1 Nuɓusɛiti ta-ɠɛwolaiti ti ʋilɛni Moize ʋolu, é tɔgi veeni Izelayɛle nuiti zea, é ɠɛ ti ma: Wa deveiti kpein so, nii gè feezu wo ya za. 2 Foloi wa Zuludɛn ɓudɛ la, wo lɔ zooi naa zu, nii Ɠɔoɠɔ GALAGI wa-ƓALAGI feezu wo ʋɛ, wa kɔtu ɓaazagi ma ziɠigi ɠaalɛ ba, wo kobegi ziɛ ma. 3 Wa ziɛ wolai ɓudɛna, wo tɔ gooi kpein sɛʋɛ kɔtui naati ma. Wa lɔ ɠana naama yooi zu, nii Ɠɔoɠɔ GALAGI wa-ƓALAGI feezu wo ʋɛ, ʋɛ nɔnɔi ta kɔin gulɔi ʋooʋaai ná, eɠɛʋelei Ɠɔoɠɔ GALAGI, wo-mɛmɛwolani ta-ƓALAGI minazeɠeni la wo ʋɛ. 4 Wa Zuludɛn ɓudɛna, wa kɔtu ziɠigi lo Eɓale gizei ma, eɠɛʋelei gè ma levei veezu la wo ya za, wo kobegi ziɛ ti ma. 5 Naama adaʋɛ nɔ ɠa wo zalaɠa ɠulazuʋɛ losu ná Ɠɔoɠɔ GALAGI wa-ƓALAGI ʋɛ, ga kɔtuiti, nii kɔlu ani la dɛ vɔɔɠuni ba. 6 À mina Ɠɔoɠɔ GALAGI wa-ƓALAGI ná-zalaɠa ɠulazuʋɛ lo ga kɔtu zaɠaai. Wa gala zalaɠaiti kula bɛ naama zalaɠa ɠulazuʋɛ. 7 Wa ziilɛi zalaɠaiti kula, wo naa mi náʋɛ nɔ, wo ɠoozunɛ Ɠɔoɠɔ GALAGI wa-ƓALAGI ɠaazu. 8 Wa niima lɔ gooiti kpein sɛʋɛ kɔtu ziɠigi ma ga pagɔ, nu ɗa zoo é kala ga pagɔ.

9 Naa ʋoluma, zalaɠa ɠula nui Leevi nuiti ti ʋilɛni Moize ʋolu, é ɓɔɛni mɔnɔ Izelayɛle nuiti kpein pɔ, é ɠɛ ti ma: Izelayɛle nuɓusɛiti, à maaɠɛ kpɔ, wo woilo! Za, wo ɠɛa ga Ɠɔoɠɔ GALAGI wa-ƓALAGI ná-nuɓusɛiti. 10 À ɠolo deɠɛmu Ɠɔoɠɔ GALAGI wa-ƓALAGI laawooi ʋɛ. À ná-deveiti so kpaan, ta ná-tɔgiti gè ti veezu wo ya za.

11 Naama volo ná nɔ ɠa Moize niima levei veeni la nuɓusɛiti zea, é ɠɛ ti ma: 12 Siɛgi zu wo Zuludɛn ɓudɛzu la, Simiyɔn ná-bolodamaiti, ta Leevi nɔnɔiti, ta Zuda nɔnɔiti, ta Isakaal nɔnɔiti, ta Zozɛfe nɔnɔiti, ta Ɓɛnzamɛn nɔnɔiti, ta lo Galizime gizei ma, ti tuyai loo nuɓusɛiti bɛ. 13 Luɓɛn ná-bolodamaiti, ta Gade nɔnɔiti, ta Asɛɛl nɔnɔiti, ta Zaɓulɔn nɔnɔiti, ta Dan nɔnɔiti, ta Nɛfetali nɔnɔiti, ta lo Eɓale gizei ma, ti foovooi loo.

14 Leevi nuiti ta kpɔɛi zeɠe, ti bo Izelayɛle nuiti ma ga woo wola, ti ɠɛ ma: 15 «Foovoo nu ɠa ga nui naa, nii é kɔɔɠɔ ganigi ta ɓɛtɛzu, é pɔnɛ, ɓaa é vololibai ɓɛtɛzu ga kɔlu ɠaawuungai, ga é to ada maalɔɔɠuai ta zu, naa ɠɛɠala ani ɓɛtɛaiti, maayo ge la Ɠɔoɠɔ GALAGI ʋɛ.» Nuɓusɛi kpein ka ɠɛ ma: «Amina!»

16 «Foovoo nu ɠa ga naa, zɔi é ɓaaɠulazu kɛɛɠɛ ta dee ma.» Nuɓusɛi kpein ka ɠɛ ma: «Amina!»

17 «Foovoo nu ɠa ga naa, zɔi é ti ɠwɛpelemaʋɛ ma ɠɔtui zeɠezu daazu ta seiɲɔɠɔi, é ta ʋili ʋɔ pelei zu.» Nuɓusɛi kpein ka ɠɛ ma: «Amina!»

18 «Foovoo nu ɠa ga naa, zɔi a gaazuɠole nui ɠaka.» Nuɓusɛi kpein ka ɠɛ ma: «Amina!»

19 «Foovoo nu ɠa ga naa, zɔi é tukpɔɠaaleʋe vai maaʋesu seikɔɠɔma nui laalɔɠɔma, ɓaa podoin, ɓaa poanzai.» Nuɓusɛi kpein ka ɠɛ ma: «Amina!»

20 «Foovoo nu ɠa ga naa, zɔi a la ga kɛɛɠɛ anzai ta, mazɔlɔɔ é ɓaaɠula kɛɛɠɛ ma.» Nuɓusɛi kpein ka ɠɛ ma: «Amina!»

21 «Foovoo nu ɠa ga naa, zɔi a la ga suai ma zii nɔpɛ.» Nuɓusɛi kpein ka ɠɛ ma: «Amina!»

22 «Foovoo nu ɠa ga naa, zɔi a la ga baazeelai, kɛɛɠɛ ná-doun anzanui, ɓaa dee ná-doun anzanui.» Nuɓusɛi kpein ka ɠɛ ma: «Amina!»

23 «Foovoo nu ɠa ga naa, zɔi a la ga mɔɛin.» Nuɓusɛi kpein ka ɠɛ ma: «Amina!»

24 «Foovoo nu ɠa ga naa, zɔi é seiɲɔɠɔi ʋaazu dɔɔɠuzu.» Nuɓusɛi kpein ka ɠɛ ma: «Amina!»

25 «Foovoo nu ɠa ga naa, zɔi a lobɛani zo, ga é sɔbalala nui ʋaa.» Nuɓusɛi kpein ka ɠɛ ma: «Amina!»

26 «Foovoo nu ɠa ga naa, zɔi nɔpɛ é la ɠɛ unfema veeni tɔ gooi niiti bɛ, é ti zo yɔɔɠɛ, é la ziɛni ga tiye.» Nuɓusɛi kpein ka ɠɛ ma: «Amina!»

<- Tɔ Sɛʋɛi Velesiɛi 26Tɔ Sɛʋɛi Velesiɛi 28 ->