Ɛgezɔde 3

Moize loli fai GALA bɛ

1 Moize ɠɛni nɛkoi Zeetelo ná-togani ɓulugi makɛsu, nii é ɠɛni ga zalaɠa ɠula nui Madiyan yooi zu. É liini ga togani ɓulugi teʋebai ʋolu ʋelei, eyɛsu é li GALA ná-gizei ma, Ɠɔɔlɛɓe. 2 Ɠɔoɠɔ GALAGI ná-geezuɠeelai ɠulani bɛ kɛlɛma abuzogi zaama, kpɔvɔ goi zaamaʋɛ. Moize wɛlɛni, pɛtɛ, abui soni kpɔvɔ goi ʋa ná kpein, kɛlɛ kpɔvɔ goi la ɠɛni ɠalazu ɲɛgɛlɛin. 3 Moize ɠɛni ma: «Nà latisu, gè li, gè niima laavɔɔ vaa wolai ɠa, lee vaa zu kpɔvɔ goi la ɠalazu ɲɛgɛlɛin.» 4 Ɠɔoɠɔ GALAGI kaani ga toɠa na lati ga é ná ɠa. GALA ge yɛni kpɔvɔ goi zaamaʋɛ, é toli, é ɠɛ ma: «Moize! Moize!» É gooɠaaʋoteni, é ɠɛ ma: «Nà ɠaa!» 5 GALA ge ɠɛni ma: «Mina maaɓuɠa ʋɛ ʋa, ɗa-zaʋalagiti kula ɠɔɠɔa, mazɔlɔɔ adaʋɛ ʋɛ è loni ná, zou ʋe gè maaɲɛɛ ʋɛai ba.» 6 É ɠɛni ma ʋolu: «Nà ɠa gè ga è-ɠɛɛ ná-GALAGI, ta è-mɛmɛwolani Aɓalaame, Izaake, ta Zakɔɓe ta-ƓALAGI.» Moize ɠaazuʋɛ lɔɔɠuni, mazɔlɔɔ é ɠɛni luazu ga é mina wɛlɛ GALA ba.

7 Ɠɔoɠɔ GALAGI ɠɛni ma: «Gè nà-nuɓusɛiti ta-ɓɔlɔi ɠaa Ezipete yooi zu, gè ta-ɓee wooi mɛniga, ti toozu ta-wɛlɛma nuiti zea, gè ta-ɓɔlɔi ɠwɛɛ. 8 Gè ʋaa ga gè ti unmɔɔ, gè ti ɠula Ezipete nuiti zea, gè lɛ ga tiye zou ʋagɔi zu, suwɔɔlɔai, ʋɛ nɔnɔi ta kɔin gulɔi ʋooʋaai ná, zooi nii Kanaan nuiti ti zeini su, ta Ɠɛte nuiti, ta Amɔɔl nuiti, ta Feeleeze nuiti, ta Ɠeeve nuiti, ta Yeeɓuse nuiti. 9 Niizu Izelayɛle nuɓusɛiti ta-ɓee wooiti ti zeelia mà, gè nimizai ɠa, nii Ezipete nuiti ti seizu ti ma. 10 Naa ɠa é ba, nà è leʋesu Falaɠɔn ʋɔ bɛ, è nà-nuɓusɛi Izelayɛle nuiti kula Ezipete yooi ʋa.»

11 Moize ɠɛni GALA ma: «Ɓɛ ɠa é ga ze, gè liizu Falaɠɔn ʋɔ bɛ, ga gè Izelayɛle nuɓusɛiti kula Ezipete yooi ʋa?» 12 GALA ge ɠɛni ma: «Nà ɠɛ è ʋa, wɛlɛ nii é ɠɛɛzu ga poogi ga nà ɠa gè è leʋesu: Siɛgi zu ɗa nuɓusɛiti kulana la Ezipete yooi ʋa, wa nɔkɔ bù gizei nii ma.»

13 Moize ɠɛni GALA ma: «Nà liizu Izelayɛle nuɓusɛiti pɔ bɛ, gè ɠɛ ti ma: ‹Wo-mɛmɛwolani ta-ƓALAGI tèʋegɛ wo ʋɔ bɛ.› Kɛlɛ ni ta gàazaɠana ga ‹daasei ka lee?› Nà ti wooɠaaʋote ɠale?»

14 GALA ge ɠɛni Moize ma: «Nà ga naa, nii é ná.» É ɠɛni ma mɔnɔ: «Pele ɠa ɗa Izelayɛle nuiti gooɠaaʋote da: ‹Zɔi é lolisu ga: Nà ná, naa ɠa é tèʋegai wo ʋɔ bɛ.› » 15 GALA ge ɠɛni Moize ma mɔnɔ: «Ɗa ɓɔɛ ɠani Izelayɛle nuiti pɔ: ‹Ɠɔoɠɔ GALAGI, é ga wo-mɛmɛwolani Aɓalaame, Izaake, ta Zakɔɓe ta-ƓALAGI ɠa é tèʋegai wo ʋɔ bɛ.› Dàaseigi ɠana eyɛsu ɠɔ, pele ɠana gè pɔ ga ti ɗa wooɠula mà la, yeeɠɛɠalaiti pɛ su. 16 Li, è Izelayɛle ɠɛwolaiti gaalɛ ba, è ɠɛ ti ma: ‹Ɠɔoɠɔ GALAGI, wo-mɛmɛwolani ta-ƓALAGI ɠulaʋɛ bɛ̀ kɛlɛma, nii é ga Aɓalaame ná-GALAGI, ta Izaake, ta Zakɔɓe. É ɠɛ ma: Gè wɛlɛa wo ma, gè naa ɠaa gaamazu, nii ti daazu wo ma Ezipete yooi zu. 17 Gè devea ga nà ʋaazu lɛɛzu ga woye, gè wo ɠula Ezipete yooi ʋa, ʋɛ wo ná kpɔlɔi zu, gè li ga woye Kanaan nuiti ta-yooi zu, ta Ɠɛte nuiti, ta Amɔɔl nuiti, ta Feeleeze nuiti, ta Ɠeeve nuiti, ta Yeeɓuse nuiti, ʋɛ nɔnɔi ta kɔin gulɔi ʋooʋaai ná.› 18 Ta woilo è-woo ma. Ɗa-o, Izelayɛle ɠɛwolaiti-yo, wa li Ezipete masagi ʋɔ bɛ, wo ɠɛ ma: ‹Ɠɔoɠɔ GALAGI, Eɓulu nuiti ta-ƓALAGI ʋaaʋɛ gi ʋɔ. Va bu niizu, gi folo saʋagɔ ziɛ wo teʋebai zu, ga gi li, gi zalaɠaiti kula Ɠɔoɠɔ GALAGI ʋɛ, é ga gá-ƓALAGI.› 19 Gè kwɛɛni ga Ezipete masagi la ʋaazu yeeɓesu wo ʋa, wo ʋa li, ni naa la ɠɛɛni ga zeemaɓai. 20 Nà yeemaalesu, gè Ezipete yooi loɠa ga maaɓɛlɛ vai ma ziiti kpein, gè ʋaazu kɛɛzu ti zaama. Naa ʋoluma, toɠa ʋaazu yeeɓesu wo ʋa, wo li. 21 Nà fai ta ɠɛ, nii a kɛ niima nuɓusɛiti ti ɠaazu unfe sɔlɔɔ Ezipete nuiti gaazu. Siɛgi zu wo ʋaazu liizu la, wo la lia ga yeaɲaka ɲɛgɛlɛin. 22 Izelayɛle anzanui ɠilagilagi ɠa wali aniɲakaiti, ta zanu aniɲakaiti, ta seɠeiti fali seiɲɔɠɔi ma, ta naama anzanui ma, nii é ná-pɛlɛi wu, wo wo-loun zunuiti ta wo-loun anzanuiti maaɠili la. Wa ti ɠula Ezipete nuiti zea, wo ti maavo.»

<- Ɛgezɔde 2 Ɛgezɔde 4 ->