1 Pɔle wɛlɛni tukpɔɠaaleʋe nu wolaiti pɛ ba, é ɠɛ ti ma: «Kɛ̀ɛleaiti, sìɛʋɛ GALA gaazu ga kisiɛ ʋagɔi eyɛsu za voloi.» 2 Kɛlɛ zalaɠa ɠula ɠundiɠi wolai Ananiase devei veeni naama nuiti zea, niiti ti ɠɛni Pɔle ɠoba, ga ti naa loɠa daaʋɛ. 3 Naama ziɛgi zu Pɔle ɠɛni ma: «GALA ka è loɠa, siɠi kolegi! Ɗa zeini ga è nà-tukpɔi ɠaaleʋe ga tɔgi, è zɛba è ɗa devei ve tɔgi laalɔɠɔma ga ti dòɠa!» 4 Zɔiti ti ɠɛni ná, naati ti ɠɛni Pɔle ma: «Ɗa GALA ná-zalaɠa ɠula ɠundiɠi wolai ʋoomusu!» 5 Pɔle ɠɛni ti ma: «Kɛ̀ɛleaiti, gè la ɠɛa kwɛɛ ga zalaɠa ɠula ɠundiɠi wolai ʋe, tɔɔzei sɛʋɛʋɛ GALA sɛʋɛi zu ga: ‹Mina woo ɲɔu wo ɗa-nuɓusɛiti ta-ɠundiɠii ma.› »

6 Tɛi Pɔle kwɛɛni ga kpɔgi ɠilazuʋɛ ɠa ga Saduseyɛinti, gilazuʋɛ ɠɛ ga Faliziɛinti, é wooɠulani tukpɔɠaaleʋe nu wolaiti saama, é ɠɛ ma: «Kɛ̀ɛleaiti, nà ga Faliziɛn, Faliziɛin ta ná-doun zunu ɠa ga ze, kitogi é zèa gɔvɛiti buzeɠe vai zu saai ya, naa maaʋele ɠa za tùkpɔɠaaleʋezu la.» 7 É naama wooi wogai ma, maaɠaali lɔɔni Faliziɛinti ta Saduseyɛinti zɔɠɔzu, bɛbɛi ɠaaɠwɛɛni su fele. 8 Tɔɔzei Saduseyɛinti ti ɠɛni bosu ga gɔvɛiti ti la wuzeɠea saai ya, geezuɠeela la ná, ta zɛnvu la ná, Faliziɛinti ma ti laaʋɛ naama vaiti pɛ da. 9 Kpɔɛ wolai leʋeni, Faliziɛinti pɔ pele tɔ kalamɔin tanigaa ti wuzeɠeni, ti maaɠaali ʋili su, ti ɠɛ ma: «Gi la zunui nii zɔ ɲɔu nɔpɛ kaazu. Ɓɛ ɠa é kwɛɛ ni zɛnvui ta ɠa kpɔɛai pɔ, ɓa geezuɠeelai ta ɠa kpɔɛai pɔ?» 10 Kpɔɛi zuwɔɔlɔni, kɔɔɠuluɓai ɠɛni luazu ga nuiti ti mina Pɔle ʋaa, é devei veeni salaʋusu ɓulu gila zea ga ti yei ti Pɔle ɠula ti zaama, ti lɛɛ la kɔɔlaɠai zu.

11 Naama yee ɓidii, Maliɠii ɠulani kɛlɛma Pɔle ʋɛ, é ɠɛ ma: «Zɛbɛzeɠe, è ɠɛa ga nà-zeelei Zeeluzalɛme, kɛni ɓalaa è ɠɛ ga nà-zeelei Wɔlɔme taazuʋɛ.»

12 Poluma voloi sobuzobu wolai, Zuifuiti tanigaa ti yaavai ɠilini, ti ɠona ga tanɔpɛ ge mina daami wo ɓa kpɔɔle, kɛni ta Pɔle ʋaana pɛ. 13 Zɔiti ti naama yaavai ɓɛtɛni, ti mɔinni nu ʋuunaanigɔ (40) ma. 14 Ti liini zalaɠa ɠula ɠundiɠiiti pɔ bɛ ta totuɠɔiti, ti ɠɛ ti ma: «Gi minazeɠeʋɛ, gi ɠona ga gi la ani nɔpɛ pokɔɠɔga, ni gi la dɛ Pɔle ʋaani. 15 Wa ɓalaa mu, à zoloo faa ɠila ma wa tukpɔɠaaleʋe nu wolaiti, wo ɓɔɛ kɔɔɠuluɓai ʋɔ, ga é ʋa ga Pɔle wo ʋɔ, eɠɛ wa ɠɛ ná-fai wuuʋɛtɛsu ga pagɔ. Gɔun, gi ɠɛʋele ɓɛtɛʋɛ naama ziɛ su ga é ʋa ɠɛ é zeeli, gi paa.»

16 Kɛlɛ Pɔle daaɓei yaavai naa zuɠwɛɛni, é liini kɔɔlaɠai zu, é suɠula Pɔle ma. 17 Pɔle salaʋusu ɠundiɠi gila tolini, é ɠɛ ma: «Li ga zunu loungoi nii kɔɔɠuluɓai ʋɔ bɛ, faa ɠa kisu ga é bo naa ma.» 18 Salaʋusu ɠundiɠii naa liini ga zunu loungoi kɔɔɠuluɓai ʋɔ bɛ, é ɠɛ ma: «Kasoɠa nui Pɔle ɠɛ gè ʋa ga zunu loungoi nii è ʋɔ, faa ɠa kisu ga é bo è ma.» 19 Kɔɔɠuluɓai zunu loungoi zoni zeei ʋa, é lii la, ti maaɠelesa ge leʋe, é ɠɛ ma: «Lee ɠa è pɔ ga è bo mà?» 20 Naa gooɠaaʋoteni, é ɠɛ ma: «Zuifuiti ti zoloogɛ ma ga ti ʋa è ʋɔ bɛ ga è Pɔle leʋe tukpɔɠaaleʋe nu wolaiti pɔ lina, eɠɛ ta ɠɛ ná-fai wuuʋɛtɛsu ga pagɔ. 21 Kɛlɛ mina woilo ti-woo ma, tɔɔzei tanigaa ta ti zaama ta mɔin nu ʋuunaanigɔ (40) ma, niiti ti minazeɠeai, ti ɠona ga ti la daami woga ɓa kpɔɔle, ni ti la dɛ Pɔle ʋaani, ti ɠɛʋele ɓɛtɛʋɛ na, ɗa nɔ ɠa niina, ti è ɓɔunsu ga è va bu.» 22 Kɔɔɠuluɓai ɓeni zunu loungoi ʋa, é li, kɛlɛ é naa laa maaɓakpani, é ɠɛ ma: «Mina bo nu nɔpɛ ma ga è ʋaaʋɛ è niima vai wo mà.»

23 Naa ʋoluma, kɔɔɠuluɓai ná-salaʋusu ɠundiɠi felegɔ lolini, é ɠɛ ti ma: «À salaʋusu unfelegɔ (200) ɠɛʋele ɓɛtɛ, ta soo ɓizɛ zalaʋusu ʋuulɔfela (70), naa ʋɛɛ kpɛɛn ʋili nu unfelegɔ (200) ʋa, za ɓidii nɔ lɛlɛi laaʋuusiɛi ma, wo li Seezalee. 24 Kɛni ɓalaa wo sooiti faaɠɛ Pɔle ʋɛ, naa ɠa a kɛ é zeeli zou zɛʋɛ ɠundiɠii Felikise ma ga pagɔ.»

25 Ná-sɛʋɛi zu wooi ɠaa, nii é kɛɛni: 26 «Kelode Lisiyase ɠa é ná-tuʋɔ gooi laazeelizu ná-nu ʋagɔ wolai zou zɛʋɛ ɠundiɠii Felikise ma. 27 Zuifuiti ti zunui tɛi soni, nii gè teʋesu è ma, ti ɠɛnina paazu, eyɛsu gè zoloo ná ma, ga salaʋusui ɓulugiti ti kula ti ya, gè kwɛɛgai ma ga toɠa ga Wɔlɔme nu. 28 Tɛi gè ɠɛni pɔ ga gè so ungi ɠwɛɛ, gè liini la ta-lukpɔɠaaleʋe nu wolaiti kakala. 29 Gè pɛtɛni ga ta peelalazu, é ʋilɛ ta-lɔgi ma vaiti ba, kɛlɛ é ɠula naa ʋolu, é la faa ɠili koloɠoloni, nii nu a paa su, ɓa nu a gili ma vaa zu. 30 Kɛlɛ nui ta gòi vɛa ga yaavai ɠiliʋɛ ma ga ti paa. Naa ɠa é kɛa, gè la ná maaɓɔunsu, gè teʋega è ma, gè maalɔɔ nuiti deve ga ti ʋa è ʋɔ bɛ, ti ɓaazaɠa ná.»

31 Tɛi salaʋusuiti ti naama levei zɔlɔɔni, ti Pɔle zeɠeni ga kpidii, eyɛsu ti zeeli Antipatili. 32 Poluma zobui, ti ɠaleni ma kɔɔlaɠai zu, ti zɛ soo ɓizɛ zalaʋusuiti zea, ti li ta naati. 33 Ti zeeliai ma Seezalee, naati ti sɛʋɛi veeni zou zɛʋɛ ɠundiɠii ya, ti Pɔle lɛɛ la. 34 Siɛgi zu é ɓeni la ga sɛʋɛi ɠala, é Pɔle ɠaazaɠani naa zeɠezuʋɛ ma. Tɛi é kwɛɛni ga naa zeɠeʋɛ Silisi ɠoʋii ma, 35 é ɠɛni naa ma: «Nà è woomɛni, siɛgi zu è maalɔɔ nuiti ti ʋaazu la.» É devei veeni ga ti makɛ naa ʋa Elɔde ná-masa pɛlɛi wu.

<- Kɛɛwotiiti 22Kɛɛwotiiti 24 ->