Tɛnɛbo Nui 7

Ziimazeɠe pagɔi maalɛlɛ vai

1 Lɔɠɔ ʋagɔi vizɔgɛ gulɔ maku nɛɛnɛgi ʋa,

nui zaa voloi ʋagɛ, é leʋe sɔlɔɔ foloi ʋa.

2 Fizɔgɛ nu li saa wɔlɔ wo pɛlɛi wu,

è mina li fɛti ɠula ʋɛlɛi wu.

Saai ɠa é ga ɛsɛ pɛ gaaɓelazuʋɛ,

ta fizɔgɛ ga ɛsɛ pɛ ge ɠizɛ su.

3 Gaazuɠilii vizɔgɛ ɲɛɛi ʋa,

toɠa ɗa nui ɠaazuʋɛ ɲɔu, kɛlɛ ziimaʋɛ ʋagai.

4 Ɠima nui ná-kisiɛi ɠa ɗa ɠɛ saa wɔlɔ wo pɛlɛi wu,

ɠimalala nui ná-kisiɛi ɠɛ koozunɛ ʋɛlɛi wu.

5 Fizɔgɛ nu woilo ɠima nui ná-zelilomai ma,

è mina woilo ɠimalala nuiti ta-maamusɛi ma.

6 Mazɔlɔɔ ɠimalala nui ná-ɲɛɛi ɠulaʋɛ ga kpataɠalagi ɠala lugi diɠii wu.

Naa ɓalaa ka ga wafuun faa nɔ.

7 Telebotalai ɠa ɗa ɠima nui ɠɛ ga ɠimalala nui,

vebɛanii ɠa ɗa nu ɠɛ ga sɔletala nui.

8 Fai ɠaaɓelasu vizɔgɛ tɔɔzeizuʋɛ ʋa,

fizɔgɛ nu è maaɓɔungi wo, kɛlɛ è mina ɠɛ ga waso nu.

9 È-yii mina ɠula fala,

ɠimalala nuiti nɔ ɠa ti-yii ɠa ɗa ɠula valafala.

10 Mina ɠɛ ma: «Leeni ʋe mɔun foloiti pagai niizu geleiti ba?»

Mazɔlɔɔ ɗa-ɠaazaɠagi naa la ga ɠima ɠaazaɠa.

Ɠimalai ná-faa ʋagɔiti

11 Ɠimalai vizɔgɛ pogani ʋa, ɛsɛ pɛ ná-kulanuma ɠa su. 12 Ɠimalai ɠa nui makɛsu ga ʋelei walii kɛɛzu la, kɛlɛ kulanuma ɠa ɠimalai ʋa, naa ɠa ga toɠa ɗa naama nui yɛnvui makɛ, nii é zea.

13 GALA ná-kɛɛwotiiti pɛtɛ dɛɛ, ɓɛ ɠa a naa zɔle, nii é kpiligai? 14 Ɠoozunɛ undaanɛ voloiti su, kpalai ɠa ʋaana, ɠisiɛ. GALA ge naama vaa zeizu felegɔiti pɛ kɛɛʋɛ, naa ɠa a kɛ, nuɓusɛi de mina kwɛɛ, nii é de luɠɔ.

15 Etea wafuungi nii gè kɛa, gè kaaʋɛ ga fai pɛ ka zoo ɠɛɛzu. Nui ɠa zaazu, anɛɛ ni telebogɛ, taɠili sii zuɠooza, anɛɛ ni siliʋɛ. 16 Ɗa-lelebodai mina leʋe kɛɛzu ʋa, ɗa-ɠimalai mina leʋe kwɛsuʋɛ ʋa. Leeni vaa zu ɗa li ɓɔɠɔ ɠoloɠolosu? 17 Mina zili, è ʋa leʋe kwɛda ʋa, mina ɠɛ ga ɠimalala nu. Lee ʋe ɗa li zaazu ma yeeluɠɔ? 18 Pagɛ ga è tɛnɛ goo felegɔi naati so, mazɔlɔɔ zɔi é luazu GALA ba, toɠa ziɛ ga ti felegɔ pɛ.

19 Ɠimalai ɠa ɗa ɠima nui zɛbɛi wɔɔlɔ, é leʋe kundiɠi puugɔ ʋa, ti taa ɠilagi zu.

20 Gaama ɠa ga naa, ga nu vulu nɔpɛ ge la pɔlɔʋɔlɔi maazu nii telebogai, é la koto ɠɛa.

21 Mina woilo wooi kpein ma, nuiti ti bosu, naa ɠa a kɛ è mina ʋa ɗa-wotiɠɛ nui woomɛnisu, é ʋa ɗa woo ɲɔi wo è ma. 22 Mazɔlɔɔ è kwɛni ga ná zeizu ɠɛa mɔinmɔin, ɗa ɓalaa è ɗa kpɔɛ ɲɔiti bo zɔiti ma.

23 Gè naa kpein poluʋɛtɛni ga ɠimalai, gè ɗa ɠɛ ɓɔɠɔ ma: «Nà ɠɛɛzu ga ɠima nu,» kɛlɛ ɠimalai mu maaɠoozaʋɛ bà. 24 Faiti gaaɠa vai maaɠoozaʋɛ nui ʋa, kpoma ɠoozaʋɛ, kpoma ɠooza ʋelei ma ga gola, nu la zooga zeelizu ma. 25 Gè ɠaaɓaani ga zìi pɛ, nii a kɛ gè ɠimalai maalɛlɛ, gè gaiziɛ, gè poluɠa, gè ɠɛ faiti kɛ ungi ɓalaa kwɛɛ, gè gaaɠa ɓalaa ga faa ɲɔi ɠa ga ɠimalala vaa, ta ɠimalalai ɠa ga ɓoloɠa vaa. 26 Gè fai ta ɠaaʋɛ ga wanai, é leʋe saai ʋa, naa ɠa é ga: anzanui nii zii ga balii ta tumɔi, zeeiti ti ga kɔlu yɔlɔɠɔi. Nui nii é luazu GALA ba, naa ɠa ɗa maala, kɛlɛ kotoba nui ɠa ɗa li, é lɔ zea.

27 Tɛnɛbo Nui ɠɛ ma: «Gè faiti pɛ pɛtɛgɛ ga gilagila, pɛtɛ nii gè kaai: 28 Tɔun vɔlɔ nà dɛ gaiziɛzu, tama gè la dɛ kaani, gè unfema zunu ɠila kaaʋɛ zunu waagila (1.000) saama, kɛlɛ gè la dɛ gila kpalaa kaani anzanuiti kpein saama. 29 Faa ɠila kpegi gè gaaɠaai, naa ɠa ga nii: GALA ge nuiti kpɛtɛʋɛ, ti zɔlegai, kɛlɛ tiya ɓɔɠɔi ti faazupuiti gaiziɛʋɛ ga mɔinɗa.»

<- Tɛnɛbo Nui 6 Tɛnɛbo Nui 8 ->