1 Naa ʋoluma Amɔn masagi zaani, ná-doun zunui Ɠanun zei potogi zu ga masagi. 2 Davide ɠɛni ma: «Nà wooɠɛɠilada ɠɛɛzu Ɠanun ʋɛ, eɠɛʋelei kɛɛɠɛ Naɠase wooɠɛɠiladai ɠɛni la bɛ̀.» Davide ná-botiɠɛ nui tanigaa leʋeni ga ti ɓena fe bɛ kɛɛɠɛ zaa vai zu. Siɛgi zu Davide ná-botiɠɛ nuiti ti zeelini la Amɔn yooi zu, 3 Amɔn lotuɠɔiti ti ɠɛni ta-masagi Ɠanun ma: «Ɗa kaazu ga è-ɠɛɛ ná-lɛbiya ɠa é kɛɛzu Davide gaanɛɛnɛ nua leʋesu la è ma ɓaa? Taai ɠwɛɛ fai ta pɛtɛ fai laade ɓaa, nii a kɛ ti ʋa koloɠolo yeeta?»

4 Ɠanun Davide ná-keelaiti soni, ti ti-ɓɛlɛiti gilazuʋɛti bo, ti ti ɠɔba zeɠeiti teʋega, é zo bu, é lɛ ti-zaamaʋɛ letemaʋɛ, ti ɓe ti ʋa, ti ɗa li. 5 Davide mɛnini nii kɛai. É keela leʋeni ti luɠɔ, mazɔlɔɔ naati ti wola unfeni. É ɠɛ ti ma: «À yɛ Zeeliko eyɛsu wo-ɓɛlɛiti ti lɛ ʋolu, wa ʋa niina.»

6 Amɔn nuiti ti kaani ga ti ɓɔɠɔ wɔinzeɠea Davide ma. Ti salaʋusuiti gaiziɛni zou ɠiligaa zu: salaʋusu waaʋuufelegɔ (20 000) Siili nuiti saama ti Ɓɛte-Leɠɔɓe, ta Sɔɓa, salaʋusu waagila (1 000) Maaka masagi ʋɔ bɛ, ta salaʋusu waapuugɔ maazu felegɔ (12 000) Tɔɓe ʋɔ pelei. 7 Davide mɛnigai ma, é Zoaɓe leʋeni ti laalɔɠɔma, ta Izelayɛle ɠɔɔʋɛbɛiti pɛ.

8 Amɔn nuiti ti ɠulani, ti lo kɔɔɠɔ vai ma, ta-laa wolai laaʋɛ. Siili zalaʋusuiti, niiti ti zeɠeni Sɔɓa ta Leɠɔɓe ta Tɔɓe, é ʋɛɛ Maaka zalaʋusuiti ba, naati pɛ ti ɠɛni loni yɛ kɔɔ lɔɓɔi zu. 9 Zoaɓe kaai ma ga kɔɔɠɔzuʋɛ ɠa fele ʋɔɔma, ʋelelaʋɛ ta ʋoluzu ʋelei, é yeeloni kɔɔɠɔ nu ɠɛzɛɠɛzɛgiti ba, é ti ʋilɛ Siili nuiti daawu kɔɔɠɔ vai ma. 10 É kɔɔʋɛbɛi mɔtai ma lotuɠɔlai ɠalivaani kɛɛɠɛloin Aɓisayi ma, naati ti lo Amɔn nuiti daawu kɔɔɠɔ vai ma. 11 Zoaɓe ɠɛni kɛɛɠɛloin Aɓisayi ma: «Ni Siili nuiti zeevi ka mɔinna mà, ɗa ʋa, è ɓɔ bà. Ni Amɔn nuiti zeevi ka mɔinna è ma, nà ʋa, gè ɓɔ è ʋa. 12 Zɛbɛzeɠe, ade kɔɔi ɠɔ, de da-nuɓusɛiti maalobo, ta da-ƓALAGI ná-taaiti. Ɠɔoɠɔ GALAGI naa ɠɛ, nii pagai gaazu!»

13 Zoaɓe ta ná-kɔɔʋɛbɛi ti lopele ɓɛtɛni kɔɔɠɔ vai ma, Siili nuiti daalɔɠɔma, naati ti ʋelani ba. 14 Amɔn nuiti ti kaai ma ga Siili nuiti ti ʋela, tiya ɓalaa ti ʋelani Aɓisayi ʋa, ti li ta-laazu. Zoaɓe zeɠeni Amɔn nuiti polu, é ɠale ma Zeeluzalɛme.

15 Siili nuiti ti kaai ma ga Izelayɛle nuiti ti vɔniga ti ma, ti ta-ɠɔɔʋɛbɛi pɛ gaalɛɛni ba. 16 Masagi Ɠadadeezɛɛl keela leʋeni, ga ti Siili nui zɔiti gaalɛ ba, niiti ti ziɛ wolai Ufelate ʋolu ʋelei. Ɠadadeezɛɛl ná-kɔɔɠuluɓai Sɔɓake loni ti luɠɔ, ti zeeli Ɠeelame.

17 Davide faa ɠwɛɛgai ma su, é Izelayɛle ɠɔɔɠɔ nuiti pɛ gaalɛɛni ba, ti Zuludɛn ɓudɛ, ti li Ɠeelame. Siili nuiti ti ɠɛʋele ɓɛtɛni ga ti vala Davide ʋa, ti kɔɔi lɔɔzeini. 18 Kɛlɛ ti ʋelani Izelayɛle nuiti ba. Davide kɔɔɠɔ wotolo undɔfela (700) zu zalaʋusuiti paani, ta soo ɓizɛ zalaʋusu waaʋuunaanigɔ (40 000). Zeezeelini ɓalaa ta-ɠɔɔɠuluɓai Sɔɓake ma, naa za náʋɛ. 19 Tɛi masagi niiti kpein ti ɓɔni Ɠadadeezɛɛl ʋa, ti kaani ga Izelayɛle ziaa ti wu, ti ziilɛigi ɠaiziɛni yɔɠɔzu ta Izelayɛle, ti ɠolo Izelayɛle ʋɛ. Naa ʋoluma Siili nuiti ti ɠɛni luazu ga ti ʋa li ɓɔsu Amɔn nuiti ba.