1 Ayitofɛle ɠɛni Aɓasalɔme ma: «Ɓe gè yeelo nu waapuugɔ maazu felegɔ (12.000) ʋa, gè ʋilɛ Davide ʋolu za ɓidii nɔ. 2 Nà zeelizu ma siɛgi zu kpɔlɔai la, zɛbɛ la mɔ zea. Nà faazupui ʋilisu pɔ bɛ. Niiti kpein ti polu, naati ti ɓizɛ, gè masagi ɠila nɔ ʋaa. 3 Naa ʋoluma gè ɠale ma ga nuɓusɛiti pɛ. Mazɔlɔɔ ni zunui naa a zaana, nii è gaiziɛzu, nuɓusɛiti pɛ ta ɠale ma è ʋɔ. Ti zei ziilɛigi zu.» 4 Naama wooi zolooni Aɓasalɔme ta Izilayɛle nu wolaiti pɛ ma.

5 Aɓasalɔme ɠɛni ma: «Aaleke nui Ɠusayi loli dɛɛ, ade tɔ ɓalaa goomɛni.» 6 Ɠusayi lɛai ma Aɓasalɔme ʋɔ bɛ, Aɓasalɔme gaazaɠani, é ɠɛ ma: «Wɛlɛ nii ɠa Ayitofɛle boga, gi naa ɠɛ, nii é bogai, ɓaa ɠigi taɠili ka è ʋɛ?» 7 Ɠusayi Aɓasalɔme wooɠaaʋoteni, é ɠɛ ma: «Niima gelei zu, Ayitofɛle ná-tɛnɛ gooi la ʋani.» 8 Ɠusayi ɠɛni ma: «È è-ɠɛɛ ɠwɛɛ sɔ ta ná-nuiti! Ta ga zɛbɛsu zalaʋusuiti, ti vilɛʋɛ eɠɛ zuluɓui, nii ma yiʋoi ɠulaai zea dɔɓɔi zu. È-ɠɛɛ ɠa ga kɔɔɠɔ nui, é la ʋaazu kpidii ɠɛɛzu nuɓusɛiti saama. 9 De ɓɔɛzu ɠani, toɠa ɠɛ lɔɔɠua kɔtu yeɠei ta zu, ɓaa adɛ taɠili. Ni tɔ ɠa zeina ga ɗa-ɠɔɔɠɔ nui tanigaa ti zaana ti ya, ma wooi ga mɛni é wo ga: ‹Aɓasalɔme ná-nuiti ti loa bu.› 10 Naazu, anɛɛ zɛbɛsu zalaʋusui, niiti zala yii ti ɠoozu, naati pɛ ta ɠɛ iɲɔteʋei zu. Mazɔlɔɔ Izilayɛle pɛ ge kwɛɛ ga è-ɠɛɛ ɠa ga kɔɔɠuluɓa wolai, ta kɔɔɠɔ nu wolaiti ta ba. 11 Nà pɔ ga Izilayɛle nuiti pɛ ti ɠaalɛ ba è ɠoba, é zo Dan, é li Ɓeel-Seɓa, ɗa-ɠɔɔʋɛbɛi ɠa mɔin eɠɛ kpoloɗɛi laaʋɛ ma ɲaɠaegi. Ɗa ɓɔɠɔi è lo ti luɠɔ kɔɔɠɔzuʋɛ. 12 Ada zeelizu Davide ma adɛ ta, ʋɛ dɔɔɠuai ná, ade loo ma, eɠɛʋelei nɔɗai a ɗa ʋɛɛ la zooi ma. Tɔ-o, ná-siɛpoluiti-yo, tanɔpɛ ge la ɠula ade ya. 13 Ni a lɔɔɠuna taai ta zu, Izilayɛle nuiti pɛ ta ʋa ga galuiti, ade taai naa mɛɛn pɛtugi zu, é kobaʋɛ, eyɛsu kɔtu ɠila kpalaa ge mina mɔ ɠɛ ná.»

14 Aɓasalɔme ta Izilayɛle nuiti pɛ ti ɠɛni ma: «Aaleke nui Ɠusayi ná-tɛnɛgi vizɔgɛ, é leʋe Ayitofɛle nɔnɔi ʋa.» Mazɔlɔɔ Ɠɔoɠɔ GALAGI deveni ga é Ayitofɛle ná-tɛnɛ pagɔi loo bu, nii a kɛ é ʋa ga maanɔɠɔi Aɓasalɔme ma.

15 Ɠusayi liini zalaɠa ɠula nuiti Sadɔke ta Aɓiataal ʋɔ bɛ, é Ayitofɛle ná-tɛnɛ gooi laazeeli ti ma, ta nii tɔ ɓɔɠɔi é bogai Aɓasalɔme ta Izilayɛle nu wolaiti pɛ ma. 16 É ɠɛni ti ma ʋolu: «À nu leʋe fala Davide ma, é bo ma ga, é mina ɲi za teʋebai zu ziɛ maaleʋesuʋɛ ɠobaʋɛ, kɛlɛ é Zuludɛn ɓudɛ, é li poun, nii a kɛ ti mina za ta ná-siɛpoluiti.»

17 Zonatan ta Ayimaase ti ɠɛni En-Lɔgɛle, botiɠɛ anzanui gila ge ɠɛni liizu, é ɗa keela wooi wo ti ma, nii maanɛɛni ga ti li, ti bo Davide ma. Mazɔlɔɔ ti maa la ɠɛni nɛɛni ga ti lɛ taazuʋɛ, naa ɠa a kɛ nu mina ti ɠa. 18 Kɛlɛ zunu loungo ɠila ge ti ɠaani, é li, é bo Aɓasalɔme ma. Keela felegɔiti ti liini ga gaazuvilɛ, ti liini, ti lɛ Ɓaɠulime zunui ta ná-pɛlɛ wu. Ziɛyeɠe ɠɛni ná-koizuʋɛ, ti lɔɔɠuni zeɠei naa zu. 19 Pɛlɛ deei seɠe wolai zeɠeni, é pɛɛ zeɠei la, é ani ɠae ziɠai ʋuuni ma, nu nɔpɛ ge la ɓena gaaɠa ga ani ɠa ná.

20 Aɓasalɔme ná-keelaiti ti ʋaani anzanui naa ʋɔ bɛ, ti ɠɛ ma: «Mini ɠa Ayimaase ta Zonatan ti ná?» Anzanui ti wooɠaaʋoteni, é ɠɛ ma: «Ti ziɛi ɓudɛa.» Ti naati gaiziɛni, kɛlɛ ti la ɠɛni Ayimaase ta Zonatan ɠaani. Ti ɠaleni ma Zeluzalɛme.

21 Ti liai ma, Ayimaase ta Zonatan ti ɠulani ziɛyeɠei zu, ti li, ti keela wooi wo Davide ma. Ti Ayitofɛle ná-tɛnɛ gooi laazeelini Davide ma, nii é boni daalɔɠɔma. Naa ʋoluma ti ɠɛni ma: «À wuzeɠe, wo ziɛi ɓudɛ ga suvilɛ.» 22 Davide ta nui niiti kpein ti ɠɛni polu, ti Zuludɛn ɓudɛni. Geelaalaosuʋɛ kaani ga ti pɛ ti leʋega.

23 Ayitofɛle kaai ma ga ná-tɛnɛ gooi la zoni, é lɛɛni ná-soovalegi ɠɔma, é li ná-taazu. Kpegai ma ga vali ná-pɛlɛ wu nuiti ma, é ɓɔɠɔ zɛlɛni, é za, ti maaɠulu kɛɛɠɛ ná-kabai zu.

24 Davide zeelini Maɠanayime. Aɓasalɔme ta Izilayɛle ɠɔɔɠɔ nuiti pɛ ti Zuludɛn ɓudɛni. 25 Aɓasalɔme Amasa ɠɛɛni ga ná-kɔɔɠuluɓai, Zoaɓe ʋotogi zu. Amasa tɔna ge ɠɛni ga Izilayɛle zunui ta ná-doun zunu, nii daa ɠɛni ga Yitila. Amasa dee laa ɠɛni ga Aɓigayile, Naɠase ná-doun anzanui, nii é ɠɛni ga Zoaɓe dee Seluya baazeelai. 26 Izilayɛle nuiti ta Aɓasalɔme ti ta-ɠɔɔlaaɠai ʋuuni Galaade yooi zu.

27 Davide zeeliai ma Maɠanayime, zunui tanigaa ti daaɠomini: Naɠase ná-doun zunui Soɓi, é ga Laɓa nui, Amɔn nuiti ta-laa wolai, ta Lodeɓaal nui Amiyɛle ná-doun zunui Makiil, naa ʋɛɛ Ɓaalazilayi ʋa, Logɛlime nui Galaade yooi zu. 28 Zunui niiti ti ʋaani ga daama aniiti, ta aniɲakaiti, ta diɠiiti, ti ʋa ga moloi nii é ga ɓeleegi ta wɔɔlezegi, ti ʋa ga ɓulu vukɔi, ta ani ɠae ɠeegaiti, ti ʋa ga tɔɠɔ ɓaazagiti ta ma ʋɛlɛʋɛlɛgi. 29 Ti ʋaani mɔnɔ ga kɔin gulɔi, ta nikɛ ɲiimiɗɛi ma wulɔi, naa ʋɛɛ folomazegi ʋa, ta baalagiti. Ti naati pɛ feeni Davide ta ná-nuɓusɛiti zea, nii a kɛ ti laami, mazɔlɔɔ ti ɠɛni ɠɛɛzu ɓɔɠɔ ma: «Numai niiti ti ɓɔlɔa ga siɛi ti boga teʋebai zu, pului ta kpɔɔle wɔin ɠana ti ma.»

<- 2 Samiyɛle 162 Samiyɛle 18 ->