1 Siɛgi zu fɛti ɓeni la, Izilayɛle nui niiti kpein ti ɠɛni ná, ti liini Zuda laa wolaiti su, ti sale ɠɔtuiti kpezeɠele, ti sale wuluiti teʋe ga, ti zalaɠa ɠula adaʋɛti koloɠolo ta ma zalaɠa ɠulazuʋɛti pɛ, niiti ti ɠɛni Zuda ta Ɓɛnzamɛn yooi zu, naa ʋɛɛ Efelayime ta Manasé ʋa, ti la gila kpalaa zɛni ná. Naa ʋoluma Izilayɛle nuiti pɛ ti ɠaleni ma, ɛsɛ ge li pɔ bɛ ná-taazu. 2 Ezekiase zalaɠa ɠula nuiti ta Levi nuiti pilɛni ti-losuʋɛti, eɠɛʋelei ta-vaazeikpasui ma ɓɔgiti ti la. Naama ɓɔgiti su, é ɛsɛ gilagilagi ná-boti veeni zea yɛ Ɠɔoɠɔ GALAGI zei ʋɛlɛi ma ɠoizuʋɛ, zalaɠa ɠula nuiti ta Levi nuiti ti-losuʋɛti ti ɠɛni ga gala zalaɠaiti ta ziilɛi zalaɠaiti kula vai, ɓaa GALA sei ʋɛlɛi wu wotiiti, niiti ti ga maamusɛ wuyeiti ta mama guyeiti too vai GALA bɛ. 3 Masagi kɔligiti gilazuʋɛ veeni ga é ɗa lɔ gala zalaɠaiti polu, niiti ti ɠulazu sobu ʋɛɛ kpɔkɔ ʋa, naa ʋɛɛ dooɠo foloiti ta alu toga niinɛi ma vɛtiiti ba, ta zɔɔma vɛtiiti pɛ, eɠɛʋelei sɛʋɛai la Ɠɔoɠɔ GALAGI ná-tɔgi zu. 4 É zɛba é ɠɛ Zeluzalɛme nuɓusɛiti ma ti zalaɠa ɠula nuiti ta Levi nuiti niigi ve ti ya, naa ɠa a kɛ ti unpilɛ naama wotiiti ma niiti Ɠɔoɠɔ GALAGI ná-tɔgi ti levezu ma. 5 Deve wooi naa woni nɔ feya, Izilayɛle nuiti ti tɔɔzeini ga ti ɗa ʋa ga zooi ʋaalɔnɔ mɔungiti: moloi, dɔɔ niinɛi, gulɔi, kɔin gulɔi, naa ʋɛɛ kpalaga aniiti pɛ ma mɔungiti ba. Ti ɠɛni ʋaazu ɓalaa ga anii kpein ma ʋuusiɛi ga pooʋama. 6 Izilayɛle ta Zuda nuiti kpein ti ɠɛni zeini Zuda laa wolaiti su, naati ɓalaa ti ɠɛni ʋaazu ga puusiɛiti toganii ma wolaiti ta ma goiti su, naa ʋɛɛ vebɛani ɲadegaiti ba, niiti ti veai Ɠɔoɠɔ GALAGI ʋɛ, ta-ƓALAGI, ti ti ɠaalɛɛni ba kpulɔkpulɔ gola mɔin. 7 Ti naama ani ɠaalɛbai lɔɔzeini konagi ma alugi zaʋasiɛi ma, ti gaaɓela dɔfelasiɛi ma. 8 Ezekiase ta ná-botiɠɛ nu wolaiti ti ʋaani, ti naama aniiti ka ti ɠaalɛai ba, ti Ɠɔoɠɔ GALAGI mamani, ti tuya lo ná-nuɓusɛiti bɛ, Izilayɛle nuiti.

9 Ezekiase zalaɠa ɠula nuiti ta Levi nuiti gaazaɠani, é lo vebɛanii naati ba. 10 Zalaɠa ɠula ɠundiɠi wolai Azalia, nii é ɠɛni ga Sadɔke mavofodai ta, naa zɛba é gooɠaaʋote, é ɠɛ ma: «Kaipa nuɓusɛiti ti tɔɔzeini ga ti ɗa ʋa ga ta-vebɛaniiti Ɠɔoɠɔ GALAGI zei ʋɛlɛi ma ɠoizuʋɛ, gi daamianigi zɔlɔɔgɛ gi ɓɔlɔ ba, nii è kaazu ɠaani ma ɠulapolui ɠana, mazɔlɔɔ Ɠɔoɠɔ GALAGI tuya looʋɛ nuɓusɛi ʋɛ.»

11 Ezekiase devei veeni ga ti ani makɛ ʋɛlɛiti kɛʋele ɓɛtɛ Ɠɔoɠɔ GALAGI zei ʋɛlɛi ma ɠoizuʋɛ. Ti ɓegai ma ga naati kpɛtɛ, 12 siɛgi pɛ su miná ɠa ti ɠɛni nuɓusɛi ná-kula aniiti puuzu ná, puusiɛiti, naa ʋɛɛ vebɛani ɲadegai zɔiti ba. Levi nui Konania ɠa zee ɠɛni naama aniiti su, ná-seikobai ɠɛni ga kɛɛɠɛloin Simeyi. 13 Zɔiti ti ɠɛni botii ɠɛɛzu tɔun ti yeewu, naati ti ɠɛni ga: Yeɠiyɛle, Azazia, Naɠate, Azayɛle, Yelimɔte, Yozaɓade, Eliyɛle, Yisimakia, Maɠate, ta Ɓenaya, naati ka ti ɠɛni wɛlɛzu naama aniiti ma, masagi Ezekiase ná-devei maaʋele ma, ta GALA sei ʋɛlɛi ma nu wolai Azalia. 14 Levi nui Kolé, Yimina ná-doun zunui, nii é ɠɛni ga folo ɠulazu ʋele ziɠidaʋɛ makɛ nui, naa ɠa ná-botii ɠɛni ga é ɗa vebɛaniiti so, nii nuiti ti daai ɠisu, niiti ti ɠɛni veezu Ɠɔoɠɔ GALAGI ʋɛ, ta é ɗa kula aniiti gaaɠwɛɛ nii ti ɠɛni ʋaazu la Ɠɔoɠɔ GALAGI ʋɔ, naa ʋɛɛ vebɛani ɲadegaiti ba. 15 Levi nui tanigaa ti ɠɛni botii ɠɛɛzu zeewu, zalaɠa ɠula laa wolaiti su, naama nuiti ti ɠɛni ga: Edɛn, Miniyamin, Zozuwe, Semaya, Amalia, ta Sekania. Naati tosuʋɛ ɠɛni ga ti ɗa ɠɔnɔgi ɠaaɠwɛ ti-ɠɛɛlointi ba ladalai zu, eɠɛʋelei ta-ɓɔgiti ti la, zeeɠaaɠwɛɛzu mina ɠɛ nu ɓiigiti zɔɠɔzu ta zɔiti ti la ga gaazuɠula. 16 Ti ani ɠaaɠwɛɛzu naama nuiti pɛ ba, niiti ti-laaseigiti sɛʋɛai zalaɠa ɠula nuiti daasei sɛʋɛi zu, é zo kona saʋagɔ loungoiti ma, é lɛ ga maazu ʋelei, naa ʋoluma ɓalaa ti ɠɛni gaaɠwɛɛzu naati pɛ ba niiti ti ɠɛni botiiti kɛɛzu é lo ti-losuʋɛti ba, eɠɛʋelei é la ta-ɠuɠuiti su Ɠɔoɠɔ GALAGI zei ʋɛlɛi wu. 17 Zalaɠa ɠula nuiti daaseigi zɛʋɛni ga pɛlɛyeɠe ʋelei, Levi nuiti ma, é zo kona ʋuufelegɔ (20) ma, é lɛ zeemaazu, naati daaseigi zɛʋɛni ga ta-wotii ta ti-ɓɔ pelei. 18 Ti-laaseigiti ti zɛʋɛni ta ti-lointi, naa ʋɛɛ ti-anzaiti ba, ti-loun zunuiti ta ti-loun anzanuiti, ʋele ɠana é ɠɛni zalaɠa ɠula ɠuɠui zu, ta Levi nuiti ta-ɠuɠui zu, tɔɔzei ti ɠɛni ga lada nuiti, ti ɗa ɓɔɠɔ ɲade. 19 Zalaɠa ɠula nui niiti ti ɠɛni ga Aalɔn mavofodaiti, niiti ti zeini zalaɠa ɠula nuiti ta-laa wolai ɠoba laa goiti su, ti naa tanigaa laasei sɛʋɛni ga ti ɗa ɠɔnɔgi ɠaaɠwɛ zalaɠa ɠula nuiti ta Levi nuiti ba, niiti ti-laaseigiti sɛʋɛai.

20 Ʋele ɠana Ezekiase ziɛni la Zuda yooi zu ná pɛ. É naa ɠɛɛni nii pagai, sɔlegai ta é ga lada vaa Ɠɔoɠɔ GALAGI ɠaazu, ná-GALAGI. 21 Nii kpein é yeeʋuuni bu ga é kɛ, é ɠɛni ga GALA sei ʋɛlɛi wu vaa, ɓaa kolo vai tɔgiti ta deveiti bɛ, nii é ɠɛni gaiziɛzu, naa ɠɛni ga é ná-GALAGI yiima vai ɠɛ ga yiimaʋɛ pɛ, naa ma ka é kɛɛni, ti pɛ su ɠɛni ɓɛtɛzu ma.

<- 2 Dɔlɔ Sɛʋɛi 302 Dɔlɔ Sɛʋɛi 32 ->