1 Konagi ma alugi lɔfelasiɛi zeeliai ma, Izilayɛle nuiti kpein ti ɠɛnina zeini ta-laazuʋɛti, ti pɛ ti ɠaalɛɛni ba Zeluzalɛme eɠɛ nu ɠila nɔ. 2 Yosadake ná-doun zunui Zozuwe, ta bɔɔla zalaɠa ɠula nuiti, naa ʋɛɛ Seyalitiyɛle ná-doun zunui Zoloɓaɓɛle ʋa, ta ná-bolodamaiti, ti botii lɔɔzeini, ti ɗa GALA ná-zalaɠa ɠulazuʋɛ lo ʋolu, nii a kɛ ti ɗa gala zalaɠaiti kula ná, ʋelei sɛʋɛai la Moize ná-tɔ sɛʋɛi zu, GALA ná-nui. 3 Anɛɛ ni ti ɠɛni luazu nui naati ba ti ʋaani, ti zei zooi zu, ti ɠɛai ma duɔlai zu, ti zalaɠa ɠulazuʋɛ loni tosu wɔlɔmai nɔ, ti ɗa gala zalaɠaiti kula Ɠɔoɠɔ GALAGI ʋɛ, sobui ta kpɔkɔi. 4 Ti kota vɛtii ɠulani, eɠɛʋelei sɛʋɛai la, ti ɗa gala zalaɠai ɠula folo-o-folo, é zoloo zalaɠai liegi ma nii sɛʋɛai folo ɠilagilagi vaa ma. 5 Naa ʋoluma, ti gala zalaɠai ɠulani folo-o-folo, ta alu toga niinɛi ma vɛti geleiti, ta yeeɠɛɠalai zɔiti pɛ su geleiti ti ga Ɠɔoɠɔ GALAGI nɔnɔ, naa ʋɛɛ niiti kpein ba ti ɠɛɛni vebɛaniiti feezu Ɠɔoɠɔ GALAGI ʋɛ. 6 Alugi lɔfelasiɛi ma volo mɔungi, ti tɔɔzeini ga ti ɗa gala zalaɠaiti kula Ɠɔoɠɔ GALAGI ʋɛ, anɛɛ ni ti la ɠɛni dɛ GALA sei ʋɛlɛi ma ɠɔtu mɔungiti daani. 7 Ti walii veeni kɔtu zaɠa nuiti zea, ta pɛlɛ maalɛɛ nuiti, ti daamianigiti ta kpɔleɓɔle ganigiti ta gulɔi ve Sidɔn ta Tiil nuiti zea, nii a kɛ ti sɛdele gului zeɠe Liɓan, ti da kpoloɗɛi ɠa, ti ʋaa la Zafa. Nii pɛ ge ɠɛɛni ga zobogi maaʋele, nii Pɛɛlese masagi Siluse feeni.

8 Ti zeeliai ma Zeluzalɛme, Ɠɔoɠɔ GALAGI zei ʋɛlɛi ma laazuʋɛ, ta-ɠonagi velesiɛi ta alugi velesiɛi ma, Seyalitiyɛle ná-doun zunui Zoloɓaɓɛle, Yosadake ná-doun zunui Zozuwe ta bɔɔla zalaɠa ɠula nuiti, ta Levi nuiti, é ʋɛɛ niiti kpein ba ti zeɠeni duɔla ʋelei zu, ti ʋa, ti tɔɔzeini ga botii ɠɛa. Ti yeeloni Levi nuɓusɛiti ba, é zo kona ʋuufelegɔ (20) ma, é lɛ zeemaazu, ga ti lo Ɠɔoɠɔ GALAGI zei ʋɛlɛi lo fai luɠɔ. 9 Levi nui Zozuwe ta ná-doun zunuiti, ta kɛɛɠɛlointi, naa ʋɛɛ Kadimiyɛle ʋa, ta ná-doun zunuiti, ta kɛɛɠɛlointi, Wodavia ná-bolodamaiti su, ta Levi nui niiti ti ga Ɠenadade ná-bolodamaiti, ti pɛ ti loni GALA sei ʋɛlɛi ma wotiɠɛ nuiti tuɠɔ.

10 Pɛlɛ lo nuiti ti ɠɛai ma GALA sei ʋɛlɛi ma zeɓasemai laazu, zalaɠa ɠula nuiti ti ʋaani ʋelelaʋɛ, ti maaɠiliai ga ta-zalaɠa ɠula zeɠeiti, puʋugi ti ya, Levi nui Azafe mavofodaiti ti ʋa ga kɔtɛgiti, Ɠɔoɠɔ GALAGI lɛbi vai ma, eɠɛʋelei sɛʋɛai la Davide ʋɛ, Izilayɛle masagi. 11 Ti ɠɛni Ɠɔoɠɔ GALAGI lɛbizu, ti ɗa maamusɛ ga pilima wuyei, ti ɗa ɠɛ ma: «Ɠɔoɠɔ GALAGI ʋagɛ, mazɔlɔɔ ná-wooɠɛɠiladai ɠa yɛsu ná ɠɔ Izilayɛle ʋɛ!» Nuɓusɛiti ɓalaa ti ɠɛni Ɠɔoɠɔ GALAGI lɛbizu ga koozunɛ woo wolaiti, tɔɔzei Ɠɔoɠɔ GALAGI zei ʋɛlɛi ma zeɓasemai laa vai ʋa. 12 Nu mɔinmɔin ge ɠɛni ná, niiti ti ɠɛni ga kɛwolaiti zalaɠa ɠula nuiti, ta Levi nuiti, ta pɛlɛyeɠe ɠundiɠiiti saama, ti GALA sei ʋɛlɛ mɔungi ɠaani, naati ti ɠɛni wɔlɔzu ga gola, siɛgi zu GALA sei ʋɛlɛ niinɛi ma zeɓasemai ɠɛni laazu la ti ɠaazu. Kɛlɛ nu mɔinmɔin kiligaa ti ɠɛni ta-ɠoozunɛɛi ɠulazu kɛlɛma ga kpee woo wolaiti. 13 Tɔ ɠa é ba nu la ɠɛni zooga è ʋa nuiti goo yɔɠɔzuɠula, niiti ti wɔlɔzu, ta niiti ti wooɠulazu ga koozunɛɛi, mazɔlɔɔ ɛsɛ pɛ ge ɠɛni kpee wolai loozu, nu ɗa ti woomɛni ɠoozama.

<- Ɛsedalase 2Ɛsedalase 4 ->