1 Naa ʋolu gè Maliɠii wooi mɛnini, é bo ga woo wola, é ɠɛ ma: «À ʋa, wɔiti wo leveai ga wo potokulai wo taai ma, à wa-ɠɔɔɠɔ zɔɔlaiti seɠe, ada ɠoloɠolo keleiti!» 2 Gè zunu lɔzita ɠaani, ti ɗa ʋa, ti zeɠe ga maazu ʋele ʋɛlɛla ʋelei nu ɠɔʋɛzuʋɛ, ɛsɛ ná-kɔɔɠɔ zɔɔlai zoni zea, ada ɠoloɠolo kelei. Zunui ta ɠɛni ti zaama, maaɠiliai ga geze zeɠei, sɛʋɛ ɠɛ anii ɠɛni ná-saamaɠiligi ʋa. Ti pɛ ti ʋaani, ti lo zalaɠa ɠulazuʋɛ ɠobaʋɛ, é ga kɔlu ɓɔigi. 3 Názu ɠa Izilayɛle ná-GALAGI ná-lɛbiyai wuzeɠeni la, é zeɠe seeluɓɛin maazu, é li GALA sei ʋɛlɛi laaʋɛ. Maliɠii zunui lolini nii maaɠilini ga geze zeɠei, sɛʋɛ ɠɛ anii ná-saamaɠiligi ʋa. 4 Ɠɔoɠɔ GALAGI ɠɛ ma: «Leʋe Zeluzalɛme taazuʋɛ ná pɛ, é poogi ʋɛɛ naati pɛ toʋalaʋɛ, zɔiti pɛ ti kpalagi wosu, ti ɗa ɠaazuɠili tɔɔzei kɔzɔba vaiti ba ti ɠɛɛzu ná.»

5 Naa ʋolu gè goomɛnini, é devei ve zɔiti zea, é ɠɛ ma: «À ʋilɛ zunui tɛi polu, wo taaʋeaiti paa. À mina nu ɠaazumaawɔinɠa, à mina nu makɛ! 6 À ti pɛ paa, wo ti-ma zuwu ɠaaleʋe, kɛwola wɔlɔiti, zinipoiti, anzalopoiti, doungoiti, anzanuiti. Kɛlɛ à mina vɔɔɠu naati ti tanɔpɛ ba, niiti poogi ti-loʋalaʋɛ. À tɔɔzei sèizu ɲadegai ʋa.» Ti tɔɔzeini ga kɛwolaiti ese paa, ti ɠɛni GALA sei ʋɛlɛi laaʋɛ. 7 É ɠɛni ti ma: «À GALA sei ʋɛlɛi ɠɔzɔ, wo ma eteaʋɛ zulaave ga nu ʋoomai, naa ʋolu à li ɠoozama.» Ti liini, ti ɗa nu ʋaai ɠɛ taazuʋɛ.

8 Siɛgi zu ti ɠɛni nuiti paazu la, nà ɠila ko nɔ ɠa gè yɛni loni. Gè looni zooi ma, gè kpeei loo, gè ɠɛ ma: «Ee, Màliɠii Ɠɔoɠɔ GALAGI, è ɗa-yiiɠaawanai lopiga Zeluzalɛme ma, Izilayɛle nui mɔtaiti ti yɛgai, ɗa pɔ è naati ma zuwu ɠaaleʋe ɓaa?» 9 É gòoɠaaʋoteni, é ɠɛ mà: «Kotoiti ti ɠɛɛni Izilayɛle ta Zuda ta-masadai ma ziɛgiti su, ti zuwɔɔlɔni ga gola. Zooi zulaavega ga ɲamaba vaiti, taai zulaave ga telebotala vaiti. Nuiti ta ɠɛɛzu ma: ‹Ɠɔoɠɔ GALAGI ɠɛlɛa zooi ʋa, é la gi ɠaazu pa!› 10 Nà ɓalaagi, gè la ti ɠaazumaawɔinɠaa, gè la ti makɛga, kɛlɛ zɔi soloogai ti luʋa ʋelei ma, naa ɠa nà da ti unma.»

11 Názu zunui maaɠilini ga geze zeɠei, sɛʋɛ ɠɛ anii ɠɛni ná-saamaɠiligi ʋa, é ʋaani, é ná-poluvaawogi wo ga: «Devei è boni mà, gè ti pɛ kɛa.»

<- Ezekiyɛle 8Ezekiyɛle 10 ->