1 «Geezuɠeelai ɠɛni mà mɔnɔ: ‹Naama ziɛgi zu, Misɛle ɠa wuzeɠe, nii é ga geezuɠeelaiti ta-ɠundiɠi wolai ta ɗa-nuɓusɛiti makɛ nui. Naa ɠa ɠɛ ga kpɔlɔi ma yeeɠɛɠalai, nii kɛɠala la dɛ ɠɛni kaipa ziiti ti ɠulani, eyɛsu naama ziɛgi tɔna su. Naama ziɛgi zu, ɗa-nuɓusɛi nii kpein, daaseigi a zɛʋɛ zɛnvu zɛʋɛi zu, naati ta ɠizo. 2 Ma mɔinmɔin niiti ti ɲiizu kabayeɠei zu, naati ta wuun, tanigaa ti ɠɔoɠɔ zɛnvui zɔlɔɔ, tanigaa ti unfegi zɔlɔɔ, ta ɠɔoɠɔ zɔngɔ zɛlɛbai. 3 Niiti ta ɠɛ ga ɠima nuiti, naati ta volo eɠɛʋelei geeɠɔlɔgi ɠaaʋɛ volozu la. Niiti ta nu mɔinmɔin kala ga telebodai, naati ta volo eɠɛ somideɠaiti eyɛsu ɠɔ.

4 « ‹Ɗa ʋe, Daniyɛle, niima ɓɔɛiti dɔɔɠu, mina sɛʋɛi nii zu vaiti kula kɛlɛma, eyɛsu gaaɓela foloi zeeli. Ma mɔinmɔin ka kala, ta faaɠwɛgi ɠa mɔin.›

5 «Nà Daniyɛle, gè yɛni wɛlɛzu, zunu felegɔ ɠiligaa ti ɠɛni loni, gilagi ɠɛni kake ʋoluʋɛ ziɛlaʋɛ, zɔi loni ʋɛ ʋele ziɛlaʋɛ. 6 Gilagi ɓɔɛni naama nui ʋɔ, nii geze zeɠe ɠɛni kɔba, é loni ziɛ wolai maazu, é ɠɛ ma: ‹Siɛ kpɛgele ɠa niima laavɔɔ vaa wolaiti ti ʋaazu ɓesu da?› 7 Geze zeɠe nui yee felegɔiti tɛɛni geezu, gè goomɛnini, é ɗa ɠɛ ma: ‹Nà ɠonazu GALA ma nii é vulua ɠɔoɠɔ, niima vaiti ta lɛbisu su ga kona saʋagɔ ta tukpɛ (3,5). Ta ɓe siɛgi zu GALA ná-nuɓusɛiti ti-zɛbɛi a ɓena da mɛtu.›

8 «Gè mɛnini, kɛlɛ gè la ɠɛni gaaɠaani. Gè ɠɛni ma: ‹Màliɠii, niima vaa wolaiti gaa ɠa ɓelazu ɠale?› 9 É ɠɛni mà: ‹Daniyɛle, li, mazɔlɔɔ niima ɓɔɛiti ta lɔɔɠuzu kpaan, eyɛsu gaaɓela voloi zeeli. 10 Ma mɔinmɔin ka gba, ti ɠole, ti ʋoluɠula. Nu ɲɔiti ta yɛ faa ɲɔi nɔ ɠɛɛzu, ta faa ɲɔu ɠɛ nu ɠila kpalaa ge la niima vaiti gaaɠa, kɛlɛ ɠima nuiti ta naama vaiti gaaɠa. 11 É zo naama ziɛgi zu ma yeei folo-o-folo zalaɠa ɠulaai zeɠezu ga la, ti kɔzɔba vaa wolai lɔ zalaɠa ɠulazuʋɛ, toɠa ɠɛ ga folo waagila unfelegɔ puutaaʋuugɔ (1.290). 12 Undaanɛ nu ɠa ga naa, nii é losu kpaan, é ɠɛ ga wooɠɛɠila nu, eyɛsu é zeeli folo waagila unsaʋagɔ folo ʋuusaʋagɔ maazu lɔɔlugɔi (1.335) ma. 13 Ɗɔun è letemazu, Daniyɛle, lo kpaan eyɛsu gaaɓela yeei zeeli. Ɗa dooɠogi zɔlɔɔ naazu, naa ʋolu ɗa wuzeɠe, è ɗa-ɠulanumai zɔlɔɔ etea ɠaaɓela voloi.› »

<- Daniyɛle 11