1 Ɠɔoɠɔ GALAGI ɓɔɛni pɔ̀, é ɠɛ mà: 2 «Ɗa ʋe, zunui, gòoi laazeeli Izilayɛle ƓALA goo wo nuiti ma, niiti ti GALA gooiti bosu ga ti ɠisu vai nɔ, ɠɛ ti ma: ‹À woilo Ɠɔoɠɔ GALAGI laawooi ma!› 3 Maliɠii Ɠɔoɠɔ GALAGI wooi ɠaa: ‹Maanɔɠɔi ɠa ɠimalala ƓALA goo wo nuiti tuɠɔ, ti ʋilɛgai ti ɓɔɠɔ ɠisiɛiti polu, ti la kulakɛlɛma nɔpɛ kaani! 4 Ee! Izilayɛle, ɗa-ƓALA goo wo nui tɛiti kɛɛʋɛ eɠɛ koʋeiti ti ʋuuni adaʋɛ ná ɠoloɠologai! 5 Wa ʋe, GALA goo wo nuiti, wo la liini wo ʋa lo siɠigi ma yeɠeiti da, wo la siɠigi loni ga wo ʋa Izilayɛle nuiti makɛ, é ʋa lo kpaan kɔɔmaʋɛ, Ɠɔoɠɔ GALAGI ná-ziiɠaawana voloi. 6 Zɛɛ ɠulakɛlɛmai ɠa ti kaazu, ta-vaawokɛɛyeeluɠɔiti ta ga yaava geleiti. Ti ɗa ɠɛ ma: Ɠɔoɠɔ GALAGI wooi ɠana! Tama Ɠɔoɠɔ GALAGI laade é ʋa ti leʋe, ti ɗa ɠito ba ga ti-laawooi ɠa ʋilɛ su. 7 Ta ga zɛɛi, wa-ɠulakɛlɛmaiti wo ti ɠaazu! Ta ga yaavai, wa-ɓɔɛiti wo zezezu ga tiye siɛgi zu wo ɠɛɛzu la ga: Ɠɔoɠɔ GALAGI wooi ɠana, tama nà laade gè ʋa ɓɔɛ!›

8 «Naa ɠa é ba, Maliɠii Ɠɔoɠɔ GALAGI wooi ɠaa: ‹Tɔɔzei wo-laawooi ɠa ga yaava ɓɔɛi, zɛɛ ɠulakɛlɛmaiti ka wo ti ɠaazu, nà ga ʋa wo laalɔɠɔma,› Maliɠii Ɠɔoɠɔ GALAGI wooi ɠana. 9 ‹Nà yeewuzeɠezu GALA goo wo nuiti daalɔɠɔma, ti kpɛtɛ kisu ɠulakɛlɛma vaiti bosu, ti ɗa zɛɛ vaawokɛɛyeeluɠɔ vaiti bo. Seizu la vea ti ʋɛ nà-nuɓusɛiti ta-lotuɠɔiti saama, ti la zɛʋɛa Izilayɛle nuɓusɛiti saama, ti la vɔlɔ ɠalega ma, ti ʋa zeeli Izilayɛle yooi zu. Wa suɠwɛɛ naazu ga nà ɠa gè ga Maliɠii Ɠɔoɠɔ GALAGI. 10 Tɔɔzei ta nà-nuɓusɛiti kakasu, ti ɗa ɠɛ ma: Ziilɛigi, siɛgi zu ziilɛi ge la ná la. Nà-nuɓusɛiti ti siɠigi loni, tiya ma ti kobegi ziɛ ma. 11 Ɠɛ kobe siɛ nuiti ma: Siɠigi ɠa ʋuuzu ya! Sabala golai ɠa ʋaazu, sakɔtui ʋu, fiilɛ wolai tokoleʋe. 12 Siɠigi a ʋuuna ya, ti la wo ɠaazaɠaga ɓaa, ga: Kobegi wo siɛni ma, tosuʋɛ ɠa mini?›

13 «Naa ma ka Maliɠii Ɠɔoɠɔ GALAGI wooi ɠaa: ‹Nà-ziiɠaawanai ɠa lokoleʋezu eɠɛ fiilɛ wolai, nà-ziiɠulagi ʋa eɠɛ sabala golai. Nà sakɔtuiti pu nà-ziimaleʋei zu, ti anii pɛ suɠoloɠolo. 14 Nà siɠigi wolozu, nii wo kobegi ziaai ma, nà faza zooi ma, ma wuulaagi ɠula kɛlɛma. Toɠa ʋu ya, wo undaa ɠa ʋili naama vaiti saama, wa suɠwɛɛ naazu ga nà ɠa gè ga Ɠɔoɠɔ GALAGI. 15 Nà nà-ziiɠaawanai ɠula ɠɔbu ɠana siɠigi laalɔɠɔma, ta zɔiti ti kobegi ziɛni ma. Nà ɠɛ wo ma naazu: Mini ɠa mu siɠigi ná, mini ɠa naama nuiti ti ná, ti ɠɛni kobegi ziɛzu ma? 16 Izilayɛle ƓALA goo wo nui tanɔpɛ ge la mɔ ná, tɛiti ti ɠɛni ɓɔɛzu é ʋilɛ Zeluzalɛme ʋa, ti ɗa ná-ziilɛigi ma vai wo, siɛgi zu ziilɛi ge la ná la!› Maliɠii Ɠɔoɠɔ GALAGI wooi ɠana.»

17 «Ɗa ʋe, zunui, ɓɔɛ anzanuiti pɔ ɗa-nuɓusɛiti saama, ti kulakɛlɛma vaiti bosu ga ti ɠisu vai nɔ, GALA gooi wo ti laalɔɠɔma, 18 ɗa ɠɛ ti ma: ‹Maliɠii Ɠɔoɠɔ GALAGI wooi ɠaa: Maanɔɠɔi ɠa zeelizu wo ma, wɔiti wo seɠe zakpaiti zeeɠɔdaʋɛti pɛ puuzu, wo bɔɔlɔgi ɓɛtɛ nui ma zii zɔligɔi pɛ bɛ, wo vɔni ti-yɛnvui ma! Wo wɔinni wo nà-nuɓusɛiti zɛnvui ɠɛ ga wɔnɔ, wo wɔnɔ ma yɛnvui makɛ? 19 Wa ɓaaɠulazu mà nà-nuɓusɛiti gaazu ga moloi ma yeelaavegi ta ɓulu ɓuɠaiti, wo ɗa nuiti paa, maa la nɛɛni ti ʋa za, wo ɗa naati zɛ vulua, niiti ti maa la nɛɛni ti ʋa yɛ vulua, siɛgi zu wo zɛɛi wosu da nà-nuɓusɛiti ma, ti ɗa woilo ma.

20 « ‹Naa ɠa é ba, Maliɠii Ɠɔoɠɔ GALAGI wooi ɠaa: Nà wa-zeɠe zakpaiti daalɔɠɔma, wo nuiti sosu da eɠɛ wɔniiti. Nà ti ʋalizu ga gè ti ɠula wo-yeeɠɔdaʋɛti, gè nuiti fie, wo ti zosu balii ɠa, ga ti ɠoʋe eɠɛ wɔnia. 21 Nà wa-wɔɔlɔgiti balizu ga gè nà-nuɓusɛiti fie, ti ɠula wa-zobogi wu. Wo la mɔ zooga wo ʋa ti zo ga baliiti. Wa suɠwɛɛ naazu ga nà ɠa gè ga Ɠɔoɠɔ GALAGI. 22 Wa telebo nuiti iɲɔteʋezu ga wa-yɛɛ wogaiti, niiti gè la ɠɛni faa ɲɔu ɓɛtɛni ti laalɔɠɔma, wo faa ɲɔu ɠɛ nuiti iɲɔdɔ, ti yɛ ti-ziɛ ʋele ɲɔi ʋolu ti-yɛnvui undaaʋili fai zu. 23 Naa maaʋele ma, wo la mɔ kisu ɠulakɛlɛma ɠaa, wo la mɔ ɓɔɠɔ lɔa ungaiziɛ wo faa zu. Nà nà-nuɓusɛiti unmɔɔsu, gè ti ɠula wa-zobogi wu. Wa suɠwɛɛ naazu ga nà ɠa gè ga Ɠɔoɠɔ GALAGI.› »

<- Ezekiyɛle 12Ezekiyɛle 14 ->