1 Naama vaiti poluma, Ɠɔoɠɔ GALAGI ɓɔɛni Aɓalame ʋɔ segi zu, é ɠɛ ma: «Aɓalame, mina lua ɲɛgɛlɛin, nà ɠa gè ga è makɛ nui, ɗa-ɠulanumai ɠa wɔɔlɔ.» 2 Aɓalame gooɠaaʋoteni, é ɠɛ ma: «Màliɠii, Ɠɔoɠɔ GALAGI, lee ɠa è feezu zèa? Tɔɔzei doun la zèa, nà-pɛlɛi wu ʋogani zeɠe nui ɠa é ga Eliyezɛɛl, Damase nui.» 3 É ta laani ma mɔnɔ, é ɠɛ ma: «È la màvofoda ɓɛtɛni, zɔi sɔlɔɔgai nà-pɛlɛi wu, naa ɠa é ɠɛɛzu ga nà-pogani seɠe nui.» 4 Ɠɔoɠɔ GALAGI ɓɔɛni pɔ, é ɠɛ ma: «Ɓa-o, naa laade, é ʋa ɠɛ ɠɛɛzu ga ɗa-ʋogani zeɠe nui, kɛlɛ kɛni zɔi é ɠulazu è ɠoozu, naa ɠa a ɠɛ ga ɗa-ʋogani zeɠe nui.» 5 Naa ʋolu GALA ge ɠulani la eteaʋɛ ná-seɠe ɠotai ʋoluʋɛ, é ɠɛ ma: «Geeɠɔlɔgi ɠaaʋɛ ʋɛtɛ, è somideɠaiti gaalu, ni ɗa zoo è ti ɠaalu.» É ɠɛni ma mɔnɔ: «Zekana è-mavofodaiti tiegɔi a ɠɛ la.» 6 Aɓalame laani Ɠɔoɠɔ GALAGI la, naa naa leveni bɛ ga telebodai.

7 É ɠɛni ma: «Nà ɠa gè ga Ɠɔoɠɔ GALAGI, nii é è ɠula Uul taazuʋɛ Kaledee yooi zu, gè niima yooi ve è ya ga ɗɔnɔ.» 8 Aɓalame gooɠaaʋoteni, é ɠɛ ma: «Màliɠii, Ɠɔoɠɔ GALAGI, nà kwɛɛ ɠale ɠiteɠite ga nà sɔlɔɔsu?»

9 GALA ge ɠɛni ma: «Li, è kona saʋagɔ nikɛ ɓeai zo, ta kona saʋagɔ woli zaai, ta kona saʋagɔ ʋaala sinɛ wolai, è kpɔ kpumagoi ʋa, ta poopogi, è ti ɠula ga zalaɠai.» 10 Aɓalame naama zuaiti kpein seɠeni, é ti ʋaliʋali su, é ma zɛʋɛiti gaaʋote ɓɔɠɔ ma, ma ɲɛkpɛ ga fele, kɛlɛ é la ɠɛni wɔniiti baliʋalini su. 11 Sua mii wɔniiti ti ɠɛni ʋuuzu ti-ma ʋoomaiti ma, kɛlɛ Aɓalame ti ɓɛɛni.

12 Foloi liizuʋɛ, ɲiimɛni wolai leʋeni ga Aɓalame, dualuagi so, kpidi ɓɔii ʋɛɛ ma. 13 Ɠɔoɠɔ GALAGI ɠɛni Aɓalame ma: «Suɠwɛɛ ga è-mavofodaiti ta ɠɛ ga seikɔɠɔma nuiti zooi taɠili su, ta ɠɛ ná ga duɔiti, ti ti zopele ɲɔu kona unnaanigɔ (400) laawu. 14 Kɛlɛ nà zii naa lukpɔɠaaleʋe, nii ta duɔlai ɠɛ zeezu, naa ʋoluma, naavolo wolaiti ta yɛ tiya, ti ɠula zeezu. 15 Ɗɔun ɗa, ɗa li è-mɛmɛwolani pɔ ziilɛigi zu, è maa ɠa ɠulu, è ʋɔlɔzaɠaga ʋoluma, undaanɛɛi zu. 16 È-mavofodai ma yamanii naanisiɛi ɠa ʋa ʋolu ʋɛ, mazɔlɔɔ Amɔɔl nuiti ta-vaaɠaaza golai laa la dɛ zeelini.»

17 Siɛgi zu foloi liini la, kpidi ɓɔii ʋɛɛni, diɠii nii é duului ɠulazu, ta sɔmɔgi é zosu, naati ti leʋeni sua ɠaaɠwɛaiti zɔɠɔzuʋɛ. 18 Naama yee ná, Ɠɔoɠɔ GALAGI minazeɠeni Aɓalame ʋɛ, é ɠɛ ma: «Gè niima yooi kpein fea è-mavofodai ʋɛ, é zo Ezipete ɗɛ wolai ma, é zeeli ziɛ wolai Ufelate ma, 19 Ken nuiti ta-yooi, Keenize nuiti, Kademɔn nuiti, 20 Ɠɛte nuiti, Feeleeze nuiti, Leefa mavofodaiti, 21 Amɔɔl nuiti, Kanaan nuiti, Giilegase nuiti, ta Yeeɓuse nuiti.»

<- Zenɛze 14Zenɛze 16 ->