1 Aɠaze ná-kona puugɔ maazu velesiɛi (12) ma masadai zu Zuda unda, Ela ná-doun zunui Wozé zeini Izilayɛle unda ga masagi Samali. Kona taaʋuugɔ ɠa é kɛɛni masadai zu. 2 É Ɠɔoɠɔ GALAGI wanama vai ɠɛɛni, kɛlɛ é la ɠɛni zeelini Izilayɛle masa mɔungiti su, ti leʋegai tɔun tuɠɔ.

3 Asiili masagi Salamanazaal lɛɛni, é kɔɔi vala ba. Wozé lɔɔni zeezu, é ɗa maazoloo ganii zala ma. 4 Kɛlɛ Wozé yaavai ɠilini Salamanazaal ma. É keela leʋeni Ezipete masagi ma, Sayise, ta é la mɔ ɠɛni kɛɛzu é ʋa kona gilagila maazoloo ganii zala Asiili masagi ma. Salamanazaal naa zuɠwɛɛgai ma, é Wozé zoni, é pili kasoi ɠa. 5 Naa ʋoluma é zooi ná pɛ suɓizɛni, é ʋa, é Samali zei kɛlɛ su kona saʋagɔ laawu. 6 Wozé ná-kona taaʋuusiɛi ma masadai zu Izilayɛle unda, Asiili masagi Samali zoni, é li ga Izilayɛle nuiti Asiili duɔlai zu, é ti zei Ɠala, ta Gozan ɗɛi Ɠaɓɔɔl ɠobaʋɛ, ta Mɛde nuiti ta-laa wolaiti su.

7 Niima vai ɠɛɛni mazɔlɔɔ Izilayɛle nuiti ti kotoi ɠɛɛni ta-ƓALAGI Ɠɔoɠɔ GALAGI laalɔɠɔma, nii é ti ɠulani Ezipete, Falaɠɔn ná-duɔlai zu. Naa ʋoluma niima vai ɠɛɛni mazɔlɔɔ ti gala kiligiti dɛbini. 8 Ti ʋilɛgɛ zii naati kɛzɔgiti polu, niiti Ɠɔoɠɔ GALAGI ti ɓɛɛni Izilayɛle luɠɔ. ta tuʋa ʋelei niiti Izilayɛle masagiti ti ti lɔɔni zooi zu. 9 Izilayɛle nuiti ti naa ɠɛɛni dɔɔɠuzu ta-ƓALAGI, Ɠɔoɠɔ GALAGI laalɔɠɔma, nii maa la nɛɛni nu ʋa kɛ. Ti zalaɠa ɠula adaʋɛti kpɛtɛʋɛ ɓɔɠɔ ʋɛ taa wolaiti kpein su, é tɔɔzei taa maaɓɛɛ nuiti seizuʋɛti ma, é li taa wolaiti pɔ niiti siɠigi ti ma. 10 Ti sale ɠɔtuiti ta sale wuluiti kpadɔʋɛ gizeiti kpein ma, ta gulu wunduiti kpein bu. 11 Mináti ka ti ɠɛa ansansegiti galazu ná, ga zii naati kɛʋele niiti Ɠɔoɠɔ GALAGI ti ɓɛɛni ti luɠɔ. Ti faa ɲɔiti kɛɛni, niiti ti Ɠɔoɠɔ GALAGI yiiɠaawanani. 12 Naa ʋoluma ti lɛbiyai veeʋɛ kɔɔɠɔ ganigiti bɛ, tama Ɠɔoɠɔ GALAGI tɔgi zeini ti ma ga ti mina naa ɠɛ.

13 Ɠɔoɠɔ GALAGI Izilayɛle nuiti ta Zuda nuiti tɛnɛni ga GALA goo wo nuiti pɛ ta wozaɠa nuiti pɛ maaʋele, é ɠɛ ti ma: «À zeɠe wa-ɠɛɛwoti ɲɔiti polu, wo nà-deveiti ta nà-tɔgiti so, niiti gè ti zɛʋɛai tɔ sɛʋɛi zu, gè ti ve wo-ɠɛɛni zea ga nà-botiɠɛ nuiti maaʋele, GALA goo wo nuiti.» 14 Kɛlɛ nui niiti ti la ɠɛni kɛɛni ti ʋa woilo naa ma, nii ti ɠɛni bosu ti ma, ti kikpaai ɠɛɛni ga ti-ɠɛwolani kɛʋele, niiti ti la ɠɛni laani ta-ƓALAGI, Ɠɔoɠɔ GALAGI la. 15 Ti ɠɛlɛni ná-tɔgiti ba, ta minazeɠegi é kɛɛni ti yɔɠɔzu ta ti-ɠɛɛni, naa ʋɛɛ tɛnɛgiti ba é boni ga tiye. Ti ɓɔɠɔ ɠilini kɛzɛsulala ɠalagiti ba, tiya ɓɔɠɔi ti ɠɛ ga kɛzɛsulala nuiti. Ti ʋilɛni zii naati sɔgiti polu, niiti Ɠɔoɠɔ GALAGI ɠɛni ti ma: «À mina ʋokɔɠɔ ti ma.» 16 Ti ɠɛlɛni ta-ƓALAGI, Ɠɔoɠɔ GALAGI ná-tɔgiti ba, ti nikɛ yiʋo felegɔ ɓɛtɛ ɓɔɠɔ ʋɛ ga kɔlu ɠaawuungai, ti sale wului ɓadɔ, ti ɗa nɔkɔ foloi, ta alugi, ta somideɠaiti bu, ti ɗa lɛbiyai ve Ɓaale ʋɛ. 17 Ti ɗa ti-loun zunuiti ta ti-loun anzanuiti gala abui zu ga zalaɠai, ti ɗa ungaiziɛ vaiti ta adɔɓɛɛ vaiti kɛ, ti ɗa ɓɔɠɔ ve Ɠɔoɠɔ GALAGI wanama vai ɠɛɛ vai ya, nii a kɛ ti naa yiiɠaawana. 18 Naa ɠa é kɛɛni Ɠɔoɠɔ GALAGI wola yiiɠaawanani la Izilayɛle ma, é la mɔ pɔ ga é ti ɠa ga ɠaazu, tɔ ɠa é kɛa Zuda wolodai ɠila nɔ ɠa zɛgai ná.

19 Zuda nuiti ɓalaa ti la ɠɛni Ɠɔoɠɔ GALAGI ná-tɔgiti soni. Ti ziɛni ga Izilayɛle nui zɔiti kɛzɔgiti kɛʋelei. 20 Ɠɔoɠɔ GALAGI ɠɛlɛa Izilayɛle mavofodaiti pɛ ba, é ti unfe, é ti lɔ toosu nuiti zea, é ti ɓɛ ɠoba.

21 Siɛgi zu é Izilayɛle ɠulani la Davide ná-pɛlɛyeɠei ya, ti Neɓate ná-doun zunui Zeloɓoame zeini ga masagi, Zeloɓoame naa ma ge ti zeɠe Ɠɔoɠɔ GALAGI ʋa, é Izilayɛle li koto wolai ma, ti kɛ. 22 Izilayɛle nuiti ti ɓɔɠɔ veeni Zeloɓoame ná-kotoiti zea, ti la kɛɛni ti ʋa zeɠe ti ʋolu pɛ, 23 eyɛsu Ɠɔoɠɔ GALAGI yiiɠaawana Izilayɛle ma, é kpɛ ɠaazu, eɠɛʋelei nɔ é boni la, é ɠula ná-botiɠɛ nuiti kpein da, GALA goo wo nuiti. Izilayɛle ɠulaʋɛ ná-zooi ʋa, é li poun duɔlai zu Asiili yooi zu ʋɛ, zɛgai ná zaaɠaza.

24 Asiili masagi nuiti seɠeni taa wolai niiti su: Ɓaɓilɔne, Kuta, Ava, Ɠamate, ta Sefaalavayime, é ti zei ga keɠaaɓa Samali laa wolaiti su, Izilayɛle nuiti potogi zu, niiti ti liini ga tiye duɔlai zu. Ti Samali zoni ga tɔnɔ, ti zei ná, ta ma laa wolaiti su. 25 Ti tɔɔzeiɗai ma ga zeiɗa ná, ti la ɠɛni Ɠɔoɠɔ GALAGI lɛbizu. Ɠɔoɠɔ GALAGI zalaiti teʋeni ti laalɔɠɔma, ti nu mɔinmɔin paa ti zaama. 26 Ti liini, ti ɠɛ Asiili masagi ma: «Nui niiti è liai ga tiye, é ti zei Samali laaiti su, ti la naama ƓALAGI lɛbi ʋelei ɠwɛɛ. Tɔ ɠa é kɛa naa zalaiti teʋega ti laalɔɠɔma, ti ɗa ti ʋaa.» 27 Masagi devei veeni ga ti zalaɠa ɠula nui gila gaaɠale ma ná, niiti ti ɠɛa zeini ná pɔlɔma, ti liai duɔlai zu, ga é li, é zei ná, é ti ɠala ga naama ƓALAGI lɛbi vai. 28 Naa ɠa é kɛɛni zalaɠa ɠula nui niiti ti ti ɠulani Samali ʋa, ti li ga tiye duɔlai zu, naa gila ge ɠaleni ma, é li, é zei Ɓetɛle, é ɗa nui naati kala ga Ɠɔoɠɔ GALAGI lɛbi ʋelei.

29 Kɛlɛ zii ɠiligi naati ɛsɛ pɛ ge ɓɔɠɔ ɠala kpɛtɛni, ti ti ʋilɛ zalaɠa ɠula adaʋɛti ma ʋɛlɛiti bu, ʋɛti Samali nu wɔlɔmaiti ti náti toni. Ti naa ɠɛɛni Samali laaiti su, ʋɛ zii naati ɛsɛ ge ɠɛni zeini ná. 30 Ɓaɓilɔne nuiti ti Sukɔte-Ɓenɔte ɓɛtɛni, Kute nuiti ti Nɛɛlɛgale ɓɛtɛ, Ɠamate nuiti ti Asima ɓɛtɛ, 31 Ava nuiti ti Nibaze ta Taalatake ɓɛtɛ, Sefaalavayime nuiti ti ɗa ti-loun zunuiti gala abui ɠa ta-ɠalagiti Adalamelɛke ta Anamelɛke ti lɛbi vai zu. 32 Ti pɛ ti ɠɛni ɓalaa Ɠɔoɠɔ GALAGI lɛbizu. Ti ɠɛni yeelosu nuiti ba ɓɔɠɔ zaama ga naati ti ɠɛ ga ta-zalaɠa ɠula nuiti, ta-zalaɠa ɠula adaʋɛti pɛlɛiti bu. 33 Ʋele ɠana ti ɠɛni Ɠɔoɠɔ GALAGI lɛbizu la, ti lati, ti ɗa ti ɓɔɠɔ ɠalagiti dɛbi, ʋelei ti-ɠɛɛ vaa wɔlɔiti ti ɠɛni la naama yooiti su ti zeɠeai náti.

34 Zaaɠaza ti-mavofodaiti ta ti-ɠɛɛ vaa wɔlɔmaiti kɛɛzu dɛ, ti la Ɠɔoɠɔ GALAGI lɛbizu ga pagɔ, ti la ɓalaa ta-vaa wɔlɔmaiti ma lɔgiti sosu, ta ti ɓɔɠɔ leveiti, ti la Ɠɔoɠɔ GALAGI ná-tɔgiti ta ná-deveiti sosu, niiti é ti veeni Zakɔɓe mavofodaiti zea, Zakɔɓei naa ɠa Ɠɔoɠɔ GALAGI daasei pɛɛni ga Izilayɛle. 35 Minazeɠegi ɠɛni Zakɔɓe mavofodaiti zɔɠɔzu ta Ɠɔoɠɔ GALAGI, naa devei niiti boni ga tiye: «À mina gala kiligaa lɛbi, wo mina nɔkɔ ti wu. À mina ti lɛbi, wo mina zalaɠa ɠila kpalaa kula ti ʋɛ. 36 Kɛlɛ à nɔkɔna nà ɠila kpe bu, nɛ̀i gè ga Ɠɔoɠɔ GALAGI, gè wo ɠula Ezipete ʋa ga sɛ̀bɛ wolai, nà ɠa maanɛai wo nɔkɔ bù, wo zalaɠaiti kula bɛ̀. 37 Kɛni wo ɗa nà-deveiti ta nà-tɔgiti so nɔ ɠɔ, naa ʋɛɛ nà-kalagiti ba, niiti gè ti zɛʋɛai, gè fe wo ya, ma un ge daa ma ga wo mina gala kiligaa lɛbi. 38 À mina yeema minazeɠegi ma nii gè kɛa ade yɔɠɔzu. À mina gala kiligaa lɛbi. 39 Kɛlɛ nɛ̀i gè ga wa-ƓALAGI, Ɠɔoɠɔ GALAGI, à nà ɠila dɛbi, nà wo ɠula wo zili nuiti pɛ zea.»

40 Kɛlɛ nui naati ti la ɠɛni kɛɛni ti ʋa woilo goo ma, ti ɠɛni ti-ɠɛɛwoti wɔlɔmai nɔ ɠɛɛzu. 41 Zii ɠiligi niiti ti ɠɛni Ɠɔoɠɔ GALAGI lɛbizu, ti ɗa ti ɓɔɠɔ ɠalagiti dɛbi ɓalaagi. Ti-lointi ta ti-lounlointi ɓalaa zenɔ ɠana ti kɛɛzu la zaaɠaza.

<- 2 Masagiti 162 Masagiti 18 ->