2 Samiyɛle 19

Davide ná-doun zunui zaa wɔlɔi

1 Masagi ɓɔlɔni ziimaʋɛ naazu, é lɛɛzu ga wɔlɔa pɛlɛ ɠaaɠoozagi wu siɠidaʋɛ, é ɗa ɠɛ ma: «Ee, dòun zunui, Aɓesalɔme, dòun zunui! Ee, dòun zunui, Aɓesalɔme! Ni nɔ̀un gè zaani nɔ è-ʋotogi zu! Ee, Aɓesalɔme, dòun zunui, dòun zunui!»

2 Ti liini, ti ɠɛ Zoaɓe ma: «Masagi ɠa wɔlɔzu, é ɗa ɓɔɠɔ maawɔin Aɓesalɔme ná-faa zu.» 3 Naama voloi ma vɔnifaamai ma ɠoozunɛɛi latini ga saa wɔlɔi nuɓusɛi pɛ bɛ, mazɔlɔɔ ti mɛnini ga masagi ɠaazuɠiliʋɛ ná-doun zunui zaa vai zu. 4 Ma volo ɠilagi nɔ, kɔɔɠɔ nuiti pɛ ti lɛɛni taazuʋɛ ga dɔɔɠui, eɠɛ kɔɔɠɔ nuiti ti ʋelaai kɔɔi ʋa, ti ɗa unfe. 5 Masagi seɠei ʋɛɛni ɠaazu, é ɗa ɠɛ nɔ ma: «Ee, dòun zunui Aɓesalɔme! Ee, Aɓesalɔme dòun zunui, dòun zunui!»

6 Zoaɓe lɛɛni pɔ bɛ pɛlɛi wu, é ɠɛ ma: «È unfegi yeiɗa za ga ɗa-ɠɔɔɠɔ nuiti, niiti ti wo-yɛnvuiti kizoga, ɗa-o, è-loun zunuiti ta è-loun anzanuiti-yo, naa ʋɛɛ è-anzaiti pɛ ba. 7 Niiti ti è wɔinzeɠezu, naati ka è ti nɛɛzu ʋɛ, è naati wɔinzeɠe, niiti ti è nɛɛzu ʋɛ. È dɛa za ga ɗa-ɠɔɔʋɛbɛi ma ɠundiɠiiti ta ɗa-ɠɔɔɠɔ nuiti, naati zɛnvui la ga ani nɔpɛ è ɠaazu. Gè kwɛɛga niina ga ni Aɓesalɔme yɛni vulua, gi pɛ gi za, naa a la nɛɛ è ʋɛ. 8 Wuzeɠe niina, è ɠula mu, è ɓɔɛ ɗa-ɠɔɔɠɔ nuiti pɔ ga iɲɔdɔɔ wooiti. Mazɔlɔɔ gè ɠonaa Ɠɔoɠɔ GALAGI ma ga ni è la ɠulani, nu nɔpɛ ge la yɛga è ʋa za ɓidii. Naa ɠa ɲɔu è ma, é leʋe maanɔɠɔi pɛ ba, niiti ti zeeliai è ma, é zo ɗa-loungo ziɛ su ma, é zeeli za ma.» 9 Masagi ɠulani naazu, é zei siɠidaʋɛ. Ti daazeelini kɔɔɠɔ nuiti pɛ ma ga masagi ɠanu, é zeini siɠidaʋɛ. Ti pɛ ti ɠaalɛɛni ba koba.

Davide ɠale ma vai Zeeluzalɛme

Aɓesalɔme ná-kɔɔɠɔ nuiti ti ʋelani, ɛsɛ ge li ná-pɛlɛ wu. 10 Izelayɛle ʋɛlɛyeɠei pɛ bu nuiti ti ɠɛni ɠɛɛzu ɓɔɠɔ ma: «Masagi ɠa é ade unmɔɔga ade zili nuiti ma, ma un ge da ma ga, tɔ ɠa é ade unmɔɔga Filiseti nuiti ma. Kɛlɛ niizu Aɓesalɔme maaʋele ma, é ʋelaa, é ɠula zooi ʋa. 11 Aɓesalɔme nii ade gulɔi ziaa ma, ga é ɠɛ ga ada-masagi, naa zaa kɔɔi zu. Leeni ɠa mu wo maaɓɔunsu, Davide loli fai zu, é ʋa zei ʋolu ga masagi?»

12 Nii é ɠɛni wosu Izelayɛle yooi zu ná pɛ, Davide mɛnini, é wooleʋe ga ti bo zalaɠa ɠula nuiti ma, Sadɔke ta Aɓiataal, ti ɠɛ ti ma: «À li, wo ɠɛ Zuda wolodai ma ɠundiɠiiti ma: ‹Lee vaa zu wo ɠɛɛzu ga gaaɓela wo ʋaa vai zu ga masagi seizuʋɛ? 13 Wa ga masagi kɛɛɠɛlointi, wo ɠɛ ga zii ɠila, ta ɲama ɠila. Leeni vaa zu mu wa ɠɛ ga nu ɠaaɓela wo ʋaa vai zu ga masagi?› 14 À ɠɛ Amasa ma: ‹Da ga zii ɠila, ta ɲama ɠila. GALA ge sò ná-ziiɠaawanai pɛ su, ni gè la è ɠɛɛni ga kɔɔɠuluɓai Zoaɓe ʋotogi zu.› » 15 Naa maaʋele ma, Davide Zuda nuiti pɛ kigi ɠaaʋoteni ɓɔɠɔ ma eɠɛ nu ɠila nɔ. Ti ɠɛni masagi ma naazu: «Ɠale ma, è ʋa, wa ɗa-wotiɠɛ nuiti.»

Davide Simeyi maavaayɛ fai

16 Masagi ɠaleni ma ʋolu, é zeeli Zuludɛn laaʋɛ. Zuda nuiti pɛ ti liini ga kpizɛi Gilegale, ga ti masagi laaɠomi, é ziɛi leʋe. 17 Geela ná-doun zunui Simeyi, Ɓɛnzamɛn nui nii é ɠɛni ga Ɓaɠulime nui, naa ʋilɛni Zuda nuiti polu, ti li masagi laaɠomisu. 18 Ta Ɓɛnzamɛn nu waagila (1 000) ka ti liini. Sayile ná-pɛlɛyeɠei wu botiɠɛ nui Siɓa liini ɓalaa, ta ná-doun zunu puugɔ maazu lɔɔlugɔiti (15), naa ʋɛɛ ná-botiɠɛ nu ʋuufelegɔ (20) ʋa. Ti pɛ ti yeini ga gaazuvilɛi Zuludɛn laaʋɛ masagi laaɠomisu. 19 Naama ziɛ su, bebei ɗa ziɛi leʋe ga masagi ná-pɛlɛyeɠei, ta é naa ɠɛ, nii nɛai masagi ʋɛ. Masagi Zuludɛn leʋegai ma, Geela ná-doun zunui Simeyi looni masagi ɠɔɠɔwu, 20 é ɠɛ ma: «Màliɠii masagi mina sò ga nà-faaɠaazagi, é mina ɠizɛ su ga foloi é ɠɛni ɠulazu la Zeeluzalɛme ʋa, gè faa ɲɔu ɠɛɛni la, é ʋa naa makɛ yii ma. 21 Mazɔlɔɔ nɛ̀i gè ga ɗa-wotiɠɛ nui, gè suɠwɛɛ ga gè koto ɠɛɛʋɛ, nà ɠa gè ga nu mɔungi Zozɛfe mavofodaiti saama, gè ʋa, gè màliɠii masagi laaɠomi.»

22 Seluya ná-doun zunui Aɓisayi ɠɛni ma naazu: «Simeyi maa la nɛɛni, é ʋa za ɓaa? Tɛigi é masagi voovoai, nii Ɠɔoɠɔ GALAGI gulɔi ziaai ma?» 23 Davide gooɠaaʋoteni, é ɠɛ ma: «Lee ɠa é ade yɔɠɔzu, Seluya ná-doun zunuiti, wa-o, nà-o? Wo liizu ɓɔɠɔ ɠɛɛzu ga sìli nuiti kɛʋele. Za ɠa nɛi ga ku, nii nu ɠa Izelayɛle nui ta ʋaa ma? Ladalai la zèa za ɓaa ga nà masadai ɠɛɛzu dɛ Izelayɛle unda?» 24 Masagi latini Simeyi ma, é ɠonani bɛ, é ɠɛ ma: «È la zaa.»

Mefiɓaale woozuɠula fai Davide ʋɛ

25 Sayile ná-doun loin Mefiɓaale ɓalaa ge liini masagi laaɠomisu. É lɔɔzei naa ɠula voloi ma Zeeluzalɛme ʋa, é zeeli naa ɠale ma voloi ma, Mefiɓaale la ɠɛni ɠaaɓaani kɔɠɔiti ma, é la ɓɛlɛi woni, é la ná-seɠeiti gbani ɓalaa. 26 Seeliai ma masagi ʋɔ bɛ, naa gaazaɠani, é ɠɛ ma: «Mefiɓaale, leeni vaa zu è la ʋilɛni pòlu?»

27 É masagi wooɠaaʋoteni, é ɠɛ ma: «Ee, màliɠii masagi, nà-botiɠɛ nui ɠa é yàavaai, ni naa laade, gè ɠɛni ma: ‹Nà nà-soovalegi ɠɛʋele ɓɛtɛzu, gè zei kɔma, gè ʋilɛ masagi ʋolu, mazɔlɔɔ nà ga maalɛɠɛfɛ nu.› 28 Kɛlɛ nà-botiɠɛ nui ʋaa è ʋɔ bɛ, é zɛɛi ʋɛɛ mà. Kɛlɛ màliɠii masagi, ɗa ga eɠɛ GALA ná-geezuɠeelai. Nii nɔpɛ soloogai è ɠaazu, naa ɠɛ. 29 Kɛ̀wola Sayile ná-pɛlɛyeɠei wu nui tanɔpɛ ge la ɠɛa ani ɠili maaɓɔunsu è ya kɛni saai, kɛlɛ anɛɛ naa ʋe, è yeezeiʋɛ nɔ̀un bu, gè ɠɛ naati saama, niiti ti daami wosu ɗa-laɓalii ɠa. Zobogi ɓɛgele ɠa é bɛ̀ ga gè kpɔba ɠili fali màliɠii masagi ma?»

30 Masagi gooɠaaʋoteni, é ɠɛ ma: «Ɗa-ɓɔɛzuɠula mɔinmɔingi yɛ ná kana, gè deveʋɛ ga wo Sayile ná-zooiti gaaɠwɛ ʋa, wa Siɓa.» 31 Mefiɓaale ɠɛni masagi ma: «Siɓa ti pɛ seɠe vɔlɔ ʋɛ. Tɛi nɔ màliɠii masagi ɠalesu ma ga ʋagɔ, naa ɠa gè ɠɛa pɔ.»

Davide Ɓaalezilayi mɛɛin vee vai

32 Galaade nui Ɓaalezilayi ɓalaa zeɠeni Lɔgɛlime, é ʋa masagi ʋuuzu ga pele Zuludɛn ziɛlaʋɛ, ta é vali naa ma ziɛlaʋɛ. 33 Kona ʋuulɔsaʋa (80) ɠɛwola ʋɔlɔ ɠɛni de. Tɔ ɠa é ɠɛni masagi ɓɛdɛma vai pɛ gaaɠulazu ba, naa ɠɛai ma Maɠanayime, tɔɔzei é ɠɛni ga kpɛtɛ nu wola. 34 Masagi ɠɛni Ɓaalezilayi ma: «Ʋilɛ pòlu, de ziɛi ɓudɛ, de li Zeeluzalɛme, nà è ɓɛdɛma vai pɛ gaaɠula ba pɔ̀ bɛ.»

35 Kɛlɛ Ɓaalezilayi gooɠaaʋoteni, é ɠɛ ma: «Sìi ma ɠonagi yɛga ʋoluzu ga dielegɔ, gè ʋilɛsu è ʋolu, de li Zeeluzalɛme? 36 Kona ʋuulɔsaʋa (80) ɠa é zèa, gè la mɔ zoosu gè ʋa ani ʋagɔi ta ani ɲɔi yɔɠɔzuɠula. Nɛ̀i gè ga ɗa-wotiɠɛ nui, gè la vɔlɔ zoosu gè ʋa naati ta-nɛɛi yɔɠɔzuɠula, niiti gè ti miizu, ta niiti gè ti ɓɔlezu. Gè la zoosu ɓalaa gè ʋa guye loo zunuiti ta guye loo anzanuiti goo ʋaaɠulaba ɠa. Lee vaa zu nà li ɠɛɛzu ga màliɠii masagi unma ɠasɔ? 37 Nà Zuludɛn ɓudɛzu nɔ, de lago li. Gè la ɠite kwɛɛ lee vaa zu masagi ɗa li mɛ̀ɛin veezu ɠani. 38 Va bu, nɛ̀i gè ga ɗa-wotiɠɛ nui, gè ɠale ma nà-pɛlɛi wu, gè za nà-taazu, kɛ̀ɛ ta dèe ta-ɠabaiti koba. Wɛlɛ ɗa-wotiɠɛ nui Kimeɠame ʋa, toɠa yɛsu è ʋolu, nii nɔpɛ è pɔ è kɛ bɛ̀ ga ma ʋagɔ, naa ɠɛ bɛ.» 39 Masagi ɠɛni ma: «Zèe ɠa bu, ɓɛ Kimeɠame ʋilɛ pòlu, nii nɔpɛ è pɔ, nà kɛ bɛ. Nii nɔpɛ wɔin è ma, nà kɛ è ʋɛ.»

40 Ɛsɛ pɛ ge Zuludɛn ɓudɛai ma, masagi ɓalaa kpudɛai ma, é Ɓaalezilayi nɛɛnɛni ga daaʋɛ komagai, é tuya loo bɛ. Naa ʋoluma Ɓaalezilayi ɠaleni ma ná-taazu. 41 Masagi liini ga Gilegale ʋele, Kimeɠame ɠɛni polu. Zuda ɠɔɔʋɛbɛi pɛ, ta Izelayɛle ɠɔɔʋɛbɛ ɠilazuʋɛ pɛ ge ɠɛni ná, siɛgi zu masagi ɠɛni Zuludɛn ɓudɛzu la.

Maaɠaalii lɔɔ vai
Zuda ta Izelayɛle yɔɠɔzu

42 Kɛlɛ Izelayɛle nuiti ti maaɓuɠani masagi ʋa, ti ɠɛ ma: «Lee vaa zu gi-ɠɛɛlointi Zuda nuiti ti ʋaai, ti è zeɠe dɔɔɠuzu, ti Zuludɛn ɓudɛ ga ɗe, ɗa-o, ɗa-ʋɛlɛyeɠei-yo, ta nuɓusɛi niiti pɛ ti ɠɛa è ʋolu?» 43 Zuda nuiti ti ti wooɠaaʋoteni, ti ɠɛ ma: «Gá-o, masagi-yo, gi ɓɔgɛ é leʋe wo ʋa. Toɠa ɠale wo yiiɠaawanazu naazu? Gi zɛlɛ ka bogai masagi ʋa ɓaa? Ɓaa vebɛani ɓɛgele ɠa é fea gi ya?» 44 Izelayɛle nuiti ti ɠɛni ma: «Masagi ɠa ga gɔnɔ ná zeizu ɠɛ puu, é leʋe wo ʋa, gi leve ɠa Davide ɓɔɠɔi ma, é leʋe wo ʋa. Toɠa ɠale mu, wo gi ʋɛlɛlalazu ɠani? Gɛi gi ɠɛa ga nu mɔungi, gi ɠɛ ma: ‹Ade ʋa ga ada-masagi.› » Kɛlɛ Zuda nuiti ta-wooɠaaʋotegi yeeɠaaɓaani, é leʋe Izelayɛle nuiti tɔnɔi ʋa.

<- 2 Samiyɛle 18 2 Samiyɛle 20 ->