1 Samiyɛle 15

GALA kɛlɛ vai Sayile ʋa

1 Yeeta, Samiyɛle ɠɛni Sayile ma: «Nà ɠa Ɠɔoɠɔ GALAGI tèʋeni, ga gè gulɔi ziɛ è ma, è ɠɛ ga Izelayɛle ná-masagi, niiti ti ga ná-nuiti. Woilo naa ma, nii é pɔ gè bo è ma. 2 Ɠɔoɠɔ GALAGI Fai-Pɛ-Maliɠii wooi ɠaa: ‹Kì ka su ga Izelayɛle zeɠezuʋɛ Ezipete yooi zu, Amalɛke nuiti ti pele ɓesani tuɠɔ. 3 Naa ɠa é ba, li, è vala ti ʋa, è ti-yeaɠɔligiti pɛ kona GALA ma. Nii kpein é ga fuluani, naati pɛ suwuɠaaleʋe, è mina gaazumaawɔinɠaa nɔpɛ kɛ, tɔɔzei zunuiti ma, é li anzanuiti pɔ, ta doungoiti, naa ʋɛɛ ɲiimiɓɔlegiti pɛ ba, nikɛiti ɓalaa, ta baalagiti, ɲɔmɛiti, ta soovalegiti.› »

4 Sayile ná-kɔɔʋɛbɛi ɠaalɛɛni ba, é ti ɠaalu Telayime taazuʋɛ. Izelayɛle wolodai zɔiti ta-ɠɔɔɠɔ nuiti ti ɠɛni ga nu waaunfelegɔ (200 000), Zuda wolodai zu geleiti ti ɠɛni ga, nu waapuugɔ (10 000). 5 Sayile loni ti luɠɔ, eyɛsu ti zeeli Amalɛke nuiti ta-laai ɠobaʋɛ, é zɛba é nuiti pilɛ, ti lɔɔɠu, ti pelei ɓɔun, ti luɠɔ nɛmɛi zu. 6 Sayile ɠɛni Ken nuiti ma: «À mina yɛ Amalɛke nuiti saama, à maaɠooza ti ʋa. Gè la pɔ ga nii gè seizu ti ma, wa ʋa wɔnɔ zɔlɔɔ su, mazɔlɔɔ, wo ɠɛni ga wooɠɛɠila nu Izelayɛle nuiti bɛ, ti zeɠezuʋɛ Ezipete yooi zu.» Ken nuiti ti ɠulani Amalɛke nuiti saama.

7 Sayile Amalɛke nuiti paa vai lɔɔzeini Ɠavila, é yɛ ti ʋolu, ti zeeli Suul, taai nii é Ezipete ɠobaʋɛ, folo ɠulazu ʋelei. 8 Sayile Amalɛke nuiti ta-masagi Agage zoni ga ma vului, é nuɓusɛi mɔtaiti suwuɠaaleʋe ga boɠa zɔkpɔi. 9 Kɛlɛ Sayile ta ná-kɔɔɠɔ nuiti ti Agage yɛni vulua, ta togani ʋagɔiti, niiti ti zoni kɔɔi zu, baalagiti, nikɛiti, boliiti, togani niiti ti wola wulɔai, ta baala ziʋoiti, ti la ɠɛni kɛɛni, ti ʋa naati suwuɠaaleʋe. Kɛlɛ zɔiti ti la ɠɛni ʋani, tosu la ti ʋa, naati ka ti ti zuwuɠaaleʋe.

10 Ɠɔoɠɔ GALAGI ɓɔɛni Samiyɛle ʋɔ, é ɠɛ ma: 11 «Gè nimizaa ɓɔɠɔ ma, ziimazeɠe vai zu ga Sayile, ga gè kɛ ga masagi, mazɔlɔɔ é ʋoluavega bà, nà-devei nii gè fea zea, é la ziɛni ga naa.» Samiyɛle yiiɓɔlɔni koozu, kpidii ɲɛgɛlɛin, é ɠɛni Ɠɔoɠɔ GALAGI maanɛɛnɛzu.

12 Poluma zobui, Samiyɛle wuzeɠeni ga sobuzobui, é li é Sayile ɠa. É yɛni pelei zu, é mɛni ga Sayile lɛɛni Kaalemɛle gizei ma, ga é ɠizɛsu ani ʋilɛ ná, naa ʋoluma, é ɠaleni ma, é yei ga Gilegale ʋele.

13 Samiyɛle zeeliai ma Sayile ma, naa daaɠomini, é ɠɛ ma: «Ɠɔoɠɔ GALAGI tuya loo è ʋɛ! Devei nii Ɠɔoɠɔ GALAGI feai zèa, gè kɛa.»

14 Samiyɛle ɠɛni ma: «Mini ɠa baalagiti kpain gooi zeɠezu ná, nii gè mɛnisu, ta nikɛiti kpain gooi, é loozu gòizu?»

15 Sayile ɠɛni ma: «Kɔɔɠɔ nuiti ka ti yiimazeɠeai ga baalagiti ta nikɛiti ma ʋapagiti, ti zeɠe ga tiye Amalɛke nuiti pɔ bɛ, ga ti ʋa ɠɛ ga zalaɠai, ɗa-ƓALAGI, Ɠɔoɠɔ GALAGI ʋɛ. Gi mɔtaiti suwuɠaaleʋe ɲɛgɛlɛin.»

16 Samiyɛle ɠɛni Sayile ma: «Ɠwɛ mina! Naa kula ɠɛa su. Ɓɛ gè naa wo è ma, nii Ɠɔoɠɔ GALAGI dɛɛni ga ze kpidii teʋegai.»

Sayile ɠɛni ma: «Awa, ɓɔɛna.»

17 Samiyɛle ɠɛni ma: «Siɛgi zu è la ɠɛni ɓɔɠɔ ɠaazu la ga sɔɓelama nu, názu ɠa è ɠɛa la ga masagi Izelayɛle wolodamaiti unda, Ɠɔoɠɔ GALAGI ɠa é gulɔi ziɛ è ma, è ɠɛ ga masagi Izelayɛle unda. 18 Tama Ɠɔoɠɔ GALAGI è ziɛ ʋelei lɛa, é devei ve è ya, ga è li, è Amalɛke nuiti suwuɠaaleʋe, kotoba nui naati, è kɔɔi ʋɛɛ ti ʋa, eyɛsu è ti zuɠoloɠolo. 19 Lee vaa zu è la ɠoloni Ɠɔoɠɔ GALAGI ná-devei ʋɛ? Lee vaa zu è Ɠɔoɠɔ GALAGI wanama vai ɠɛɛzu, è ɗa aniiti seɠe, niiti ti zogai kɔɔi zu?»

20 Sayile ɠɛni Samiyɛle ma: «Nà ma, kòloʋɛ Ɠɔoɠɔ GALAGI ná-devei ʋɛ, nii é fea zèa, nii é tèʋegai kɛ̀ɛvai ma, gè naa ɠɛɛʋɛ, gè ɠale ma ga Agage, Amalɛke nuiti ta-masagi, gè nui mɔtaiti suwuɠaaleʋe Ɠɔoɠɔ GALAGI ʋɛ. 21 Kɛlɛ kɔɔɠɔ nuiti ka ti baalagiti ta nikɛiti ma ʋapagiti seɠeai, anii naati su ti zogai kɔɔi zu, niiti maanɛa ɠɛni de ga maaɲɛɛi ʋɛɛ ti ʋa Ɠɔoɠɔ GALAGI ʋɛ, ti naati seɠeʋɛ ga ti ʋa ɠɛ ga zalaɠai Gilegale Ɠɔoɠɔ GALAGI ʋɛ, nii é ga ɗa-ƓALAGI.»

Woozogi vizɔgɛ zalaɠai ʋa

22 Samiyɛle gooɠaaʋoteni, é ɠɛni ma:

«Ɠɔoɠɔ GALAGI wɔinʋɛ nɛi ga zalaɠaiti ta gala zalaɠaiti,

eɠɛʋelei wɔinɗai la ga nu ɠolo daawooi ʋɛ?

Wɛlɛ, woozogi vizɔgɛ zalaɠaiti ba,

koloi vizɔgɛ é leʋe baala sinɛiti ma wulɔi ʋa.

23 Mazɔlɔɔ zɔi é kololalai ɠɛɛzu, naa ɲɔuʋɛ eɠɛʋelei ungaiziɛ wo fai la.

Ɓɔɠɔmaayeilalai ɲɔuʋɛ, ta ga ɠɛʋelei nɔ ta ani ɠɔɔ vai.

Tɛi è Ɠɔoɠɔ GALAGI laawooi ʋiliga ya,

tɔ ɓalaa é è ʋiliga ya, é masadai ɠula è ya.»

24 Sayile kpɔɛi zeɠeni, é ɠɛ Samiyɛle ma: «Gè kotoi ɠɛa, mazɔlɔɔ gè Ɠɔoɠɔ GALAGI ná-devei ɠoloɠologa, ta ɗɔnɔ ma lɛnɛ gooiti, è ti veai zèa. Gè sumɔga dualuagi ma, ga gè mina kɔɔɠɔ nuiti ziiɠaawana, gè woiloga naa ma, nii ti maaɠaazaɠaboga mà. 25 Nii gè è maanɛɛnɛzu la, naa ɠa ga, è soma è nà-kotoi nii zuvaayɛ, è ʋa, de li, gè nɔkɔ Ɠɔoɠɔ GALAGI wu.»

26 Samiyɛle gooɠaaʋoteni, é ɠɛ ma: «Ɓa-o, de la liizu ʋɔɔma, mazɔlɔɔ è Ɠɔoɠɔ GALAGI ná-deveiti daaʋiligɛ, naa ɠa é kɛa, tɔ ɓalaa é è laaʋiliga, é masadai ɠula è ya Izelayɛle unda.»

27 Tɛi Samiyɛle ɠɛni ʋoluavesu, ga é ɠale ma, Sayile soni ná-seɠei lakɔlɔgi ʋa, é ʋali ga, ma ɓuɠai yɛ zea. 28 Samiyɛle ɠɛni ma: «Ʋele ɠana Ɠɔoɠɔ GALAGI Izelayɛle masadai ʋalizu ga la, é kula è ya za, é fe taɠili zea, nii fizɔgai è ʋa. 29 Suɠwɛɛ ga Maliɠii nii é ga Izelayɛle ná-lɛbiyai, é la zɛɛ woga, é la nimiza ɓɔɠɔ ma ga nuɓusɛi ɠɛʋele.»

30 Sayile ɠɛni ma ʋolu: «Gè kotoi ɠɛɛʋɛ, kɛlɛ anɛɛ naa ʋe, soma è unfema ve zèa nà-nuɓusɛiti ta-ɠundiɠiiti gaazu, ta Izelayɛle nuiti pɛ gaazu. Soma è ʋilɛ pòlu, de li, gè nɔkɔ ɗa-ƓALAGI wu, nii é ga Ɠɔoɠɔ GALAGI.» 31 Samiyɛle ʋilɛni Sayile ʋolu, ti li, Sayile nɔkɔ Ɠɔoɠɔ GALAGI wu.

32 Samiyɛle ɠɛni ti ma: «À ʋa ga Amalɛke masagi Agage pɔ̀.» Agage ɠɛni ʋaazu koozunɛai, é ɗa ɠisiɛ ga saai ɠa na a ɓudɛ maazu. 33 Kɛlɛ Samiyɛle ɠɛni Agage ma: «Ɗa-woɠa zɔkpɔi ɠa é anzanui ma mɔinmɔin balani ti-lointi ma, naa maaʋele ma, ɗa ɓalaa è-lee ɠa ʋala è ma za.» Samiyɛle Agage ʋaani Gilegale, Ɠɔoɠɔ GALAGI ɠaazu.

34 Naa ʋoluma, Samiyɛle ɠaleni ma Lama, Sayile ɓalaa ge ɠaleni ma ná-taazu Giɓea. 35 Samiyɛle la mɔ ɠɛni ɠaleni ma ʋolu, é ʋa li Sayile ɠa vaa ma, eyɛsu saa voloi zeeli. Kɛlɛ Sayile ma yiizoolɛi ɠɛni ma, mazɔlɔɔ Ɠɔoɠɔ GALAGI ɠɛlɛni niina Sayile ʋa, é ɠɛ Sayile mina mɔ ɠɛ ga masagi.

<- 1 Samiyɛle 14 1 Samiyɛle 16 ->