1 Filiseti nuiti ti GALA ná-minazeɠe kesui zeɠeni Eɓɛn-Ezɛɛl, ti lii la Asedɔde taazuʋɛ. 2 Ti tɛɛni ta-ɠalagi Dagon ná-pɛlɛi wu, ti da maaniini saɠai naa ɠobaʋɛ. 3 Asedɔde nuiti ti wuzeɠeni sobuzobui, ti ka ga Dagon ɠa laani daaʋɛai zooi ma, Ɠɔoɠɔ GALAGI ná-minazeɠe kesui ɠakalaʋɛ. Ti buzeɠeni, ti to tosuʋɛ. 4 Poluma zobui mɔnɔ, ti wuzeɠeni kpidiɓidigi, ti ka ga Dagon ɠa laani daaʋɛai mɔnɔ zooi ma, Ɠɔoɠɔ GALAGI ná-minazeɠe kesui ɠakalaʋɛ, nɔungi ta zee felegɔiti teʋeai ba, ti vazagai kpofalagi maazu, kpusɛi nɔ ɠa é yɛni ná niina. 5 Naa ɠa é kɛa, Dagon ná-zalaɠa ɠula nuiti, ta niiti kpein ti lɛɛzu Dagon ná-pɛlɛi wu Asedɔde, ti la ɗa ga ziɛ kpofalagi ma, zaaɠaza.

6 Ɠɔoɠɔ GALAGI ná-zɛbɛi lɛɛni ga Asedɔde nuiti, é dualuagi lɔɔni ti zu, é puzɛɠulagi ʋɛɛni ti ʋa, Asedɔde ta ná-zooi pɛ su. 7 Asedɔde nuiti ti naama vai ɠaai ma, é ɗa ɠɛ ga tiye, ti ɠɛni ma: «Izelayɛle ná-GALAGI ná-minazeɠe kesui la lɛbiga ada-laazuʋɛ, mazɔlɔɔ zeei ná-zɛbɛi ɠa ade laalɔɠɔma, ada-o, ada-ɠalagi Dagon-o.»

8 Ti Filiseti ɠundiɠiiti tolini Asedɔde taazuʋɛ, ti ti ɠaazaɠa, ti ɠɛ ma: «Lee ɠa ada kɛ ga Izelayɛle ná-GALAGI ná-minazeɠe kesui nii?»

Naati ti ti wooɠaaʋoteni, ti ɠɛni ti ma: «Kɛni Izelayɛle ná-GALAGI ná-minazeɠe kesui leʋe Gate.» Ti liini ga GALA ná-minazeɠe kesui miná. 9 Kɛlɛ ti lia ʋoluma la, Ɠɔoɠɔ GALAGI wuzeɠeni Gate taai laalɔɠɔma. Dualua golai lɔɔni ti pɛ su, puzɛɠulagi ti zoni, é lɔɔzei doungoiti ma, é li kpakologiti pɔ.

10 Gaamago nɔ, ti GALA ná-minazeɠe kesui ɠulani naa ʋa, ti lii la Ekelɔn. Kɛlɛ ti zeeliai ma la Ekelɔn, Ekelɔn nuiti ti kpee wolai looni, ti ɠɛ ma: «Ti ʋa ga Izelayɛle ná-GALAGI ná-minazeɠe kesui ada-laazuʋɛ, nii a kɛ ade za, adeya-o, ada-nuɓusɛiti-o!» 11 Tiya ɓalaa, ti Filiseti ɠundiɠiiti tolini, ti ɠɛ ti ma: «À Izelayɛle ná-GALAGI ná-minazeɠe kesui ɠaaɠale ma ná-zooi zu, ni naa laade, gi kpein gá ʋaazu zaazu, giya-o, gá-nuɓusɛiti-o!» Mazɔlɔɔ nuiti ti ɠɛni zaazu ga duɔi taazuʋɛ ná pɛ. Mazɔlɔɔ GALA ge ná-zɛbɛi lɛɛni ga tiye gola. 12 Nui niiti saai a la ʋoola ti ʋa, puzɛɠulagi ɠa é ɓena naati so, naa maaʋele ma, taai zu nuɓusɛiti kpain gooi lɛɛni geeɠɔlɔgi zu.

<- 1 Samiyɛle 41 Samiyɛle 6 ->