1 Masagi Neɓukadenɛzaal vololibai ɓɛtɛni ga zanugi, sɔligi ɠɛni ga mɛtɛlɛ ʋuusaʋagɔ (30), kogi ɠɛni ga mɛtɛlɛ saʋagɔ. É gaalɔni nɛmɛi zu nii daaseigi ga Dula, Ɓaɓilɔne you zɛʋɛi ma. 2 Naa ʋoluma é keelaiti teʋeni ga ti masagi ná-nu wolaiti toli, ta koʋi laa wola ɠundiɠiiti, ta zou zɛʋɛ ɠundiɠiiti, ta faawo bo nuiti, ta wali makɛ nuiti, ta tukpɔɠaaleʋe nuiti, ta kundiɠiiti, é ʋɛɛ botiɠɛ nu wolaiti ba, ná-zou zɛʋɛiti kpein su. Naama nuiti maanɛɛni ga ti ʋa, ti vololibai ɓɛtɛ vai ma ɠoozunɛɛi ɠula, nii masagi gaalɔni. 3 Naama wotiɠɛ nuiti kpein ti ɠaalɛɛni ba deɠɛmu, ti ʋa, ti lo vololibai ɠakala, kpɛtɛ vai ma ɠoozunɛɛi vaa zu.

4 Maaɓɔgi ma ɠundiɠii wooɠulani ga zɛbɛi, é ɠɛ ma: «Ziiti pɛ ma nuɓusɛiti, ta zooiti pɛ ma nuɓusɛiti, naa ʋɛɛ zii wooiti pɛ ma nuɓusɛiti ba, à woilo niima levei ma: 5 Siɛgi zu wo puʋugi wooi mɛnisu da, ta koolei, ta kɔnigi, ta papai, ta doso ɠɔnigi, ta puʋu kpulugi, ta gɛingɛin ganigi ma ziiti kpein gooi, wa laaʋɛɛ zooi ma, wo nɔkɔ vololibai wu é ga zanugi, nii masagi Neɓukadenɛzaal gaalɔgai. 6 Nu-o-nu nii é la maaʋɛɛni, é ʋa nɔkɔ, naa ɠa ʋili abuzulugi zaama nii gola ɓadiai, gaamago nɔ.» 7 Naa ɠa é ba, ziiti pɛ ma nuɓusɛiti, ta zooiti pɛ ma nuɓusɛiti naa ʋɛɛ zii wooiti pɛ ma nuɓusɛiti ba, ti puʋugi wooi mɛnigai ma feya, ta koolei, ta kɔnigi, ta papai, ta doso ɠɔnigi, ta gɛingɛin ganigiti kpein gooi, ti maaʋɛɛni zooi ma, ti nɔkɔ vololibai wu é ga zanugi, nii masagi Neɓukadenɛzaal gaalɔni.

8 Gaamago nɔ, naa ʋolu, Ɓaɓilɔne nui tanigaani ti ʋaani, ti Zuifuiti maalɔ. 9 Ti ɓɔɛni masagi Neɓukadenɛzaal ʋɔ, ti ɠɛ ma: «È-zii zuɠooza, masagi! 10 Ee, masagi, ɗa ɓɔɠɔgoi ɠa è niima levei veeni ga nu kpein maanɛɛʋɛ ga é maaʋɛɛ, é nɔkɔ vololibai wu é ga zanugi, a puʋugi wooi mɛnina feya, ta koolei, ta kɔnigi, ta papai, ta doso ɠɔnigi, ta puʋu kpulugi, ta gɛingɛin ganigi ma ziiti kpein gooi, 11 nu-o-nu nii é la maaʋɛɛni, é ʋa nɔkɔ, naa ɠa ʋili abuzulugi zaama, nii gola ɓadiai. 12 Ee, masagi, Zuifu niiti ti ga Sadalake, ta Mesake, ta Aɓɛde-Nego, niiti è Ɓaɓilɔne you zɛʋɛi ma losuʋɛ tanigaa vea ti ya, ti la è ɠaazu ga ani nɔpɛ, ti la ɗa-ɠɔɔɠɔ ganigiti dɛbizu, ta ti la nɔkɔni vololibai wu é ga zanugi, nii è gaalɔgai.»

13 Neɓukadenɛzaal wola yiiɠaawanani, é devei veeni ga ti ʋa ga Sadalake, ta Mesake, ta Aɓɛde-Nego. Ti ʋaai ma ga tiye masagi ʋɔ bɛ, 14 é ɠɛni ti ma: «Gaama ʋe ɓaa, Sadalake, ta Mesake, ta Aɓɛde-Nego, ga wo ɠɛlɛʋɛ ga wo mina nà-kɔɔɠɔ ganigiti dɛbi, wo la nɔkɔni vololibai wu é ga zanugi, nii gè gaalɔgai? 15 Niizu à lona, wo ɠɛʋele ɓɛtɛ, siɛgi zu wo puʋugi wooi mɛnisu da, ta koolei, ta kɔnigi, ta papai, ta doso ɠɔnigi, ta puʋu kpulugi, ta gɛingɛin ganigi ma ziiti kpein gooi, wa maaʋɛɛ, wo nɔkɔ vololibai wu, nii gè kpɛtɛai. Ni wo la kɛɛni wo ʋa nɔkɔ bu, wa ʋili gaamago nɔ abuzulugi zaama. Galagi ɓɛgele ɠa a zoo é wo ɠula zèa?»

16 Sadalake ta Mesake ta Aɓɛde-Nego ti masagi wooɠaaʋoteni, ti ɠɛ ma: «Masagi, gi la pɔ ga gi ʋa ɓɔɠɔ maalobo. 17 Anɛɛ naa ʋe, suɠwɛɛ ga gá-ƓALAGI, GALAGI nii gi dɛbizu, zobogi ɠa bɛ é gi ɠizo. Ungo, masagi, toɠa gi ɠula abuzulugi zu, é gi ɠula è ya. 18 Anɛɛ naa laade, kwɛɛ, masagi, ga gi la ɗa-ɠɔɔɠɔ ganigiti dɛbia, ta gi la nɔkɔga vololibai wu é ga zanugi, nii è gaalɔgai.»

19 Neɓukadenɛzaal wola yiiɠaawanani, gaazulo pelei valiboni Sadalake ta Mesake ta Aɓɛde-Negoni kakala. É devei veeni ga ti abuzulugi ɓadi ná zeizu ɠɛ lɔfela, é leʋe pɔlɔmai ʋa. 20 É devei veeni ná-salaʋusui tanigaani zea, niiti ti wola zulogai ná-kɔɔɓɔgi zaama, ga ti Sadalakeni gili, ta Mesake, ta Aɓɛde-Nego, ga ti ti ʋili abuzulugi zu, nii gola ɓadiai. 21 Gaamago nɔ, ti niima zunu saʋagɔiti gilini, ti maaɠiliai ga ta-zɔɔlaiti, ta-zeɠewuzeɠeiti, ta ta-wɔɔlɔgiti, ti ti ʋilini abuzulugi zu gola ɓadiai. 22 Tɔɔzei masagi ná-devei ʋa nii gola ɓɛlɛni, ti abuzulugi ɓadini da ge leʋe. Abuzogi salaʋusuiti paani, niiti ti Sadalake ta Mesake ta Aɓɛde-Negoni pilini abui zu. 23 Sadalake ta Mesake ta Aɓɛde-Negoni giliai yɛni de, ti loo abuzulugi zaama.

24 Gaamago nɔ, masagi Neɓukadenɛzaal wuzeɠeni, daavɔ, é ɠɛ ná-nu wolaiti ma: «Zunu saʋagɔiti ti ɠiliai, naati tɛi ade ʋa ti ʋili abui zu ɓaa?» Ti gooɠaaʋoteni, ti ɠɛ ma: «Zekana kɛai la, masagi.» 25 Masagi ɠɛni ti ma ʋolu: «Kɛlɛ tama, nà nu naanigɔ ɠaazu, ti la ɠilini, ti ɗa ziɛ abui zaamaʋɛ ɓɔɠɔi. Faa nɔpɛ ge la ti taɠila kpalaa ba. Naanisiɛi ɠaazuʋɛ ɠulaʋɛ ga galagiti ti-loun zunui ta ɠaazu.»

26 Neɓukadenɛzaal maaɓuɠani abuzulugi laaʋɛ ʋa, é wooɠula, é ɠɛ ma: «Sadalake, Mesake, ta Aɓɛde-Nego, GALA nii é Anii-Pɛ-Unda ná-botiɠɛ nuiti, à ɠula lɛɛ, wo ʋa!» Gaamago nɔ, ti saʋagɔ pɛ ti ɠulani abui zaama. 27 Masagi ná-nu wolaiti, ta koʋi laa wola ɠundiɠiiti, ta zou zɛʋɛ ɠundiɠiiti, ta masagi ná-botiɠɛ nu wolaiti, ti pɛ ti maaɓɔni ti ma ga ti ti ʋɛtɛ. Abu ʋo ge la ɠɛni ti ʋa, tɔundeɠaiti gaa la ɠɛni ɠalani, ti ma zeɠeiti ti la ɠɛni ɠalani, abu maku nɔpɛ ge la ɠɛni ti ʋa. 28 Masagi Neɓukadenɛzaal wooɠulani, é ɠɛ ma: «Mamagi ɠa Sadalake ta Mesake ta Aɓɛde-Negoni ta-ƓALAGI ʋɛ! É ná-geezuɠeelai leʋegɛ ga é ná-botiɠɛ nuiti kizo, niiti ti laai da, ti la kɛɛni ti ʋa ɠolo nà-devei ʋɛ, masa devei. Ti yiimazeɠeni ga ti-ɓusɛi lɔɔ vai maanɔɠɔiti su, kɛlɛ ti mina kɔɔɠɔ ganigiti dɛbi, ɓaa ti ʋa nɔkɔ ti wu, kɛni ta-ƓALAGI nɔ. 29 Naa ɠa é ba, gè tɔgi zeiɗa, ga nu nɔpɛ é ɠula nuɓusɛiti saama, ta ziiti, ta zii wooiti, a Sadalake ta Mesake ta Aɓɛde-Negoni ta-ƓALAGI ná-fai zona ga yɔɔɠɛ faa, naama nui ɠa leʋeleʋe, é ɓulukpulu, ná-pɛlɛi ɠa lati é ɠɛ ga kpoɠamaʋɛ. Tɔɔzei gala kili nɔpɛ ge la ná, nii a zoo é nu ɠizo ga tɔun kɛʋele.»

30 Naa ʋoluma, masagi tosu ɓii gola ɠalivaani Sadalake ta Mesake ta Aɓɛde-Negoni ma, é leʋe ma mɔun keleiti ba, Ɓaɓilɔne you zɛʋɛi zu.

31 Masagi Neɓukadenɛzaal wooi laazeelini nuɓusɛiti kpein ma, ziiti kpein saama, ta zii wooiti kpein eteai zu ná pɛ ga: Ziilɛigi ve wo ʋɛ ga bɔɔlɔa! 32 Gè pɛtɛgɛ ga pagɛ, gè poogiti ta laavɔɔ vaiti dɛɛ, GALA nii é Anii-Pɛ-Unda, niiti é ti ɠɛa bɛ̀: