1 Kɛ̀ɛleaiti, wo ɓɛdɛ la ba, ga gi sɛʋɛ leʋe wo ma, é lo naama voloiti ba ta ma yeeɠɛɠalaiti, yeei niima vaiti ti ɠɛɛzu la. 2 Mazɔlɔɔ wo suɠwɛɛ ga pagɔ, ga Maliɠii ná-foloi ɠana ʋa eɠɛ unma nui é ɠulazu nu viliba kpidii. 3 Siɛgi zu nuɓusɛiti ta ɠɛ ɠɛɛzu la ma: «Ziilɛigi ɠa gi ya niina, gi ɠulaa faa zu,» názu ɠa undaaʋiligi ɠulazu la ti viliba, eɠɛʋelei doun zɔlɔɔ koozuwanai a ɗa anzanui zo da, é la ʋoola ti ʋa pɛ.

4 Kɛlɛ kɛ̀ɛleaiti, wo la kpidi zu, ga naama voloi ʋa ɠula wo viliba, eɠɛ unma nu. 5 Wo pɛ wo ɠɛa ga wozakalagi ná-nuiti, wo ɠɛa ga foloi nɔnɔiti. De la ga kpidii ta kuai nɔnɔ. 6 Ade mina ɲi deɠɛmu, eɠɛʋelei zɔiti ti ɲiizu la, kɛlɛ maanɛɛʋɛ ga ade yɛ ɠaazu ɠa, de ɠɛ ga sɔɓelama nuiti. 7 Mazɔlɔɔ zɔiti ti ɲiizu, ta ɗa ɲi ga kpidii, zɔiti dɔɔi ti zosu, toɠa ɗa ti zo ga kpidii. 8 Kɛlɛ dɛiti de ga foloi nɔnɔiti, ade ɠɛ ga sɔɓelama nuiti, ade kidaaleʋei ta nɛɛbɛi loo ɠɔba ga de-ɠaka makɛ ɠɔɔɠɔ zɔɔlai, ta da-ɠizogi ma ɠitogi ɠɛ de unba ga bɔɔlɔgi. 9 Mazɔlɔɔ GALA ge la ade lolini ga é yiiɠaawana ade ma, kɛlɛ kɛni kizogi zɔlɔɔ fai ade-Maliɠii Yesu Kilista zaalai zu, 10 nii é zaani ade ʋɛ, nii a kɛ ade zɛnvui wo ʋɔɔma ada tɔun, siɛgi zu a ʋaa la, de ɠɛni vulua, ɓaa de zaani. 11 Naa ɠa é ba, à ɓɔɠɔ iɲɔdɔ wo ɠilagilagiti pɛ, wo ɠilagilagi ɓɔ bɔɔlai ʋa wo li luɠɔma kidaaleʋei zu, eɠɛʋelei wo kɛɛzu la ɠiteɠite.

12 Kɛ̀ɛleaiti, gá valizu wo ma, ga wo unfe naati ma, niiti ti botii ɠɛɛzu wo zaama, ti losu wo luɠɔ Maliɠii laaseigi zu, ti ɗa wo ɠala. 13 À wa-nɛɛbɛi ɠula kɛlɛma ti ʋɛ, wo ti wɔɔlɔ gola ta-wotii maaʋele ma. À zei ziilɛigi zu ɓɔɠɔ ɠoba.

14 Kɛ̀ɛleaiti, gá wo maanɛɛnɛzu, à naati too ɠisu, niiti ti eteai ziɛzu gaaʋalaba vaiti su. Niiti ti iɲɔteʋeai, à naati iɲɔdɔ. À ɓɔ zobobɛlala nuiti ba. À yiilɔɔ ɛsɛ pɛ bu. 15 À dama, nu mina faa ɲɔi ʋotokula ga faa ɲɔi, kɛlɛ à ʋilɛ faa ʋagɔi ɠɛɛ vai ʋolu yeenɔpɛ, wo naa ɠɛ ɓɔɠɔ yɔɠɔzu, ta nuɓusɛi pɛ bɛ.

16 Wo ɠoozunɛai ɠɛ de yeenɔpɛ. 17 À maanɛɛnɛi wo yeenɔpɛ, wo mina ɓɔlɔ. 18 À GALA mama fai pɛ su, naa ɠa é ga GALA ziimai wa-vaa zu, wa-ɠilibalai zu wa Yesu Kilista.

19 À mina pele leʋe Zɛnvu Ɲadegai ná-botii luɠɔ. 20 À mina bɛlɛɠula GALA goo wo nuiti daawooi ʋa. 21 Kɛlɛ à faiti pɛ buuʋɛtɛ, zɔi pagai wo naa zo, 22 wo ɓɔɠɔ zo, wo-yee mina ɠɛ faa ɲɔu ɠɛɛ vai ma zii tanɔpɛ su.

23 Ziilɛi fee ƓALAGI ɓɔɠɔgoi wo ɲade mɛtu, é wo-yɛnvui, ta wo-ɠigi, ta wo-ɓusɛiti makɛ ga pagɔ, peelalazu nɔpɛ ge mina ɠɛ wo ʋa, ade-Maliɠii Yesu Kilista ʋa voloi. 24 Zɔi é wo loliga, toɠa ga wooɠɛɠila nui, toɠa a naa ɠɛ.

25 Kɛ̀ɛleaiti, à GALA fali gi ʋɛ.

26 À ade-ɠɛɛleaiti pɛ tuʋɔ ga nɛɛnɛi.

27 Nà wo levezu, gè maaɓakpa Maliɠii laaseigi zu, ga wo niima zɛʋɛi ɠala ade-ɠɛɛleaiti pɛ bɛ.

28 Ade-Maliɠii Yesu Kilista ná-zaalai yɛ wo ʋa!

<- 1 Tesalonike 4