1 Gè ɠɛni ɓɔɠɔ ma: «Li mu, è ziimaɠɛɛi ʋoluʋɛtɛ, è undaanɛɛi ɠaiziɛ, è ka!» Gè kaani ga naa ɓalaa ka ga wafuun faa nɔ. 2 Gè ɠɛni ma: «Ɲɛɛi ɠa ga ɠimalala vaa, ziimaɠɛɛi la faa nɔpɛ paa nu ma.» 3 Gè yiimazeɠeni ga gè ɓɔɠɔ ve dɔɔ ɓɔɔlei ya, gè ʋokɔɠɔ ɠimalalai nuiti ma, kɛlɛ nà ma, gè ɗa ziɛ ɠimalai zu. Gè ɠɛni pɔ gè naa ɠaaɠa, nii pagai nuɓusɛi ma ga é kɛ ná-eteai zu geeɠɔlɔgi wu.

4 Gè boti wolaiti kɛɛni, gè pɛlɛiti to ɓɔɠɔ ʋɛ, gè leezɛn ɓeleiti da. 5 Gè kpeleiti tɛɛni, ta gulu ɓeleiti, gè gwaa wului ma zii pɛ sin ná. 6 Gè ziɛyeɠeiti bɔɔni, ti zu ɗɛi ɗa ʋu gulu ʋɔnɔ dɔɓɔi ma.

7 Gè duɔiti geyani, zinɛiti ta anzaiti saama, ta botiɠɛ nuiti ti ɠɛni zèa. Gè togani wolaiti ta ma goiti sɔlɔɔni ga mɔinɗa, é leʋe naati kpein ba, ti leʋegai tùɠɔ Zeluzalɛme. 8 Gè walii ta zanugi ɠaalɛɛni ba, nii é ɠɛni ɠulazu masagiti zea, ta zooi niiti gè ɠɛni ti unda. Gè guye loo nuiti sɔlɔɔni, zinɛiti ta anzaiti saama. Gè naa zɔlɔɔni, nii é ga zinaa kpein ziima vaa, ànzai wola mɔinni.

9 Gè ɠɛni ga nu wola, ɠaazu unfegi ɠɛ bɛ̀, é leʋe naati kpein ba, ti leʋegai tùɠɔ Zeluzalɛme. Nà-ɠimalai yɛni bà naa kpein su. 10 Nii kpein nà la ka, wɔin sò, gè la ɠɛlɛni tanɔpɛ ba. Ziimaɠɛɛi la yɛni, nii gè la feeni zìi ya. Gaamazu gè koozunɛɛi zɔlɔɔni nà-botiiti kpein faa zu, naa ɠa kɛai ga tɔnɔgi gè sɔlɔɔni nà-botiiti kpein su. 11 Gè botii naati kpein pɛtɛni, niiti gè ti ɠɛɛni, ta kpɔlɔi nii kpein gè suzoni, gè ʋa ti ɠɛ. Gè pɛtɛni ga naa kpein ka ga wafuun faa nɔ, eɠɛ nu ɠa ɠɛ ɓizɛzu fiilɛi ʋolu ga é so. Kulanuma ɓɔɠɔɓɔɠɔ ge la nuɓusɛi ʋɛ zooi ɠa.

12 Naa ʋoluma, gè deveni ga gè ɠimalai ɠwɛɛ ta ɠimalalai. Mazɔlɔɔ zɔi é ʋaazu maavalibosu masa kpɔkpɔgi ɠa, lee ɠili ka é ʋaazu kɛɛzu, é ɠula naa ʋolu, nii kɛai niina?

13 Gaamazu kulanuma ɠa ɠimalai ʋa, é leʋe ɠimalalai ʋa, ʋelei nɔ kulanumai wozakalagi ʋa la, é leʋe kpidii ʋa. 14 Mazɔlɔɔ ɠima nui ɠaazu ɠa diizuʋɛ ʋa, kɛlɛ ɠimalala nui ɠa ziɛzu kpidii zu. Tama, gè pɛtɛgɛ ga ti-ɠaaɓelazuʋɛ ɠa ga faa ɠila nɔ. 15 Gè ɠɛni ɓɔɠɔ ma: «Tɛi nɔ̀un gàaɓelazu ga ɠimalala nui ɠɛʋele, kulanumai ɓɛgele ɠa gè sɔlɔɔgai ɠimalai ʋa?» Gè ɠɛni ɓɔɠɔ ma: «Naa ɓalaa ka ga wafuun faa nɔ.» 16 Mazɔlɔɔ nu la ʋaazu ɠizɛsu ɠima nui ɠɛɛ vaiti su, é ʋa leʋe ɠimalala nui nɔnɔiti ba, ti felegɔ pɛ zeemai ɠa wosu ti ma. Tɔɔzei ɠima nui ɠa zaazu ga ɠimalala nui ɠɛʋele.

17 Gè tɔɔzeini naazu ga zɛnvui wɔinzeɠea, mazɔlɔɔ nii kpein nuiti ti kɛɛzu zooi ɠa, tanɔpɛ ge la ʋani gàazu, tɔɔzei fai kpein ka ga wafuun faa nɔ, eɠɛ nu ɠa ɠɛ ɓizɛzu fiilɛi ʋolu ga é so. 18 Botii kpein wɔinzeɠea mà, nii kpein kpɔ̀lɔai ma zooi ɠa, naa ɠa yɛsu nui naa ya, é zeizu pòtogi zu. 19 Ɓɛ mu ka é kwɛɛ, ni toɠa ɠɛ ga ɠima nu, ɓaa ɠimalala nu? Tama tɔ ɠa é zeizu naa pɛ unda, nii gè gaalɛai ba zooi ɠa ga nà-botii ta nà-ɠimalai. Naa ɓalaa ka ga wafuun faa nɔ. 20 Ìɲɔ ge leʋeni, tɔɔzei kpɔlɔi kpein faa zu gè soni, botii naati kɛɛ vai zu zooi ɠa. 21 Gaamazu, nu ɠa ɗa ɗa-wotii ɠɛ ga ɠimalai, keleɠelegi, ta è-zoodai, è zɛba è sulɔnɔgi pɛ zɛ naama nui ya, nii kaipa é la ma boti ta ɠɛɛni. Naa ɓalaa ka ga wafuun faa nɔ, ta telebotala vaa. 22 Botii kpein nui kɛɛzu zooi ɠa ga tɔ ɓɔɠɔi suvikɛi pɛ, ná-kulanuma ɓɛgele ɠa é su? 23 Sii voloi kpein ka nɔ ga taɓai, ná-botiiti kpein ta ɠɛɛzu nɔ ga ziizoolɛi, anɛɛ kpidii, dooɠo ge la zii ʋɛ. Naa ɓalaa ka ga wafuun faa nɔ.

24 Undaanɛ ɠila kpegi é nuɓusɛi ʋɛ, tɔ ɠa é ga é laami, é ɓɔɔle, ta é ɠoozunɛ ná-botiiti ma. Gè kaaʋɛ ɓalaa ga GALA ka é naama undaanɛɛi vea ti ya. 25 Mazɔlɔɔ ɓɛ ɠa a zoo daami wosu, é undaanɛ zɔlɔɔ, ni GALA ge la vaani bu? 26 Mazɔlɔɔ GALA ka ɗa ɠimalai, faaɠwɛgi, ta koozunɛɛi ve naama nui ʋɛ, nii nɛai bɛ. Zɔi é ga faa ɲɔu ɠɛ nui, toɠa ɗa naa yiizoolɛ ga é ani mɔinmɔin gaalɛ ba, é ɠɛ ga GALA ziima nui nɔnɔ. Naa ɓalaa ka ga wafuun faa nɔ, eɠɛ nu ɠa ɠɛ ɓizɛzu fiilɛi ʋolu ga é so.

<- Tɛnɛbo Nui 1Tɛnɛbo Nui 3 ->