2 À yiilɔɔ GALA falii wu, wo ɠaaɓa ma, naa ʋɛɛ mamagi ʋa. 3 À GALA fali gá ɓalaa gi ʋɛ, GALA ge pele laalao gi luɠɔ daawooi wo fai zu, naa ɠa a kɛ gi zoo gi Kilista ná-dɔɔɠuzu vai laazeeli. Naa maaʋele ɠa gè ɠɛa la ga kasoɠa nu. 4 À GALA fali ga gè wooi naa lɛ, é ɠole, eɠɛʋelei maanɛai gè kɛ la.

5 À ziɛ ga ɠimalai kamaʋolu nuiti bɛ. À mina yeeɠɛɠalai ɠoloɠolo. 6 Woo nɛɛnɛgiti ti ɠɛ wo la yeenɔpɛ, nii a nu ɛnɛkɛ, naa ɠa a kɛ, wo kwɛɛ ʋelei wa zoo nuiti gooɠaaʋotesu la.

7 Gi-ɠɛɛloin, gi-nɛɛɲɔɠɔi Tisike, é Maliɠii ná-botii ɠɛɛzu wooɠɛɠiladai zu, gi botii ɠɛɛzu ʋɔɔma ga tɔ Maliɠii ʋɛ, naa ɠa nà-faiti pɛ bo wo ma. 8 Nà teʋesu wo ma, naama vai nɔ ma, naa ɠa a kɛ wo gá-vaiti kwɛɛ, é wo iɲɔdɔ ga pagɔ. 9 Nà ti leʋesu ta gi-ɠɛɛloin, gi-nɛɛɲɔɠɔi Wonezime, é ga wooɠɛɠila nui, nii é ga wo ta. Ta naati pɛ bo wo ma, niiti ti leʋegai ʋɛ.

10 Alisitaake ɠa wo luʋɔsu, gá nii gi kasoi ɠa ʋɔɔma. Ɓalanaɓase kɛkɛ loin Maleke ɓalaa ɠa wo luʋɔsu. Kaite gè deveiti feeni wo ya ná-faa zu. Ni a ʋaana wo ʋɔ bɛ, à yeezei bu ga pagɔ. 11 Yesu, nii daasei pɛai ga Zusetuse, naa ɓalaa ɠa wo luʋɔsu. Naama zunu saʋagɔiti nɔ ɠa ti ga Zuifuiti ti bà, gi botii ɠɛɛzu ʋɔɔma GALA ná-masadai vaa ma, ta ìɲɔdɔɔzu gola. 12 Epafelase ɓalaa ɠa wo luʋɔsu, toɠa ga wo ta. Yesu Kilista ná-botiɠɛ nui naa la looɠosu GALA falii ʋa wo ʋɛ, nii a kɛ wo lo kpaan, wo ɠɛ ga nu ɠiteiti kidaaleʋei zu, ti laai GALA ziima vai pɛ da. 13 Nà niima zeele wooi wosu bɛ, ga toɠa ɓɔlɔzu gola wo ʋɛ, ta niiti ti Laodisé, ta niiti ti Yielapolise. 14 Luke, ɗɔɠɔtɔlɔi, gi-nɛɛɲɔɠɔi, ta Demase ta wo luʋɔsu ɓalaa.

15 À ade-ɠɛɛleaiti tuʋɔ gi ʋɛ, niiti ti Laodisé, wo Nimefa luʋɔ, ta Egilisii é ɠaalɛɛzu ba ná-pɛlɛi wu. 16 Niima zɛʋɛi ɠalagai ma wo ʋɔ bɛ, à teʋe, é ɠala Egilisii zu Laodisé nuiti pɔ bɛ. Wa ɓalaagi wo naama zɛʋɛi ɠala, nii gè teʋeni Laodisé nuiti pɔ. 17 À bo Aalisipe ma, ga é ɠaaɓa é botii naa ɓe ga pagɔ, nii é sɔlɔɔgai Maliɠii ya.

18 Nà Pɔle, nà ɓɔɠɔi zèeʋogi ɠa gè wo luʋɔsu da. À mina yeema ga nà kasoi ɠa. GALA ná-zaalai yɛ wo ʋa!

<- Kolɔse 3