1 Ee, Galate nuiti, ɠimalala nuiti! Ɓɛ ɠa é wo unsuleʋeai, wɔiti Yesu Kilista ɓadɔ vai lɛai ga woye kpezekele saa wului ma? 2 Nà pɔ wo niima vaa ɠila kpegi yɔɠɔzuʋɛ lɛ ga ze: Wo GALA Zɛnvui zɔlɔɔgɛ tɔɔzei wa tɔgi zosu ɓaa, ɓaa tɛi wo Woo Niinɛ Ʋagɔi mɛnigai ta wo la da? 3 Wa ga ɠimalala nu zɛbɛlɛ golaiti ɠana ɓaa? Wo tɔɔzeiɗa ga pagɔ ga GALA Zɛnvui maaʋele, wa pɔ wo gaaɓela ga wa ɓɔɠɔi wa-zobogi maaʋele ɓaa? 4 Nii dɔin wo ziaa su, naa ɠɛa ga wafuun ɓaa? É la zooga ɠɛɛzu ga wafuun. 5 Siɛgi zu GALA ge ná-Zɛnvui veezu la wo ya, é ɗa laavɔɔ vaiti kɛ wo zaama, toɠa naa ɠɛɛzu tɔɔzei wa tɔgi zosu ɓaa, ɓaa tɛi wo Woo Niinɛ Ʋagɔi mɛnigai ta wo la da?

6 Sɛʋɛʋɛ GALA Sɛʋɛi zu ga: «Abalaame laani GALA da, naa leveni bɛ ga telebodai.»[a] 7 À suɠwɛɛ deɠɛmu, ga zɔiti ti laai GALA da, naati ka ti ga Abalaame ná-dointi. 8 GALA Sɛʋɛi kulaʋɛ kɛlɛma ma yeeluɠɔ ga zii ɠiligiti ta ɠɛ ga telebo nuiti GALA gaazu ga kidaaleʋei maaʋele. Naa ɠa é ba, é Woo Niinɛ Ʋagɔi laazeelini Abalaame ma naa luɠɔ ga: «Zii kpein ka tuyai zɔlɔɔ è maaʋele ma.»[b] 9 Naa ma, zɔiti ti laai GALA da, tuya ɠa ti ʋɛ ta kidaaleʋe nui Abalaame.

10 Kɛlɛ zɔiti ti ʋoluzeizu tɔgi zo fai ʋa, naati ta kotoi laawu. Mazɔlɔɔ sɛʋɛʋɛ GALA Sɛʋɛi zu ga: «Naama nui voovooʋɛ, zɔi é la naa pɛ soni, nii é tɔgi ma zɛʋɛi zu, é ʋa ziɛ la.»[c] 11 Naa ɠoleʋɛ ga nu nɔpɛ ge la ɠɛa ga telebo nu GALA gaazu ga tɔgi zogai maaʋele, mazɔlɔɔ GALA Sɛʋɛi ɠɛ: «Zɔi telebogai GALA gaazu ga kidaaleʋei maaʋele, naa ɠa zɛnvui wo.»[d] 12 Kɛlɛ tɔgi la ɠilini kidaaleʋei ʋa. GALA Sɛʋɛi ɠɛ ma: «Zɔi a tɔ gooiti so, naa ɠa ziɛ ga tiye.»[e]

13 Kilista foovooi zɔlɔɔni de-ʋotogi zu, é de unmɔɔ, é de ɠula tɔgi ná-foovooi laawu. Mazɔlɔɔ sɛʋɛʋɛ GALA Sɛʋɛi zu ga: «Foovoo nu ɠa ga naa, nii é zɛlɛni gului ʋa.»[f] 14 Naa ɠɛɛni, naa ɠa a kɛ, tuyai GALA ge ma minazeɠe boni Abalaame ʋɛ, naa ʋa ɠɛ ga zii ɠiligiti tɔnɔ, Yesu Kilista zaalai zu, ga de Zɛnvu Ɲadegai zɔlɔɔ ga kidaaleʋei maaʋele, nii GALA ge ma minazeɠegi woni.

15 Kɛ̀ɛleaiti, nà ɓɔɛzu é lo nuɓusɛiti ta-vai tanigaani ba: Siɛgi zu nui falima woo zɛʋɛi ɓɛtɛzu la ga pagɔ, nu nɔpɛ ge la zooga é ʋa su wooi naa ɠoloɠolo, ɓaa é ʋa ta la ma. 16 Tɔ ma, GALA ge minazeɠegiti boni Abalaame ʋɛ ta mavofodai. GALA Sɛʋɛi la ɠɛni ma: «mavofodaiti», eɠɛ ta ɠɛ ga nu mɔinmɔin, kɛlɛ eɠɛ gila kpe nɔ «è-mavofodai»,[g] naa ɠa é ga Kilista. 17 Wɛlɛ nii gè pɔ gè bo, toɠa ga nii: GALA ge minazeɠegi ɓɛtɛni ga pagɔ. Tɔgi nii seiɗai kona unnaanigɔ kona ʋuusaʋagɔ (430) leʋegai ma, naa la zooga é ʋa GALA ná-minazeɠegi ɠoloɠolo, é ʋa gaaʋala ba. 18 Mazɔlɔɔ ni tɔgi ɠa nu ɠɛni pogani zɔlɔɔsu zea, naazu é la mɔ zɔlɔɔsu minazeɠegi ya. Tama, minazeɠegi maaʋele ɠa GALA ge ná-faanɛɛi ɠɛɛni la Abalaame ʋɛ.

19 Tɔgi zei ungi ɠa ga leeni mu? É zeini, nii a kɛ é naama vaiti dɛɛ, niiti ti la zolooni GALA ziimai ma, é yɛ ná eyɛsu Abalaame mavofodai ʋa, nii minazeɠegi woni ná-faa zu. Geezuɠeelaiti ka ti tɔgi naa veeni, zunu ɠila ge ɠɛ ga zɔɠɔzuɓɛtɛ nui. 20 Tama, zɔɠɔzuɓɛtɛ nui la ga nu ɠila nɔnɔ, kɛlɛ GALA ka ɠila nɔ.

21 Tɔgi ɠa GALA ná-minazeɠegiti daalɔɠɔma ɓaa? Naa li poun! Ni tɔ ge zeini, a zoo é zɛnvui ve nuɓusɛiti zea, naazu nuɓusɛi a la telebodai zɔlɔɔ GALA gaazu ga tɔgi zogai maaʋele. 22 Kɛlɛ GALA Sɛʋɛi ɠa bosu ga eteai pɛ ka kotoi yeezu, naa ɠa a kɛ, minazeɠegi ve ga kidaaleʋei maaʋele Yesu Kilista ma naati zea, niiti ti ɠidaaleʋeai. 23 Aisa kidaaleʋei ʋa ʋa, tɔgi de zoni eɠɛ duɔiti, eyɛsu kidaaleʋei tɔna ɠula kɛlɛma. 24 Deɠɛmu, tɔgi ɠa zɛgai wɛlɛzu ade ma, eyɛsu Kilista ʋa, naa ɠa a kɛ de ɠɛ ga telebo nuiti GALA gaazu ga kidaaleʋei maaʋele. 25 Tɛi niina kidaaleʋei ʋaa, de la mɔ gwɛlɛma nui yeezu.

26 Mazɔlɔɔ wo pɛ wo ɠɛa ga GALA dointi ga kidaaleʋei maaʋele Yesu Kilista ma. 27 Wo pɛ wo ɓatizegɛ ga wo ɠili Kilista ʋa, wo Kilista loa ɠɔba. 28 Zuifu vaa la ba, Gɛlɛki vaa la ba, duɔ vaa la ba, wɔɔlɔ vaa la ba, zunu vaa la ba, anzanu vaa la ba, zeeɠaaɠwɛɛ vaa la su, wo pɛ wa ga ani ɠila kpe nɔ, wa-ɠilibalai zu wa Yesu Kilista. 29 Ni wo ɠɛa ga Kilista nɔnɔiti, naazu wo ɠɛa ga Abalaame mavofodai, wa wɔnɔ zɔlɔɔ naa zu, nii GALA ge minazeɠeai la.

<- Galate 2Galate 4 ->