Izelayɛle nuiti ti ɠulani ga ti Filiseti nuiti daaɠomi ga kɔɔi, Izelayɛle ná-kɔɔʋɛbɛi ʋuuni Eɓɛn-Ezɛɛl. Filiseti nuiti ti tɔnɔi ʋu Afɛke taazuʋɛ. 2 Filiseti nuiti ti lopele ɓɛtɛni kɔɔɠɔ vai ma, ti kɔɔi lɔɔzeini ta Izelayɛle nuiti. Kɔɔi ɓɔini ga gola, Filiseti nuiti ti zeelini Izelayɛle nuiti ma, ti nu waanaanigɔ (4 000) ɠɛɠala ʋaani ti zaama, kɔɔɠɔzuʋɛ. 3 Zɔiti ti ʋelani, naati ti ɠalegai ma ma kɔɔlaɠai zu, Izelayɛle lotuɠɔiti ti ɠɛni ɓɔɠɔ ɠaazaɠasu ga: «Lee vaa zu Ɠɔoɠɔ GALAGI ade yɛgana Filiseti nuiti ti ɗa vɔni ade ma?» Ti ɠɛni ɓɔɠɔ ma: «Ade li Silo, ade ʋa ga GALA ná-minazeɠe kesui. Naa a ɠɛna ade zaama, toɠa ade ɠizo ade zili nuiti zeei ma.»

4 Ti numaa leʋeni Silo, Ɠɔoɠɔ GALAGI ná-minazeɠe kesui ɠalama, Fai-Pɛ-Maliɠii, nii é zeini seeluɓɛinti unda. Zalaɠa ɠula nui Eli ná-doun zunu felegɔiti Ɠɔfeni ta Finease ti yɛni minazeɠe kesui ʋolu, ti ʋa.

5 Ti zeeliai ma ga minazeɠe kesui kɔɔlaɠai zu, Izelayɛle ɠɔɔʋɛbɛi wooɠulani ga koozunɛɛi, eyɛsu zooi ɓali ti wu, ʋɛ ti ɠɛni ná. 6 Filiseti nuiti ti zɔngɔ wooi naa mɛnigai ma, ti ɠɛni ɓɔɠɔ ɠaazaɠasu, ti ɗa ɠɛ ma: «Kpee wolai nii ʋoluʋɛ ɠa ga leeni, Eɓulu nuiti ta-ɠɔɔlaɠai zu?» Ti mɛnini ga Ɠɔoɠɔ GALAGI ná-minazeɠe kesui ɠa ti ʋaai la Izelayɛle ná-kɔɔlaɠai zu. 7 Ti wola luani, ti ɗa ɠɛ ɓɔɠɔ ma: «Ade maanɔɠɔa, tɔɔzei GALA ge ʋa Eɓulu nuiti ta-ɠɔɔlaɠai zu, é la ɠɛa ɠana pɔlɔma. 8 Ade maanɔɠɔa-o! Ɓɛ ɠa a ade ɠula zɛbɛsu ɠalagi niiti zea? Galagi tɛiti ka ti maanɔɠɔi ma zii mɔinmɔin seini Ezipete nuiti ma, teʋebai zu. 9 À zasulo! Filiseti nuiti, wo ɠɛ ga zunu ɓɔɠɔɓɔɠɔ! Wo mina ʋa lɔɔzu duɔlai zu, Eɓulu nuiti zea, eɠɛʋelei ti ɠɛa la wo ya duɔlai zu, naa ɠa é ba, à zunuyai ɠɛna, wo kɔɔi ɠɔ.»

10 Filiseti nuiti ti kɔɔi lɔɔzeini, ti vɔnini Izelayɛle ma, ɛsɛ pɛ ge ɗa ɓizɛ ga lɔɔɠua ná-seɠe ɠotai wu. Ti vɔnini Izelayɛle ma ga gola, nu waaʋuusaʋagɔ (30 000) ɠa é zaani Izelayɛle ʋa. 11 Filiseti nuiti ti GALA ná-minazeɠe kesui zeɠeni, Eli ná-doun zunu felegɔiti ma, Ɠɔfeni ta Finease, naati ti za kɔɔi zu.

12 Naama volo ɠilagi nɔ, zunu ɠila ge ɓizɛni, é ɠula kɔɔlaɠai zu, é ɠɛni ga Ɓɛnzamɛn mavofodai zu nui ta, é ʋaani Silo, ná-seɠeiti baliʋaliai ga, fufiligi nɔungi pɛ unma, ziiɓɔlɔi maaʋele ma. 13 Tɛai ma taazuʋɛ, Eli ɠɛni zeini ná-kpɔkpɔgi ɠa, pele ɠobaʋɛ, é ɗa maaɓɔungi wo, tɔɔzei zii ɠɛni zoolɛzu ga GALA ná-minazeɠe kesui ma vai. Zunui tɛi paai ma, é nuuma wooi wo taazuʋɛ, nuɓusɛiti pɛ ti kpeei ɠulani bu.

14 Eli naama ɓeei mɛnigai ma, é gaazaɠagi woni, ga: «Lee ma ɓee ɠa é loozu?»

Zunui tɛi ge ʋaani, ga é naama vai laazeeli Eli ma. 15 Naama ziɛgi zu, Eli zii ma voloi ɠɛni ga kona ʋuutaaʋuu maazu lɔsaʋa (98), gaazuɠoleni niina. 16 Zunui ɠɛni Eli ma: «Pèlaʋɛ, gè zeɠe kɔɔɠɔzuʋɛ za nɔ.»

Eli ɠɛni ma: «Leeni ɠa kɛai, dòun zunu?»

17 Keelai gooɠaaʋoteni, é ɠɛ ma: «Izelayɛle ɓizaa Filiseti nuiti ba, gi looʋɛ bu ga gola. È-loun zunu felegɔiti saaʋɛ vɔlɔ kɔɔi zu, Ɠɔfeni ta Finease. GALA ná-minazeɠe kesui ɓalaagi zeɠeʋɛ Filiseti nuiti bɛ.» 18 Siɛgi zu keelai ɓɔɛni la, é ʋilɛ minazeɠe kesui ʋa, Eli ɠulani ná-kpɔkpɔgi ɠa, é ɓudɛ ɓɔɠɔ maazu, é loo kpogi ɠobaʋɛ, kpoɓoi woloni, é za. Mazɔlɔɔ, Eli ʋɔlɔzaɠani niina, é wuini ɓɔɠɔ ma ɓalaa. Eli Izelayɛle lukpɔɠaaleʋeni kona ʋuunaanigɔ (40) laawu.

19 Ná-doin, Finease anzai ɠogi ɠaawɔɔni niina. É mɛnigai ma, ga ti GALA ná-minazeɠe kesui zeɠeʋɛ, naa ʋoluma, kɛɛmɔɔin ta sinigi ti zaa, anzanui nii zeini ɠɔɠɔʋolu, é doin zɔlɔɔ, tɔɔzei koozu wanai soni gaamanɔ. 20 Tɛi é ɠɛnina zaazu, anzanui niiti ti ɠɛni koba, naati ti ɠɛni ma: «Mina lua, mazɔlɔɔ è zunu loun zɔlɔɔga.» Kɛlɛ é la vɔlɔ ɠɛni woiloni naa ma, é ʋa ta zeɠe ba ti ʋɛ. 21 É doin laasei pɛɛni ga I-Kaɓɔde (nii poluʋɛ ga «lɛbiya la mɔ ná»). Mazɔlɔɔ é ɠɛni ma: «GALA ná-lɛbiyai zeɠea Izelayɛle ʋa.» Kɛai ma naa wosu, é ɠisiɛni, é ʋilɛ GALA ná-minazeɠe kesui ʋa, nii Filiseti nuiti ti seɠeni, ta kɛɛmɔɔin ta sinigi ti zaa vai. 22 É wooɠulani, é ɠɛ ma: «Ungo, lɛbiyai ɠula Izelayɛle ʋa, mazɔlɔɔ Izelayɛle zili nuiti ti lia ga GALA ná-minazeɠe kesui.»

<- 1 Samiyɛle 31 Samiyɛle 5 ->