1 Zunui liini ga ze folo ɠulazu ʋele ziɠidaʋɛ. 2 Wɛlɛ, Izilayɛle ná-GALAGI ná-lɛbiyai ɠɛni volozu, é ɗa ʋa, é zeɠe folo ɠulazu ʋelei. Maalugi ɠɛni eɠɛ ziɛ wolaa ta ɠɛ zulusu, é eteai zu ɠɛni kala ga ná-lɛbiyai ma zezei. 3 Kulakɛlɛmai nii ɠulani ga zɔiti niiti gè ti ɠaani ta siɛgiti su GALA ge ʋaani la Zeluzalɛme ɠoloɠolosu, nà la ɠɛna ziɛ wolai Keɓaal laaʋɛ. Gè looni, gè laaʋɛɛ zooi ma. 4 Ɠɔoɠɔ GALAGI ná-lɛbiyai ɠɛni volozu, é ɗa lɛ GALA sei ʋɛlɛi wu ga folo ɠulazu ʋele ziɠida ʋelei. 5 GALA Zɛnvui bùzeɠeni zooi ma, é li ga ze koi zaamaʋɛ. Wɛlɛ, Ɠɔoɠɔ GALAGI ná-lɛbiyai é volozu, naa GALA sei ʋɛlɛi wuulaaveni.

6 Gè nui ta woomɛnini, é ɗa ɓɔɛ pɔ̀, GALA sei ʋɛlɛi wu munu, tama zunui é loni tùɠɔ, naa ɠɛni nɔ kòbaʋɛ. 7 Ɠɔoɠɔ GALAGI ɠɛni mà: «Ɗa ʋe, zunui, ʋɛ ɠa ná ga nà-masa kpɔkpɔgi ʋilɛsuʋɛ, ná ɠa nà ɠɔɠɔaʋɛ ʋɛɛ ná mɛɛ. Nà zei ná Izilayɛle nuɓusɛiti saama eyɛsu ɠɔ. Izilayɛle nuɓusɛiti, ɓaa ta-masagiti, ti la mɔ ɓaaɠulaa dàasei ɲadegai ma ga ta-ɠoloɠologi, ɓaa ta-masagiti ma ʋoomaiti ti laani ta-zalaɠa ɠula adaʋɛti. 8 Ti ta-masa pɛlɛiti ta ma ʋɛlɛla laamasagiti toni GALA sei ʋɛlɛi ɠobaʋɛ, kɛni siɠi koi nɔ ɠa é nà-pɛlɛi ta tɔnɔiti zɔɠɔzu. Ti ɓaaɠulani dàasei ɲadegai ma ga kɔzɔba vaiti ti ti ɠɛɛni. Naa ɠa é kɛɛni, nà-ziiɠaawanai zu, gè ti-ma zuwu ɠaaleʋeni. 9 Niizu ta ta-ɠoloɠolo faiti maaɠooza bà niina, ta ta-masagiti ma ʋoomaiti, nà yɛ zeini ti zaama eyɛsu ɠɔ.

10 «Ɗa ʋe, zunui, GALA sei ʋɛlɛi ɠɛʋelei pɛ dɛɛ ga Izilayɛle nuiti. Ti unfe ga ta-ɠotoiti, ti pɛlɛi lo pelei ma ɠazaʋigi vɛɠɛlɛfɛɠɛlɛ. 11 Ni gaamazu ta unfena ga kɛɛwotii kpein ti kɛɛni, GALA sei ʋɛlɛi lo pelei ma ɠazaʋigi lɛ ga tiye, pɛlɛiti gaaɠwɛɛ ʋelei, nu lɛɛzuʋɛti, ta nu ɠulazuʋɛti, ma ɠazaʋigiti pɛ ʋɔɔma. Ti pɛ dɛɛ ga sɛʋɛi, è tɔgiti da ti ɠaazu, ta deveiti maanɛai ti ɗa ziɛ ga tiye, naa ɠa a kɛ ti ʋilɛ ti ʋolu, ti ziɛ ga tiye. 12 GALA sei ʋɛlɛi ma lɔ golai ɠana, ʋɛ kpein ná ɠakugai GALA sei ʋɛlɛi ma gize unmaʋɛ, à mináti deve ga ada ɲadega wolai. Ungo, GALA sei ʋɛlɛi ma lɔgi ɠana.»

13 «Wɛlɛ zalaɠa ɠulazuʋɛ ma ɠɔɠɔgi ɠa é ɠɛni ga nii, feai é zoloo zeezakpa wolai ma, naa ʋoluʋɛ ɠa ga zeezakpa ɠilagilagi ta logɛ da ga zeelo gilagila. Zeɠei é wɔɔni é ɠaku ma, suzɔligɔi ɠɛni ga zeezakpa ɠila, kogi ɠɛ ga zeezakpa ɠila. Daaɓegi é ɠakuni ma, naa ɠaazɔligɔi ɠɛni ga zeelo gila ta tukpɛ ko. Niima é ɠɛni ga zalaɠa ɠulazuʋɛ ɠaazɔligɔi, 14 é zo zalaɠa ɠulazuʋɛ ɠɔɠɔi ma, nii dɔai zooi wu, é zeeli kɔɠɔ goi ma, naa ɠɛɛni ga zeezakpa felegɔ, naati zɔɠɔzuʋɛ ɠogi ɠɛni ga zeezakpa ɠila, é zo niina ma ɠɔɠɔ goi ma, é zeeli ma ɠɔɠɔ wolai ma, naa ɠaazɔligɔi ɠɛni ga zeezakpa naanigɔ. Naa ʋoluma daaɓegi ma niinɛ ɠili ge loni ba ga zeezakpa ɠila. 15 Zalaɠa ɠulazuʋɛ maazuʋɛ ná ɠɛni ga abu laazuʋɛ, gaaɠoozani é ɠɛ ga zeezakpa naanigɔ, minɛ naanigɔiti ti ɠɛni loni ba maazuʋɛ. 16 Abu laazuʋɛ zakpai ɠɛni ga zeezakpa puugɔ maazu felegɔ (12), kogi ɠɛ ga zeezakpa puugɔ maazu felegɔ (12), é ɠɛni ga seki naanigi, naa pɛ ge ɠɛ tie. 17 Ma ɠɔɠɔi zakpai ɠɛni ga zeezakpa puugɔ maazu naanigɔ (14), kogi ɠɛ ga zeezakpa puugɔ maazu naanigɔ (14). Daaɓegi ɠɛni ba, é ɠaku ma, maazuʋɛ ga zeezakpa lukpɛ, zeɠei é ɠakuni ma, é ɠɛni ga zeezakpa ɠila, nu ɠɔɠɔ ʋilɛsuʋɛti è ʋa lɛ ga, miná ɠaaʋoteni folo ɠulazu ʋelei ma.»

18 É ɠɛni mà: «Ɗa ʋe, zunui, Maliɠii Ɠɔoɠɔ GALAGI wooi ɠaa: ‹Faiti ti zɛʋɛai é lo zalaɠa ɠulazuʋɛ ʋa, yeei é ʋaazu losu da, gala zalaɠaiti ti ʋa ɗa ɠula ná, ɲama ʋili fai ɗa ɠɛ ná, ta ga niiti: 19 Ɗa nikɛ zinɛi ve zalaɠa ɠula nuiti zea, Levi nuiti ti ga Sadɔke mavofodai, ti maaɓuɠazu bà, ti ɗa botii ɠɛ bɛ̀, naa ɠa ti kulazu ga koto gba zalaɠai,› » Maliɠii Ɠɔoɠɔ GALAGI wooi ɠana. 20 « ‹Ɗa ma ɲamai zeɠezu è ta ziɛ zalaɠa ɠulazuʋɛ ma minɛ naanigɔiti ma, ta ma labui velesiɛi zoko naanigɔiti ma, ta daaɓegi ma kakugai ma. Pele ɠana ɗa kotoi gba la zalaɠa ɠulazuʋɛ ʋa, è kàlivaa. 21 Ɗa nikɛ zinɛi naa zeɠezu, kulaai ga koto gba zalaɠai, ti gala eteaʋɛ, GALA sei ʋɛlɛi ma ɠoizuʋɛ ʋoluʋɛ, naa makɛgai naa laama. 22 Poluma zobui, ɗa boli zinɛi zeɠe, nɛɛʋuzu la ba, è kula ga koto gba zalaɠai, zalaɠa ɠulazuʋɛ ɲade da, eɠɛʋelei nɔ é ɠɛɛni la ga nikɛ zinɛi. 23 Siɛgi zu ɗa ɓena da ga koto gba zalaɠai ɠula, ɗa nikɛ zinɛi zeɠe ta baala sinɛ wolai, nɛɛʋuzu mina ɠɛ ti ʋa, ti zogai togani goiti saama. 24 Ɗa ʋa, è ti lɛ ga Ɠɔoɠɔ GALAGI, zalaɠa ɠula nuiti ta kpoloi vaza ti ma, ti ti ɠula ga gala zalaɠai Ɠɔoɠɔ GALAGI ʋɛ. 25 Eyɛsu folo lɔfela, folo-o-folo ɗa ɗa boli zinɛ ɠila kula ga koto gba zalaɠai, è ɗa kɛ ɠana nɔ ga nikɛ zinɛi ta baala sinɛ wolai, nɛɛʋuzu mina ɠɛ ti ʋa, ti zogai togani goiti saama. 26 Folo lɔfela, zalaɠa ɠulazuʋɛ ná-koto gba vai ɗa ɠɛ, é ɲade, é ve GALA bɛ. 27 Folo lɔfelai a ɓena, é lɔɔzei folo lɔsaʋasiɛi ma niina, zalaɠa ɠula nuiti ta zoo niina ti wa-ɠala zalaɠaiti kula zalaɠa ɠulazuʋɛ, ta wa-yiilɛi zalaɠaiti, nà yeezei wo wu naazu,› » Maliɠii Ɠɔoɠɔ GALAGI wooi ɠana.

<- Ezekiyɛle 42Ezekiyɛle 44 ->