1 Alu puugɔ maazu velesiɛi (12) daa ga Adaal, naa ma volo puugɔ maazu saʋagɔi (13), voloi maanɛɛni la ga ti masagi ná-sɛʋɛi zu wooi zu vai ɠɛ, Zuifuiti sili nuiti ki ge ɠɛni ba ga ta ziɛzu ti wu, kɛlɛ fai pɛ ge valiboni, Zuifuiti mu ka ti ziɛni ti zili nuiti bu. 2 Masagi Zɛɛlesɛse ná-zooi zu ná pɛ, Zuifuiti ti ɠɛni ɠaalɛɛzu ba taa wolaiti su, ʋɛti ti ɠɛni zeini ná, ti ɗa vala naama nuiti ba, niiti ti yaavai ɠilini ti ma, ti zuwuɠaaleʋe vai zu. Nu nɔpɛ ge la ɠɛni zoosu é ʋa lo Zuifuiti tuɠɔ, tɔɔzei dualuagi lɔɔni ɛsɛ pɛ kɔlɔ su, é ʋilɛ Zuifuiti ba. 3 É zo botiɠɛ nu wolaiti ma, é li masagi ná-nu wolaiti pɔ, ta zou zɛʋɛ ɠundiɠiiti, naa ʋɛɛ masagi ná-botiɠɛ nuiti pɛ ba, ti loni Zuifuiti ta-ɠakei ɠa, mazɔlɔɔ ti ɠɛni wola luazu Maledosé ʋa. 4 Gaamazu Maledosé ɠɛni ga tosuba nu wola masa pɛlɛi wu, ná-tɔɠɔɠulagi maawooi zeelini zooi kpein su, mazɔlɔɔ ta ɠɛni liizu nɔ ga ɓɔga zunui tɛi tosuʋɛ ʋa. 5 Zuifuiti ti zooni ti ti-ɓɔɛɲɔɠɔiti so ʋelei ti pɔ la, ti ɗa ti zili nuiti paa ga boɠa zɔkpɔi. Naa ɠɛni ga nu ʋaa wolai. 6 Suze taa wolai zu ɠila nɔ, zunu undɔɔlugɔ (500) ɠa ti paani miná, 7 Ɠamedata ná-doun zunui Aman, nii é ɠɛni ga Zuifuiti sili nui, ti naa ná-doun zunu puugɔi niiti paani: Palesandata, Dalafon, Asapata, 8 Polata, Adalia, Alidata, 9 Palemaseta, Alizayi, Alidayi, Vayezata. 10 Ti naati paani, kɛlɛ ti la ɠɛni nu ɠɔli seɠeni ga maaɓaai.

11 Naama voloi nɔ masagi nui liegɔi ɠwɛɛni, nii é zaani Suze taa wolai zu. 12 Masagi ɠɛni anzai Ɛsetɛɛl ma: «É ɠwɛ ga Suze taa wolai zu ɠila nɔ, Zuifuiti ti nu undɔɔlugɔ (500) ʋaa, ta Aman ná-doun zunu puugɔiti. Ta ɠɛ nu mɔinɗa ʋaani sɛi zou ɠoozu laaiti su! Kɛlɛ naa pɛ poluma, leeni ɠa é ga è ɓɛdɛma vai? Nà gaaɠula ba. Ɓɛgele ɠa è falizu? Nà fe ʋɛ.» 13 Ɛsetɛɛl ɠɛni masagi ma: «Masagi, ni ɗa vaana bu, è kɛ, nà pɔ ga zobogi ve Zuifuiti bɛ, ti Suze taa wolai zu, ti kɛ mɔnɔ lina ʋelei ti kɛai la za, é zoloo tɔ sɛʋɛi ma, nii sɛbɛi ba za. Naa ʋoluma va bu, ti Aman ná-doun zunu puugɔiti ma ʋoomaiti sɛlɛ gului ʋa.» 14 Masagi ɠɛni ma: «É ɠɛ ɠana.» Tɔ sɛʋɛ niinɛi ɠulani, ti kala Suze taazuʋɛ, ti Aman ná-doun zunu puugɔiti ma ʋoomaiti sɛlɛni gului ʋa. 15 Zuifuiti ti ɠɛni Suze, naati ti ɠaalɛɛni ba ʋolu poluma voloi alugi Adaal ma volo puugɔ maazu naanigɔi (14) ma, ti zunu unsaʋagɔ (300) ʋaa, kɛlɛ ti la ɠɛni nu ɠɔli seɠeni ga maaɓaai.

16 Zuifui zɔiti ti ɠɛni zou ɠoozuʋɛ, naati ti ɠaalɛɛni ba, ti ɓɔɠɔ maaɠɔkɔ ti zili nuiti daalɔɠɔma. Nu waaʋuulɔfela maazu lɔɔlugɔ (75.000) ɠa ti paani, kɛlɛ ti la naati kɔli seɠeni ga maaɓaai. 17 Niima vai kpein ge ɠɛɛni alugi Adaal ma volo puugɔ maazu saʋagɔi (13) ma. Ti looɠoni nu ʋaai ʋa ma volo puugɔ maazu naanigɔi (14) ma, ti fɛtii ɠulani naama voloi nɔ. 18 Zuifui niiti ti ɠɛni Suze, naati ti ɠaalɛɛni ba alugi ma volo puugɔ maazu saʋagɔi (13) ta maazu naanigɔi (14) ma, ti looɠo ma volo puugɔ maazu lɔɔlugɔi (15) ma. Naama voloi ɠa ti fɛtii ɠulani ma. 19 Naa ɠa é kɛa Zuifui niiti ti zou ɠoozu laaiti su, ta ɗa fɛtii ɠula la ga koozunɛɛi, ti ɗa vebɛaniiti teʋe ɓɔɠɔ ma ti ɠilagilagi, alugi nii daa ga Adaal naa ma volo puugɔ maazu naanigɔi (14) ma.

20 Maledosé niima vaiti kpein puuni sɛʋɛ ma, é teʋe Zuifuiti kpein ma, ti ɠɛni masagi Zɛɛlesɛse ná-zooi zu, ɓuɠama ta ɠoozama. 21 É ɠɛni ti ma, ti pɛ ti ɗa fɛtii ɠula kona-o-kona, alugi daa ga Adaal, naa ma volo puugɔ maazu naanigɔi (14) ta maazu lɔɔlugɔi (15) ma. 22 Mazɔlɔɔ naama voloiti su ɠa Zuifuiti ti wanaɠulani la ti zili nuiti ba, naama alugi ma ɠa ta-yiizoolɛi latini la ga koozunɛɛi, ta-maanɔɠɔi lati ga undaanɛɛi. Naa ɠa é ba, kɛni ta la ɠizɛ naama vaiti su, ti fɛtii ɠula ga koozunɛɛi, ɛsɛ ge ɗa faaɓɔɠɔi ɠɛ seiɲɔɠɔi ʋɛ, ta ti ɗa vebɛaniiti fe bala nuiti bɛ.

23 Zuifuiti ti yeezeini devei naati bu, Maledosé ti veeni, ti va bu ga fɛtii nii ti kulaai feya, naa ɠɛ niina ga ti-ɠɛɛwotii, kona nɔpɛ. 24 Mazɔlɔɔ Ɠamedata ná-doun zunui Aman, Agage mavofodai, nii é ɠɛni ga Zuifuiti kpein sili nui, deveni ga é Zuifuiti undaaʋili. Ti kpakui looni, nii a kɛ ti kui lɛ, nii Zuifuiti suwuɠaa a leʋe ma. 25 Kɛlɛ Ɛsetɛɛl liai ma, é bo masagi, naa devei woni, ti sɛʋɛ ga faa ɲɔi nii Aman ɠɛa kpɛtɛni Zuifuiti daalɔɠɔma, naa yɛ ga, ma Aman, naa ʋoluma ti sɛlɛ gului ʋa, ta ná-doun zunuiti. 26 Naa ɠa é kɛɛni ti naama vɛti voloiti daasei pɛai la ga «Pulime», é zoloo Pɛɛlese gooi naama nii poluʋɛ ga «kpakutoomai». Naama vaiti maaʋele ma niiti Maledosé ti woni sɛʋɛi naa zu, ta nii kpein Zuifuiti ti kaani, ta nii é zeini ti ma tiya ɓɔɠɔi, 27 ti tɔgi zeini ɓɔɠɔ ma, nii é la zeɠea ma ti ʋɛ, ta ti-mavofodaiti bɛ, ta nuiti kpein bɛ niiti ta ɓɔɠɔ ɠɛ ga Zuifui ta. Tɔgi naa zu levei ɠɛni ga ti fɛtii ɠula gaazazu nɔpɛ ge mina ɠula ba naama volo felegɔiti su ti lɛai, ʋelei Maledosé bogai la, kona-o-kona. 28 Ʋelela ʋele yeeɠɛɠalaiti kpein su nuɓusɛiti maanɛɛni ga ti ɗa Pulime vɛtii ɠula kona nɔpɛ, yeeɠɛɠalai ɠilagilagi pɛ su, Zuifuiti ta-ʋɛlɛyeɠei ɠilagilagi kpein bu, ta masagi ná-zou zɛʋɛ wolai ɠilagilagi pɛ su, ta taa wolai ɠilagilagi pɛ su. Zuifuiti ta ti-mavofodaiti ti mina naama vɛtii zeɠe ma, ti mina yeema naama vaiti kpein ma niiti ti ɠɛai.

29 Aɓiyayile ná-doun anzanui Ɛsetɛɛl, nii é ɠɛni ga masagi anzai, naati ta Zuifui Maledosé ti sɛʋɛi ɠɛɛni ga ta-zobogi pɛ, ti Pulime vɛti naa maaɓakpa. 30 Sɛʋɛ niinɛi naati ti leʋeni Zuifuiti kpein ma, niiti ti ɠɛni masagi Zɛɛlesɛse ná-zooi ma you zɛʋɛ ungila puufele maazu lɔfelaiti (127) kpein su. Naama zɛʋɛiti su ziilɛi kpɔɛiti ta undaanɛ ɓɔɛiti ka ti boni Zuifuiti ma. 31 É woni Zuifuiti ma ga ti Pulime vɛtii ɠula ku logai ma, é zoloo devei naati ma, nii Ɛsetɛɛl ta Maledosé ti bogai, devei naa woni Zuifuiti bɛ ta ti-mavofodaiti bɛ, ga ti zugiti so ta ti kpeeiti too. 32 Ɛsetɛɛl ná-devei niiti maaʋele ɠa Pulime vɛti lɔɔzeiɗai la, naa zɛʋɛʋɛ sɛʋɛi zu.

<- Ɛsetɛɛl 8Ɛsetɛɛl 10 ->