Link to home pageLanguagesLink to all Bible versions on this site

1 Yeɠoyakime ná-siɛgi zu, Ɓaɓilɔne masagi Neɓukadenɛzaal kɔɔi valani ba, naa zei unga kona saʋagɔ laawu, naa ʋoluma é ɓaka naa ya ʋolu. 2 Naazu, Ɠɔoɠɔ GALAGI toosu nu ɓulugiti buzeɠeni daalɔɠɔma, tanigaa ti zeɠe ga Ɓaɓilɔne yooi zu ʋele, tanigaa Siili, tanigaa Moaɓe ʋele ta Amɔn ʋele, nii a kɛ Zuda masadai zeɠe ná, eɠɛʋelei é puuni la ná-botiɠɛ nuiti GALA goo wo nuiti da la, ti bo. 3 Naama maanɔɠɔi pɛ ge ʋaani ga Ɠɔoɠɔ GALAGI ná-devei maaʋele, mazɔlɔɔ é ɠɛni pɔ ga é Zuda ɓɛ ɠoba poun, tɔɔzei kotoi kpein faa ʋa Manasé kɛɛni. 4 Mazɔlɔɔ é sɔbalala nu mɔinmɔin paani, ti-ma ɲamai Zeluzalɛme laave, Ɠɔoɠɔ GALAGI la mɔ ɠɛni pɔ é ʋa maavaayɛ bo.

5 Yeɠoyakime ná-kɛɛwotii mɔtaiti, ta nii kpein é kɛɛni, naati sɛʋɛʋɛ Zuda masagiti ta-ɠɛɛwoti zɛʋɛi zu. 6 Yeɠoyakime zaani. Ná-doun zunui Yeɠoyakin ɠa é masadai ɠɛɛni potogi zu. 7 Naama ziɛgi zu Ezipete masagi la mɔ ɠɛni ɠulazu ná-zooi ʋa, mazɔlɔɔ ʋɛ kpein ná ɠɛni zea mɔungi, Ɓaɓilɔne masagi mináti kpein kulani zea, é zo kɔtuɗɛi ma é Ezipete you ɠwɛgi ma lɛkpɛmaʋɛ nu ɠɔʋɛzu ʋelei, é zeeli Ɓaɓilɔne ɗɛ wolai Efelate ma.

Zuda masagi Yeɠoyakin
(2 Dɔlɔ Sɛʋɛi 36:9-10)

8 Yeɠoyakin ná-konagi ɠɛni ga puugɔ maazu lɔsaʋa (18), siɛgi zu é zeini la ga masagi. Alu saʋagɔ ɠa é kɛɛni masadai zu Zeluzalɛme. Dee laa ɠɛni ga Newuseta, Zeluzalɛme nui Ɛlɛnatan ná-doun anzanui ɠɛni de. 9 É Ɠɔoɠɔ GALAGI wanama vai ɠɛɛni fai pɛ su, eɠɛʋelei nɔ kɛɛɠɛ kɛɛni la.

Zeluzalɛme zei vai kɛlɛ su
10 Naama ziɛgi zu, Ɓaɓilɔne masagi Neɓukadenɛzaal ná-salaʋusuiti ti lɛɛni Zeluzalɛme laalɔɠɔma, ti ná zei kɛlɛ su. 11 Ɓaɓilɔne masagi Neɓukadenɛzaal ʋaani taa loaʋɛ, názu ná-salaʋusuiti ti taai zeiɗai na kɛlɛ su. 12 Názu ɠa Zuda masagi Yeɠoyakin ɠula la taai ʋa, ta dee, ta ná-salaʋusu ɠundiɠi wolaiti, ta ná-lada nuiti, ti ɓɔɠɔ ve Neɓukadenɛzaal ya, naa ti ɠɛ ga kasoɠa nuiti, Neɓukadenɛzaal ná-kona dɔsaʋasiɛi ma ɠɛni de masa fai zu. 13 É liini ga Ɠɔoɠɔ GALAGI zei ʋɛlɛi wu naavoloi pɛ, ta masagi ná-pɛlɛi wu naavoloi pɛ, é zanu sɔɔlaiti pɛ kpezeɠeleni, niiti Izilayɛle masagi Salomɔn ti ɓɛtɛni. Ʋele ɠana Ɠɔoɠɔ GALAGI laawooi laazeelini la, nii é boni. 14 É liini ga Zeluzalɛme nuɓusɛiti pɛ, kundiɠiiti pɛ, ta salaʋusuiti pɛ, ta ɲɛɛliɠi ɠɛ nuiti pɛ, ta ɠain bo nuiti pɛ, ti pɛ kpɔga ɠɛni ga nu waapuugɔ (10.000), niiti ti liini duɔlai zu, zeaɲaka nuiti nɔ ɠa ti yɛni zooi zu. 15 Neɓukadenɛzaal Yeɠoyakin zeɠeni Zeluzalɛme, é lii la Ɓaɓilɔne, ta dee, ta anzaiti, ta ná-botiɠɛ nu wolaiti, ta zooi ná-zɛbɛsu nuiti. 16 Ɓaɓilɔne masagi liini ɓalaa ga salaʋusu waadɔfelaiti (7.000), ɲɛɛliɠi nuiti ta ɠain bo nuiti kpɔga ɠɛni ga waagila (1.000), ta kɔɔɠɔ nuiti ti ɠalagai kɔɔi zu. 17 É Yeɠoyakin kɛɛ kɛɛɠɛloin Matania zeini ga masagi naa ʋotogi zu, é daaseigi maavalibo ga Sedesiyase.
Zuda masa gaaɓelagi Sedesiyase
(2 Dɔlɔ Sɛʋɛi 36:11-12;
Zelemi 52:1-3)

18 Sedesiyase ná-konagi ɠɛni ga puufele maazu ɠila (21), siɛgi zu é zeini la ga masagi. Kona puugɔ maazu ɠila (11) ka é kɛɛni masadai zu Zeluzalɛme. Dee laa ɠɛni ga Ɠamutal, Liɓina nui Zelemi ná-doun anzanui ɠɛni de. 19 É Ɠɔoɠɔ GALAGI wanama vai ɠɛɛni ga Yeɠoyakime ɠɛʋele fai pɛ su. 20 Niima vaiti kpein ti ɠɛɛni mazɔlɔɔ Ɠɔoɠɔ GALAGI yiiɠaawanani Zeluzalɛme ta Zuda yooi pɛ ma, ta é ɠɛni pɔ ga é ti ɓɛ ɠoba poun.

Sedesiyase ɓakani Ɓaɓilɔne masagi laalɔɠɔma.

<- 2 Masagiti 232 Masagiti 25 ->