Kɛɛwotiiti 2

Zɛnvu Ɲadegai ʋaa vai

1 Pantekote voloi zeeliai ma, ti pɛ ti ɠaalɛa ɠɛni de ba ada ɠila. 2 Gaamago, zɔngɔ wolai zeɠeni geezuʋɛ, eɠɛ fiilɛ wola, é pɛlɛi wu ná pɛ daave, ʋɛ ti ɠɛni zeini ná. 3 Nɛgiti, ti ɠulaai ga abu zogi, ti ɠulani ti ʋɛ kɛlɛma, ti ɠaaɠwɛ ma, ti zei ti ɠilagilagiti unma. 4 Naati pɛ ti laaveni ga Zɛnvu Ɲadegai, ti tɔɔzei ga ti ɗa ɓɔɛ zii woo ɠiligiti su, eɠɛʋelei Zɛnvu Ɲadegai ɠɛni feezu la ti ya ga ti bo.

5 Naama ziɛgiti su, Zuifui tanigaa ti ɠɛni ɲii wosu Zeeluzalɛme, ti ɠɛni ga GALA gaazuluaba nuiti ti zeɠeai eteai zu ná pɛ. 6 Naama wooi ziaai ma, ti ma ʋɛbɛ wolai ʋaani, ti wola laavɔɔni, tɔɔzei ti pɛ ge ɠɛni ti woomɛnisu ti ɓɔɠɔ wooiti su. 7 Ti laavɔɔni, ti ɗa ɠɛ ma: «Nui niiti ti ɓɔɛzu ɠani, kɛbɛ ti pɛ ta ga Galilee nu, kɛlɛ? 8 É leʋe ɠale mu, ade pɛ ade ti woomɛnisu ade ɓɔɠɔ wooiti su? 9 Adɛi de ga, Paate nuiti, ta Mɛde, Elame, Meezɔpɔtami, Zudee, Kapadɔse, Pɔn, Azi ɠoʋii, 10 Filizi, Panfili, Ezipete, naa ʋɛɛ Silɛne lugi zu ʋa Liɓi yooi zu, ta zɔiti ti zeɠeai Wɔlɔme, 11 Kelɛte ta Aalaɓi: Zuifuiti be-o ɓaa wɛɛinti be-o, niiti ti ʋilɛgai Zuifuiti ta-ƓALA pelei ma. Ade pɛ, ada ti woomɛnisu ade ɓɔɠɔ wooiti su, ti ɗa GALA ná-kɛɛwoti wolaiti bo.» 12 Ti pɛ ti laavɔɔni, tanigaa ti ɠɛ unga wuulee, ti ɗa ɠɛ ɓɔɠɔ ma: «Niima vai ʋoluʋɛ ɠa ga lee?» 13 Taɠiligaa ti ɠɛni ɠɛɛzu ma: «Dɔɔ nɛɛnɛgi ɠa é ti zogai!»

Piyɛlɛ GALA daawooi wo fai Pantekote voloi

14 Piyɛlɛ wuzeɠeni é lo, keela puugɔ maazu ɠilagi (11) zɔiti saama, é wooɠulani, é ɠɛ ma: «À woilo ma-o! Zudee nuiti ta wɔigi wo ɲii wosu Zeeluzalɛme, wo niima vaiti gaaɠa, niiti ti ɠɛɛzu. 15 Dɔ lɛi é ʋa ɠɛ niima nuiti ba, eɠɛʋelei wo ɠisiɛzu la, folo liegi kpaazuʋɛ nɔ ɠa dɛ ade su. 16 Kɛlɛ nii GALA goo wo nui Zowɛle boni, naa ɠa é ɠɛɛzu ɠani. É ɠɛni ma:

17 ‹GALA ge ɠɛ ma: Folo ɠaaɓelagiti su,

nà nà-Zɛnvui yeizu nuɓusɛi pɛ ma.

Wo-loun zunuiti ta wo-loun anzanuiti ta GALA gooiti bo,

wa-wuzeɠe niinɛgiti ta kulakɛlɛmaiti ka,

wa-ɠɛwola ʋɔlɔiti ta segiti bo.

18 Ungo, naama voloiti su, nà nà-Zɛnvui yei nà-botiɠɛ zunuiti ta nà-botiɠɛ anzanuiti ma,

ti ɗa GALA gooi wo.

19 Nà maaɓɛlɛ vaiti kɛ geeɠɔlɔgi zu, ta poogiti zooi ma,

ɲamai ta abui ɠa ɠɛ ná, naa ʋɛɛ abu luului ma lonaɓiingi ʋa.

20 Foloi ɠa ʋote ga kpidii,

alugi ɓɔi eɠɛ ɲamai,

aisa Ɠɔoɠɔ GALAGI ná-foloi ʋa zeeli,

folo wolai, nii maayikiai.

21 Naazu zɔi nɔpɛ a wooɠula Maliɠii ma, GALA ka kizo.›

22 À woilo niima wooiti ma, wɔi wo ga Izelayɛle nuiti, wa ɓɔɠɔi wo kwɛɛni ga GALA ge yeezeini Yesu Nazalɛte nui wu wo ɠaazu, mazɔlɔɔ GALA ge ɠɛni laavɔɔ vaiti, maaɓɛlɛ vaiti ta laavɔɔ ʋoogiti kɛɛzu ga tɔun maaʋele wo zaama. 23 Zunui naa ɠwɛɛni wo ma, é zoloo GALA ná-devei ta ná-seikpasui ma, nii é kɛɛni ma yeeluɠɔ kaite, wo paaʋɛ siɛgi zu wo zɛga la tɔ koloɠolo nuiti zea, ti kpadɔ saa wului ma. 24 GALA ge buzeɠeʋɛ ʋolu, é kula saai ma zoolɛiti su, mazɔlɔɔ naa la ɠɛni zolooga ga saai ʋa makɛ ba ná-zobogi wu. 25 Davide niima wooi woni, é ʋilɛ Yesu ʋa, é ɠɛ ma:

‹Gàazu logɛ Ɠɔoɠɔ GALAGI ʋa yeenɔpɛ, mazɔlɔɔ toɠa kòbaʋɛ,

nii a kɛ gè mina ɲiikpi eyɛsu pɛ.

26 Naa ɠa é ba, zìi ɠaanɛa, gòoiti daavegɛ ga koozunɛɛi,

kpùsɛi ɓɔɠɔi ɠa looɠosu, makɛgai kitogi zu.

27 Mazɔlɔɔ è la ɠɛlɛa bà, gè ʋa yɛ gɔvɛalaazu,

è la vaa bu nɛ̀i gè ga ɗa-wotii ɠɛ nui, gè ga wooɠɛɠila nu, gè ʋa luula kabayeɠei zu.

28 È zɛnvu ʋelei lɛa ga ze,

ɗa nɔ̀un daave ga koozunɛɛi è ɠɛɛ vai zu kòba.›

29 Kɛ̀ɛlointi, zobogi veeʋɛ bɛ̀ ga gè ɠɛ wo ma: Ade-mɛmɛwola Davide zaaʋɛ, maaɠulu, ná-kabai ɓalaa ka ade zaama zaaɠaza. 30 Kɛlɛ é ɠɛni ga GALA goo wo nui, ta é ɠɛni kwɛɛni ga GALA ge minazeɠeni bɛ, é ɠona ga mavofodai ta ɠa zei ná-masa kpɔkpɔgi ɠa. 31 Kilista wuzeɠe vai, é ɠula saai ya, naa ɠa Davide kaani ma yeeluɠɔ, naama wooi ɠa é boni ga: ‹GALA ge la ɠɛlɛa bà, gè ʋa yɛ gɔvɛalaazu, é la vaa bu, kpùsɛi ʋa luula kabayeɠei zu.› 32 GALA ge Yesu nii wuzeɠeʋɛ, é kula saai ya, gi pɛ gá ga naama zeeleiti. 33 Buzeɠeʋɛ, é zei GALA zeezazuʋɛ, é Zɛnvu Ɲadegai zɔlɔɔ kɛɛɠɛ ya, nii ma minazeɠegi woni, naa ɠa é feai, eɠɛʋelei wo mɛnisu da, ta wo kaazu la. 34 Mazɔlɔɔ Davide la lɛɛni geeɠɔlɔgi zu, kɛlɛ tɔ ɓɔɠɔi bogɛ ga:

‹Maliɠii GALA ge ɠɛni Màliɠii ma: Zei zèezazuʋɛ,

35 eyɛsu gè è zili nuiti kɛ ga ɗa-ɠɔɠɔloma anii.›

36 Izelayɛle ʋɛlɛyeɠei pɛ maanɛɛʋɛ ti kwɛɛ, ti la da, ga Yesu nii wo kpadɔni saa wului ma, naa ɠa GALA ge kɛai ga Maliɠii ta Kilista.»

Kidaaleʋe nu mɔungiti

37 Ti naama wooiti mɛnigai ma, é ti yiizoni ga gola, ti ɠɛni Piyɛlɛ ta keelai zɔiti ma: «Gi-ɠɛɛlointi, gá kɛ ɠale mu?» 38 Piyɛlɛ ti wooɠaaʋoteni, é ɠɛ ti ma: «À wo ziɛ ʋelei maavalibo, wo ɠilagilagi pɛ ge ɓatize Yesu Kilista laaseigi zu, nii a kɛ wo zuvaayɛ ga wa-ɠotoiti, wa Zɛnvu Ɲadegai zɔlɔɔ ga faanɛɛ. 39 Mazɔlɔɔ minazeɠegi ɠa ga wɔnɔ, wa wo-lointi, ta naati tɔnɔ niiti ti maaɠoozaai, naati pɛ de-Maliɠii da-ƓALAGI ʋaazu ti lolisu.» 40 Piyɛlɛ ɠɛni zeele wooi wosu ti ma wooi taɠiligaa zu, é ɗa ti iɲɔdɔ, é ɗa ɠɛ ti ma: «À ɓɔɠɔ ɠula tukpɔi laawu, nii é ʋaazu zeelizu yamani ɲɔi nii zu nuɓusɛiti ma.»

41 Zɔiti ti yeezeini gooi wu, naati ti ɓatizeni, naama voloi nu waasaʋagɔ (3 000) ɠɛɠala ɠa é ʋɛɛni kidaaleʋe nuiti ba. 42 Ti ɠɛni woilosu yeenɔpɛ kalagi ma, nii keelaiti ti ɠɛni feezu, ti ɠɛ kpɔfaamai zu, ti ɗa daamii wo, ta ti ɗa GALA falii wo ʋɔɔma. 43 Dualuagi ɠɛni ɛsɛ pɛ su, mazɔlɔɔ GALA ge ɠɛni maaɓɛlɛ vaiti ta laavɔɔ ʋoogiti kɛɛzu ga gola ga keelaiti maaʋele. 44 Kidaaleʋe nuiti pɛ ti ɠilini ʋa, ti-ɠɔligiti ti ɠɛ su ɠila kpe. 45 Ti ɠɛni ta-yooiti ta ti-ɠɔligiti pɔdizu, ti ʋa ga ma walii, ti gaaɠwɛ ɛsɛ ba, é zoloo ma nu ɓɛdɛma vai ma. 46 Ti pɛ ti ɠɛni ɠaalɛɛzu ba folo-o-folo GALA sei ʋɛlɛi wu, ti ɠɛni ɓului ɠaleɠalezu ta-ʋɛlɛiti bu, ti daamii wo koozunɛɛi zu, ta zii ʋagɔlai zu. 47 Ti ɠɛni GALA maamusɛzu, naa ʋoluma ta-vai ɠɛni nuɓusɛi pɛ ziilaazu. Folo-o-folo Maliɠii ɠɛni ta ɓɔsu kidaaleʋe nuiti ma ɓɔgi ʋa ga niiti é ɠɛni ti ɠizosu.

<- Kɛɛwotiiti 1 Kɛɛwotiiti 3 ->