2 Timɔte 4

1 Naa ɠa é ba, GALA ta Yesu Kilista ɠaazu, Kilista nii é ʋaazu nu vuluiti ta gɔvɛiti tukpɔɠaaleʋezu, ta tɔun paa vai ta ná-masadai maaʋele ma, nà devei nii veezu è ya, gè maaɓakpa, naama levei ɠa é ga: 2 GALA daawooi laazeeli, daazeeli ga gilimai siɛnɔpɛ su, ma yeeɠɛɠala ɠɛni de, ɓaa ma yeeɠɛɠala mina ɠɛ de, gaalɛɛ ga pagɔ, è zelii lo, è nuiti iɲɔdɔ, è ɗa kalagi wo ga ziilɔɔ laazeeliai pɛ. 3 Mazɔlɔɔ yeeɠɛɠalai ɠa ʋaazu, názu nuiti ti la mɔ wɔinɗa ga ti ʋa woilo gaama ɠalagi ma, kɛlɛ ta ʋilɛ ti ɓɔɠɔyiimaiti nɔ ʋolu, ta kalamɔinti gaalɛ ba, ga nii nɛai ti ʋɛ, naati ti ɗa naa nɔ wo ti ma. 4 Ta ɠɛlɛ woilosu gaamai ma, ti ɠaaʋote zɛɛ vaalaali ɓɔɛiti ma. 5 Kɛlɛ ɗɔun, ɠɛ ga sɔɓelama nu fai pɛ su, è yiilɔɔ kpɔlɔiti bu, ɗa-lɛnɛbo botii ɠɛ Woo Niinɛ Ʋagɔi laazeeli vai zu, ɗa-wotii ɠaaɓela ga pagɔ.

Pɔle ɠigaiziɛ vai ná-saa vai zu

6 Mazɔlɔɔ nɔ̀un, nà ga ʋa ɠɛɛzu ga puya zalaɠai, dìi yeei zeelia. 7 Gè kɔɔ ʋagɔi ɠɔa. Gè nà-kpizɛi ɠaaɓelaga. Gè kidaaleʋei makɛgɛ. 8 Niizu niina, masa bɔɔlɔgi é ga telebo kelei, naa makɛgɛ bɛ̀. Maliɠii, tukpɔɠaaleʋe nui telebogai, naa ɠa é feezu zèa naama volo ná. Nà ɠila taade, kɛlɛ toɠa fe naati pɛ zea, niiti ti ná-kulakɛlɛmai maaɓɔunsu, nɛai ti ʋɛ.

Pɔle ná-woo ɠaaɓelagiti

9 Ɠaaɓa, è ʋa pɔ̀ bɛ fala. 10 Mazɔlɔɔ Demase ɓeteʋea bà, tɔɔzei eteai nii zu vaiti gola nɛɛʋɛ bɛ, é lia Tesalonike. Kelesɛnse liiʋɛ Galate yooi zu, Tite li Dalamasi yooi zu. 11 Luke ɠila kpe nɔ ɠa é bà ʋɛ. Maleke zeɠe, è ʋaa la ʋɛ, mazɔlɔɔ toɠa zoo é ɓɔ bà nà-botii zu. 12 Gè Tisike leʋegɛ Efɛze. 13 Ɗa ɠɛna ʋaa, ʋa bɛ̀ ga tookɔba wolai gè zɛni Kaalapuse ʋɔ bɛ, Toloase, ta sɛʋɛ ɓiligiti, ma un ge daa ma mɛɛ ga kɔlɔ zɛʋɛiti.[a]

14 Ɠain bo nui Alɛgezandele faa ɲɔi wola ɠɛɛʋɛ ga ze. Maliɠii ɠa sala, é zoloo ná-kɛɛwotiiti ma. 15 Ɗa ɓalaagi, dama la, mazɔlɔɔ buzeɠeʋɛ gá-ɓɔɛiti daalɔɠɔma gola.

16 Kɛ̀ai ma ɓɔɠɔ maalobosu mɔungi tukpɔɠaaleʋezuʋɛ, nu nɔpɛ ge la ɠɛni loni pòlu, kɛlɛ ti pɛ ti ɠɛlɛni bà. GALA ge mina naa leve ti unma. 17 Kɛlɛ Maliɠii ɠa é ɓɔni bà, é sɛ̀bɛlɔ, naa ɠa é kɛɛni, gè zooni gè GALA daawooi laazeeli ga pagɔ zii ɠiligiti pɛ ma, gè ɠula zalai la. 18 Maliɠii ɠa kùla kɛɛwoti ɲɔiti pɛ su. Toɠa kìzo, é dɔ̀ ná-masadai zu geeɠɔlɔgi zu. Lɛbiyai ɠɛ tɔun bɛ, eyɛsu ɠɔ! Amina!

Tuʋɔ goo ɠaaɓelagiti

19 Gè Pilisile ta Akilase luʋɔ, ta Wonezifɔle ná-pɛlɛyeɠei. 20 Elasete yɛgɛ Kolɛnte, ta gè Tolofime yɛgɛ Milɛ, tɔɔzei é la ɠɛdɛni. 21 Ɠaaɓa, è ʋa pɔ̀ bɛ aisa samai ʋa zeeli. Ebuluse, ta Pudɛn, ta Linuse, ta Kelodia, ta ade-ɠɛɛloin zɔiti pɛ ta è luʋɔsu.

22 Maliɠii yɛ è-yɛnvui ʋa. GALA ná-zaalai yɛ wo ʋa. Amina.

<- 2 Timɔte 3