGI ʋɛ ga nà ɓɔɠɔi zeei, é ɠɛ dòun zunui ʋɛ, ga vololibai ta kɔɔɠɔ ganigi é ga kɔlui gaawuungai. Zekana gè feezu la è ya ʋolu.»

4 É wali ɠaei veeni dee ya. Dee wali ɠaei unfelegɔi (200) zeɠeni, é fe kɔlu ɠaawuun nui ya. Naa vololibai ta kɔɔɠɔ ganigi ɓɛtɛni ga kɔlu ɠaawuungai. Ti ti ʋuuni Mika ná-pɛlɛi wu.

5 Mika naa, ada zɔlɔɔni ná-pɛlɛi wu, ʋɛ é ɠɛni nɔkɔsu ná ti wu. É zalaɠa ɠula zeɠei ta pɛlɛ wu zalei taɠiligaa ɓɛtɛni, é ná-doun zunui ta zei ga ná-zalaɠa ɠula nui.

6 Naama ziɛgi zu, masa ge la ɠɛni Izelayɛle unda. Ɛsɛ ge ɠɛni naa nɔ ɠɛɛzu, nii pagai gaazu. 7 Zunu loungoi ta ɠɛni Ɓɛteleyɛme laai zu, Zuda yooi zu, Zuda ná-bolodai zu. É ɠɛni ga Leevi nui ta, é ɠɛni seikɔɠɔmai zu. 8 Zunui naa zeɠeni Ɓɛteleyɛme taazuʋɛ, Zuda yooi zu, é li zeizu adaʋɛ ta, ʋɛ a zei ná. É yɛni ziɛzu pelei zu, é zeeli Efelayime ɠize yooi zu, eyɛsu é zeeli Mika ná-pɛlɛi wu.

9 Mika ɠɛni ma: «Ɗa zeɠezu mini?»

É gooɠaaʋoteni, é ɠɛ ma: «Nà ga Leevi nui, Ɓɛteleyɛme, Zuda yooi zu, nà liizu gè zei ʋɛ nà zoo zeizu ná.»

10 Mika ɠɛni ma: «Yɛ pɔ̀ bɛ, è ɠɛ ga kɛ̀ɛ, ta zalaɠa ɠula nui bɛ̀, nà wali ɠae puugɔ ve è ya kona gilagi laawu, é ɓɔ seɠeiti ba, ta daamianigi.»

Leevi nui ná-botii lɔɔzeini. 11 É vaani bu ɠana, é yɛ zunui naa ʋɔ bɛ, naa ɓalaa yeezeini bu, é deve ga ná-doun zunui ta. 12 Mika Leevi nui zeini zalaɠa ɠula wotii unda, zunu loungoi naa ɠɛni ga ná-zalaɠa ɠula nui. É naa laazuʋɛɛni ná-pɛlɛi wu. 13 Mika ɠɛni ma: «Niizu, gè kwɛɛga ga Ɠɔoɠɔ GALAGI ɠa faanɛɛ ɠɛ bɛ̀, tɔɔzei Leevi nui nii ɠa bà ga zalaɠa ɠula nui.»

<- Tukpɔɠaaleʋe Nuiti 16Tukpɔɠaaleʋe Nuiti 18 ->