1 Zozɛfe liini, é Falaɠɔn loo ɠisu, é ɠɛ ma: «Kɛ̀ɛ ta kɛ̀ɛleaiti ti ʋaa, ti zeɠe Kanaan yooi zu, é ʋɛɛ ta-logani wolaiti ta ma goiti ba, ta nii kpein é ga tɔnɔi. Pɛtɛ, ti lia Gɔsɛn yooi zu.» 2 É nu lɔɔlugɔ zeɠeni kɛɛɠɛleaiti su, é li, é ti lɛ ga Falaɠɔn. 3 Falaɠɔn Zozɛfe kɛɛɠɛleaiti gaazaɠani, é ɠɛ ti ma: «Wa-wotii ɠa ga ɓɛgele?» Ti Falaɠɔn wooɠaaʋoteni, ti ɠɛ ma: «Ɗa-wotiɠɛ nuiti gá ga togani lo nuiti, eɠɛʋelei gi-mɛmɛwolani ti ɠɛni la.» 4 Ti ɠɛni mɔnɔ Falaɠɔn ma: «Gi ʋaaʋɛ lago zeizu zooi zu, tɔɔzei daamiani ge la mɔ ɗa-wotiɠɛ nuiti ta-logani ɓulugiti zea, mazɔlɔɔ pului wola ɓɔiʋɛ Kanaan yooi zu. Va bu, ɗa-wotiɠɛ zunuiti gi zei Gɔsɛn yooi zu.»

5 Falaɠɔn ɠɛni Zozɛfe ma: «È-ɠɛɛ ta è-ɠɛɛleaiti paaʋɛ è ɠoba. 6 Ezipete yooi ɠa è yeema. È-ɠɛɛ ta è-ɠɛɛleaiti sei zooi ʋasuʋɛ. Ti zei Gɔsɛn yooi zu. Ni è kwɛɛ ga sɔɓelama zunua ta ti zaama, ti zei nà-togani ɓulugiti unda.»

7 Zozɛfe ʋaani ga kɛɛɠɛ Zakɔɓe, é dɛɛ ga Falaɠɔn. Zakɔɓe tuya looni Falaɠɔn ʋɛ. 8 Falaɠɔn ɠɛni Zakɔɓe ma: «È-zii ma voloi ma ɠonagiti ti ɠɛa ga dielegɔ?» 9 Zakɔɓe Falaɠɔn wooɠaaʋoteni, é ɠɛ ma: «Sìi ma voloi ma ɠonagiti ti ɠɛai siɛziɛgi zu, ta ga kona ungila puusaʋa (130). Sìi ma voloi ma ɠonagiti ti la mɔinni, ti ɲɔuʋɛ, ti la zeelini ɲɛgɛlɛin mɛ̀mɛwolani ti-zii ma voloi ma ɠonagiti su, tɔnɔ ma ziɛziɛ voloiti.» 10 Zakɔɓe tuya looni mɔnɔ Falaɠɔn ʋɛ, é zeɠe naa ʋɔ bɛ, é li.

11 Zozɛfe kɛɛɠɛ ta kɛɛɠɛleaiti seizu ɠulani, é naa ta veeni ti ya ga tɔnɔ Ezipete yooi zu, zooi ʋasuʋɛ, Lamesɛse yooi zu, eɠɛʋelei Falaɠɔn ma levei veeni la zea. 12 Zozɛfe kɛɛɠɛ ta kɛɛɠɛleaiti kɔnɔkulani, é ti laazɔbo, ta kɛɛɠɛ ná-pɛlɛyeɠei kpein, eɠɛʋelei dointi tiegɔi ɠɛni la.

13 Daamiani ge la mɔ ɠɛni zooi zu ná kpein, mazɔlɔɔ pului wola ɓɔini. Nuɓusɛiti ti ɠaɲani, Ezipete yooi zu ta Kanaan yooi zu, pului maaʋele ma. 14 Zozɛfe walii kpein gaalɛɛni ba, é kula Ezipete yooi zu ta Kanaan yooi, moloi ʋolu ʋele zu ti ɠɛni geyazu. É naama walii lɛɛni Falaɠɔn ná-pɛlɛi wu. 15 Siɛgi zu walii ɓeni da Ezipete yooi zu ta Kanaan yooi zu, Ezipete nuiti ti ʋaani Zozɛfe ʋɔ bɛ, ti ɠɛ ma: «Daamianigi ve gi ya! Kɛni nɔ gi za è ɠaazu, tɔɔzei walii ɓega?» 16 Zozɛfe ɠɛni ma: «Ni wali la mɔ ná, à wa-loganiiti fe, nà daamianigi ve wo ya wa-loganiiti potogi zu.» 17 Ti ɠɛni ʋaazu ga ta-loganiiti Zozɛfe ʋɔ. Zozɛfe daamianigi veeni ti ya, ta-zooiti potogi zu, ta ta-nikɛiti, ta ta-ʋaalagiti, ta ta-woliiti, ta ta-zoovalegiti. É daamianigi veeni ti ya ɠana naama ɠonagi, ta-loganiiti kpein potogi zu.

18 Siɛgi zu naama ɠonagi leʋeni da, ti ʋaani pɔ bɛ poluma ɠonagi, ti ɠɛ ma: «Gi la dɔɔɠuzu ɲɛgɛlɛin màliɠii ʋa ga walii ɓega gi ya, ta gi ʋaa ga togani ɓulugi màliɠii ʋɔ, naa ɓega, é yɛga gi ma nɔ ga gi ʋaa ga gi-ɓusɛiti ta gá-yooiti, gi fe màliɠii ya. 19 Lee vaa zu gá li zaazu è ɠaazu, giya-o, gá-yooiti-yo? Gi ʋɛɛna gá-yooiti ba, è gi ɠeya daamianigi ʋotogiti su, gá ɠɛ ga Falaɠɔn ná-duɔiti, giya-o, gá-yooiti-yo. Nii ɓalaa gá faza, naa ve gi ya, naa ɠa a kɛ gi yɛ vulua, gi mina za, gá-yooiti gaa ɲakai mina yɛ.»

20 Zozɛfe Ezipete yooi kpein geyani Falaɠɔn ʋɛ, mazɔlɔɔ Ezipete nuiti ti ta-ɓalagiti pɔdini, ti ɠilagilagi, tɔɔzei pului ɓɔini ti la. Zooi ɠɛni ga Falaɠɔn ʋogi. 21 É nuɓusɛiti gaalɛɛni ba, é ti ʋu taa wolaiti su Ezipete ɠwɛpelemaʋɛti, é zo zɔɔla ʋele, é li zɔɔla ʋele. 22 Kɛlɛ é la ɠɛni zalaɠa ɠula nuiti ta-yooi ɠeyani, tɔɔzei Falaɠɔn tɔ seini zalaɠa ɠula nuiti ta-vaa zu. Ti-ɠɔnɔgi ɠɛni ga nii Falaɠɔn ɠɛni feezu ti ya. Naa ɠa é ba, ti la ɠɛni ta-yooiti pɔdini ɲɛgɛlɛin.

23 Zozɛfe ɠɛni nuɓusɛiti ma: «Gè wo ɠeyaʋɛ za Falaɠɔn ʋɛ, wo ʋɛɛ wa-yooiti ba. Ani zuwui ʋɛtɛ, wa zoo wo faza, wo boli wa-yooiti ba. 24 Molo leʋe ziɛgi zu, wa seizu lɔɔlusiɛi ve Falaɠɔn ya, seizu naanisiɛi zɔiti ti ɠɛ ga wɔnɔ, é ɠɛ ga kpalagiti ba zuwui, é wo ɠɔnɔkula wa wo-lointi, ta niiti kpein ti wa-ʋɛlɛyeɠeiti bu.» 25 Ti ɠɛni ma: «Ɗa ɠa è gi-yɛnvui yɛga gi ya, mazɔlɔɔ gi zaalai zɔlɔɔgɛ màliɠii è ɠaazu, gá ɠɛ ga Falaɠɔn ná-duɔiti.» 26 Zozɛfe naa ɠɛɛni ga tɔgi Ezipete yooi kpein su, naa yɛgɛ ma zaaɠaza, Ezipete yooiti ma zɔlɔɔ ganii zeizu lɔɔlusiɛi ɠa ga Falaɠɔn nɔnɔ. Kɛni nɔ zalaɠa ɠula nuiti ta-yooiti ka ti la ga Falaɠɔn nɔnɔ.

27 Izelayɛle nuiti ti zeini Ezipete yooi zu, Gɔsɛn yooi zu. Ti ɓɔɠɔ zɔlɔɔni, ti ɓuɠu, ti wola ɠaawɔɔlɔ. 28 Zakɔɓe kona puugɔ maazu lɔfela ɠɛni Ezipete yooi zu. Zakɔɓe zii ma voloi kpein ge ɠɛni ga kona ungila puunaani maazu lɔfela (147).

29 Siɛgi zu saa voloi maaɓuɠani la, é ná-doun zunui Zozɛfe lolini, é ɠɛ ma: «Ni ɗa va bu, è faaɓɔɠɔ ɠɛ bɛ̀, nà è maanɛɛnɛzu, yeei lɔ kpàlai wu, è minazeɠe bɛ̀, è nɛɛbɛi ɠula kɛlɛma bɛ̀, ta wooɠɛɠiladai, ga è la màaɠulua Ezipete yooi zu. 30 Siɛgi zu gè liizu la mɛ̀mɛwolani pɔ, ti zaai, ɗa kùla Ezipete yooi ʋa, è li ga ze, è màaɠulu ta-ɠabayeɠei zu.» Zozɛfe gooɠaaʋoteni, é ɠɛ ma: «Nà kɛ ɠana, eɠɛʋelei è bogai la.» 31 Izelayɛle ɠɛni ma: «Ɠona bɛ̀.» Zozɛfe ɠonani bɛ. Naa ʋolu Izelayɛle nɔkɔni ná-betei unbuaʋɛ.

<- Zenɛze 46Zenɛze 48 ->