2 Davide doun zunua zɔlɔɔni Ɠeeɓelɔn. Ma mɔungi laa ɠɛni ga Amenɔn, Zizeleyɛle nui Ayinoame ná-doun zunui. 3 Felesiɛi laa ɠɛ ga Kileyaɓe, Aɓigayile ná-doun zunui, Kaalemɛle nui Naɓale ná-poanzai. Saʋasiɛi laa ɠɛni ga Aɓesalɔme, Maaka ná-doun zunui, Gesuul masagi Talemayi ná-doun anzanui. 4 Naanisiɛi laa ɠɛ ga Adɔniya, Ɠagite ná-doun zunui. Dɔɔlusiɛi laa ɠɛni ga Sefatiya, Aɓitale ná-doun zunui, 5 ta dɔzitasiɛi laa ɠɛ ga Yiteleyame, Davide anzai Egela ná-doun zunui. Davide ná-doun zunuiti kana, ti zɔlɔɔni bɛ Ɠeeɓelɔn.

6 Kɔɔi ɠɛai ma Sayile ná-pɛlɛyeɠei ta Davide ná-pɛlɛyeɠei yɔɠɔzu, Aɓenɛɛl losuʋɛ maaɓakpani Sayile ná-pɛlɛyeɠei wu. 7 Anzai ɠɛni Sayile ya, nii é la vuluni ga zɔiti kɛʋele, daa ga Lisepa, Aya ná-doun anzanui. Iseɓaale ɗa zelii lo Aɓenɛɛl ma, é ɠɛ ma: «Lee vaa zu è laai kɛ̀ɛ anzai ɠoba?» 8 Naama wooiti ti wola wanani Aɓenɛɛl ma, é ɠɛ Iseɓaale ma: «Ɗa kàazu ga gilɛ, nii é botii ɠɛɛzu Zuda ʋɛ ɓaa? Kaite nà wooɠɛɠiladai ɠɛɛzu è-ɠɛɛ Sayile ná-pɛlɛyeɠei ʋɛ, naa ʋɛɛ kɛɛɠɛlointi ba, ta bɔɔlaiti. Gè la vaani bu, è ʋa loo Davide yeezu. Ɗa ɠa è faaɠaaza daazu ùnma za, anzanui nii maaʋele ma. 9 GALA ge sò ná-ziiɠaawanaiti pɛ su, ni gè la losuʋɛ kpein kɛɛni, naa laazeeli vai zu, nii Ɠɔoɠɔ GALAGI minazeɠea la Davide ʋɛ, é konai wo maazu, 10 é ɠɛ toɠa Izelayɛle ta Zuda masadai ɠulazu Sayile ná-pɛlɛyeɠei ya, é fe Davide ya, é lɔɔzei Dan, é li Ɓeel-Seeɓa.» 11 Iseɓaale la ɠɛni zooni é ʋa gooɠaaʋote ga woo ɠila kpalaa, mazɔlɔɔ é ɠɛni wola luazu ba.

12 Aɓenɛɛl keelaiti teʋeni Davide ma, é ɠɛ ma: «Ɓɛ ɠili ka nɔnɔ ga zooi nii? De minazeɠe kɛ yɔɠɔzu, nà zoo gè ɓɔ è ʋa, gè Izelayɛle pɛ tati è ma.» 13 Davide ɠɛni ma: «Zèe ɠa bu, da minazeɠe ɓɔɠɔ yɔɠɔzu, kɛlɛ faa ɠila kpe maazu: ɗa ɠɛna ʋaa, kɛni è ʋa dɛɛ ga Sayile ná-doun anzanui Mikale.» 14 Naama ziɛgi zu, Davide keelaiti teʋeni Sayile ná-doun zunui Iseɓaale ma, é ɠɛ ma: «Ànzai Mikale ve zèa, nii gè fuluai ga Filiseti nuiti ta-zunu ani laayɔɓɔ ungilagi (100).»

15 Iseɓaale Mikale zeɠeni sinigi Paletiyɛle ʋɔ bɛ, Layise ná-doun zunui. 16 Paletiyɛle ʋilɛni polu, é ɗa wɔlɔ, é yɛni polu, ti zeeli Ɓaɠulime. Ti zeeliai ma niina, Aɓenɛɛl ɠɛni ma: «Ɠalena ma, è li.» É ɠaleni ma.

17 Aɓenɛɛl ɓɔɛni Izelayɛle ɠɛwolaiti pɔ, é ɠɛ ti ma: «Kaite wɔin ɠɛa wo ma ga Davide ɠɛ ga wa-masagi. 18 Yeeɠɛɠalai zeelia, wo naama ɠɛɛwotiiti kɛ. Mazɔlɔɔ Ɠɔoɠɔ GALAGI minazeɠeʋɛ, é ɠɛ ma: ‹Nà-botiɠɛ nui Davide ɠa gè nà-nuiti Izelayɛle nuiti unmɔɔsu ga maaʋele, gè ti ɠula Filiseti nuiti zea, ta ti zili nuiti pɛ zea.› »

19 Aɓenɛɛl ɓɔɛni ɠana nɔ Ɓɛnzamɛn mavofodai ʋɔ. Naa ʋoluma é liini Ɠeeɓelɔn, é naama vaiti daazeeli Davide ma, nii ti zolooni ma ta Izelayɛle nui mɔtaiti, naa ʋɛɛ Ɓɛnzamɛn mavofodai zu nuiti ba. 20 É zeelini Davide ʋɔ bɛ Ɠeeɓelɔn, ta zunu ʋuufelegɔiti (20), niiti ti maazaani. Davide daami wola ɠɛʋele ɓɛtɛni ti pɛ bɛ. 21 Aɓenɛɛl ɠɛni Davide ma: «Nà liizu, gè Izelayɛle nuiti pɛ gaalɛ ba ɗa-zobogi wu, màliɠii masagi, minazeɠegi ɠa ɠɛ wo yɔɠɔzu, ɗa masadai ɠɛ, ʋelei nɔpɛ è pɔ la.» Naa ʋoluma Davide yeeɓeni Aɓenɛɛl ʋa, é li ziilɛigi zu.

22 Su la ɠoozani, Zoaɓe ta Davide ná-nuiti ti ɗa unkula, ti zeɠe kɔɔmaʋɛ ta. Ti ʋaani ga ani mɔinmɔin, niiti ti ti zoni kɔɔi zu. Aɓenɛɛl la mɔ ɠɛni Davide ʋɔ bɛ Ɠeeɓelɔn, mazɔlɔɔ Davide ɓeni ba, é li ziilɛigi zu. 23 Siɛgi zu Zoaɓe ta ná-siɛpoluiti ti zeelini la, ti ɠɛni ma: «Nɛɛl ná-doun zunui Aɓenɛɛl ɠɛa ʋaani masagi ʋɔ bɛ, naama ge ɓe ba, é li ziilɛi su.» 24 Zoaɓe liini masagi ʋɔ bɛ, é ɠɛ ma: «Lee ɠa è kɛai? Aɓenɛɛl ʋaaʋɛ è ʋɔ bɛ, ɗɔun è zɛ ná, é li ɓɔɠɔ yeema. 25 È Nɛɛl ná-doun zunui Aɓenɛɛl ɠwɛɛ sɔ! Ni paaʋɛ è ʋɔ bɛ, naa ɠa nɔ ga é è yaava, é è lii ʋeleiti ta è ʋaa ʋeleiti kwɛɛ, naa ʋoluma é naa pɛ kwɛɛ, nii è kɛɛzu.»

26 Zoaɓe ɠulani masagi ʋɔ bɛ, é keelaiti teʋe Aɓenɛɛl ʋolu. Ti Aɓenɛɛl ɠaaɠaleni ma, é zeɠe ziɛyeɠei ʋɔ bɛ zɔligɔ, nii é Sila. Davide ɠwɛɛ faa la ɠɛni naa zu. 27 Aɓenɛɛl ɠalegai ma ma Ɠeeɓelɔn, Zoaɓe liini la dɔɔɠuzu, taai ma ziɠidaʋɛ ɠoozu ʋelei, eɠɛ a ɠɛɛ dɔɔɠuzu vaa wosu naa ma. Ti zeeliai ma miná, Zoaɓe boɠai lɔɔni Aɓenɛɛl ɠogi zu, é paa, nii a kɛ é deɠei Azayɛle ʋaa vai ʋotokula.

28 Davide naama wooi mɛnigai ma, nii kɛai, é ɠɛni ma: «Nà-o, nà-masadai-yo gi-zɔ ge la Nɛɛl ná-doun zunui Aɓenɛɛl zaa vai zu Ɠɔoɠɔ GALAGI ɠaazu eyɛsu ɠɔ. 29 Ma ɠasɔi pɛ ka laazu Zoaɓe ta ná-pɛlɛyeɠei unma! Mavofodai zu mina ʋala pɛ ga: kalaɲa kole nu, ɓaa gee nu, ɓaa nui a ɠɛ zɛlɛsu ga tukpɔi, é ɗa ziɛ, ɓaa nii a za ga boɠa zɔkpɔi, ɓaa nui daamianigi a ɓe ʋalasu zea.» 30 Zoaɓe ta deɠei Aɓisayi ti Aɓenɛɛl ʋaani, mazɔlɔɔ é ti-leɠei Azayɛle ʋaani Gaɓaɠɔn ɠɔɔi zu.

31 Davide ɠɛni Zoaɓe ta kɔɔɠɔ nuiti pɛ ma, ti ɠɛni polu: «À wo ɠɔba zeɠeiti bali ga, wo ɓɔɠɔ maaɠili ga saa wɔlɔ wo seɠei, wo Aɓenɛɛl ná-saa wɔlɔi wo.» Davide ɠɛni ziɛzu pooma ɠesui ʋolu ʋelei. 32 Ti Aɓenɛɛl maaɠuluni Ɠeeɓelɔn, Davide kpeei ɠulani bu. Eyɛsu nuɓusɛiti pɛ ti ɠɛni koba, ti ɗa wɔlɔ. 33 Masagi saa wɔlɔ wuyei nii looni Aɓenɛɛl ma, é ɠɛ ma:

Nuɓusɛiti pɛ ti tɔɔzeini ga wɔlɔa ʋolu. 35 Naa ʋoluma ɛsɛ pɛ ge ɓɔini Davide la ga é daami wo, siɛgi zu foloi ɠɛni ná la dɛ, kɛlɛ é konai nii woni, é ɠɛ ma: «GALA ge sò ná-ziiɠaawanai pɛ su, ni nà ɓulu ɓuɠa ɠila kpalaa miina, ɓaa gè daamiani nɔpɛ mi, foloi ʋa ɠɛ é da.» 36 Nuɓusɛiti pɛ ti faa ɠwɛɛni, é lo naa ʋa, ti va bu, eɠɛʋelei ti ɠɛni vaazu la masagi ɠɛɛ vai pɛ bu. 37 Kɔɔʋɛbɛiti pɛ ta Izelayɛle pɛ ge kwɛɛni naama voloi ga masagi zɔ ge la Nɛɛl ná-doun zunui Aɓenɛɛl ná-saa vai zu.

38 Masagi ɠɛni ná-botiɠɛ nuiti ma: «Wo suɠwɛɛ nɛi ɓaa, ga masa gila ta é ga nu wola ɠila, naa ɠa toai za Izelayɛle? 39 Masa gulɔi ziɛʋɛ mà, kɛlɛ zɛbɛ wola la dɛ zèa. Seluya ná-doun zunui niiti ma, ta ga zɛbɛsu nu wolaiti. Ɠɔoɠɔ GALAGI ɓɔɠɔi faa ɲɔu ɠɛ nui zala, é zoloo ná-faa ɲɔi ma.»

<- 2 Samiyɛle 22 Samiyɛle 4 ->