1 Sayile ná-konagi ɠɛni ga puusaʋagɔ (30), siɛgi zu é zeini la ga masagi. Kona ʋuunaanigɔ maazu felegɔ (42) ɠa é kɛɛni masadai zu, Izilayɛle unda.

2 Sayile yeeloni salaʋusu waasaʋagɔ (3.000) ʋa, Izilayɛle nuiti saama, nu waafelegɔi (2.000) yɛni koba Mikemase ta Ɓetɛle ɠize yooi zu, mɔta waagilagi (1.000) ʋilɛni ná-doun zunui Zonatan ʋolu, ti li, ti zei Giɓea, Ɓɛnzamɛn yooi zu. Sayile nuɓusɛi mɔtaiti gaaɠaleni ma, ɛsɛ ge li ná-pɛlɛi wu.

3 Yeeta, Zonatan Filisiti nuiti ta-ɠɔɔlaaɠai zoni, nii é ɠɛni Geɓa. Naama wooi zeelini Filisiti nuiti ma. Sayile ɠɛni ti puʋugi vɛ Izilayɛle yooi zu ná pɛ, mazɔlɔɔ é ɠɛni bosu, é ɗa ɠɛ ma: «Kɛni Eɓulu nuiti pɛ ti suɠwɛɛ.» 4 Izilayɛle nuiti pɛ ti mɛnini ga Sayile Filisiti nuiti ta-ɠɔɔlaaɠai zogɛ, naa maaʋele ma, Izilayɛle wɔinzeɠea Filisiti nuiti ma. Izilayɛle ɠɔɔʋɛbɛi pɛ ge ɠaalɛɛni ba Sayile ɠoba, Gilegale.

5 Filisiti nuiti ɓalaa, ti ta-ɠɔɔʋɛbɛi ɠaalɛɛni ba, ga ti kɔɔi ʋɛɛ Izilayɛle ʋa. Kɔɔɠɔ wotolo waasaʋagɔ (3.000) ɠa é ɠɛni ti ya, soo ɓizɛ zalaʋusu waadɔzita (6.000), salaʋusuiti ti mɔin, é ɠɛ kpoloɗɛi laaʋɛ ɲaɠaegi. Ti tɔnɔ ma ɠɔɔlaaɠai ʋuuni Mikemase, folo ɠulazu ʋelei Ɓɛte-Avɛn letemaʋɛ. 6 Izilayɛle nuiti ti kaai ma ga faaɓaagi ɠa ti daawu, mazɔlɔɔ ti zili nuiti ti ti ɠatani, ti ɠɛni lɔɔɠuzu pugiti su, pɛtugiti su, zeɠeiti su, kɔtu yeɠeiti su, ta ziɛyeɠeiti su niiti ti zuvɔai. 7 Eɓulu nuiti saama, tanigaa ti Zuludɛn maaleʋesuʋɛ ɓudɛni, ga ti li, ti lɔɔɠu Gade ta Galaade yooi zu.

Naazu Sayile ɠɛni dɛ Gilegale, ná-kɔɔʋɛbɛi koba, ti ɗa ɓali ga dualuagi. 8 Folo lɔfela laawu, ti ɠɛni Samiyɛle ɓɔunsu, mazɔlɔɔ é boni ga toɠa ʋaazu. Kɛlɛ é la ɠɛni dɛ ʋaani Gilegale, kɔɔɠɔ nuiti ti tɔɔzeini ga ti ɗa vaza, ti ɗa zeɠe Sayile ɠoba.

9 Sayile ɠɛni ti ma: «À ʋa ga zalaɠa loganiiti pɔ̀, gala zalaɠaiti, ta ziilɛi zalaɠaiti.» Tɔ ɓɔɠɔi é gala zalaɠai ɠulani. 10 Kpesuʋɛ ga kula, Samiyɛle ɗa zeeli ná. Sayile liini, é daaɠomi, é tuʋɔ.

11 Samiyɛle ɠɛni ma: «Lee ɠa è kɛai?»

Sayile gooɠaaʋoteni, é ɠɛ ma: «Siɛgi zu gè kaa la ga nà-kɔɔɠɔ nuiti ta ga zeɠe kòba, ɗa ma, è la ʋaani fala toligi ma, nii bogai, Filisiti nuiti ma gaalɛai na ba Mikemase, 12 gè ɠɛni ma: ‹Filisiti nuiti ta ʋaazu ti loo gi ma Gilegale, aisa gi ʋa Ɠɔoɠɔ GALAGI maanɛɛnɛ!› Naa ɠa é kɛa, gè ɠɛɛlala vaa ɠɛa, gè gala zalaɠai ɠula.»

13 Samiyɛle ɠɛni Sayile ma: «È ɠimalala vaa ɠɛɛʋɛ, è la ɠoloni devei naa ʋɛ, nii Ɠɔoɠɔ GALAGI, ɗa-ƓALAGI feai è ya. Ni è ná-devei zoni, é ɠɛa vaazu bu ɗa-ʋɛlɛyeɠei yɛ masadai zu eyɛsu ɠɔ, Izilayɛle unda. 14 Kɛlɛ tɛi è la ɠoloni Ɠɔoɠɔ GALAGI ná-deveiti bɛ, ɗa-masadai la yɛga ná ɠɔ. Ɠɔoɠɔ GALAGI devea ga é ziima nui ɠaiziɛ, é naa zei ná-nuɓusɛiti unda, Izilayɛle nuiti.»

15 Naa ʋoluma, Samiyɛle zeɠeni koba Gilegale, é li Giɓea, Ɓɛnzamɛn yooi zu. Sayile ná-kɔɔɠɔ nuiti gaaluni, niiti ti ɠɛni koba, ti ɠɛ ga nu undɔzita (600). 16 Sayile ta ná-doun zunui Zonatan, ta ta-ɠɔɔɠɔ nuiti, niiti ti ɠɛni ti ʋa Geɓa, Ɓɛnzamɛn yooi zu, ti lopele ɓɛtɛni kɔɔɠɔ vai ma, naazu Filisiti nuiti ɓalaa, ti lopele ɓɛtɛa Mikemase. 17 Faa zuɠoloɠolo kɔɔʋɛbɛi ɠulani Filisiti nuiti ta-ɠɔɔlaaɠai zu, ti ɠaaɠwɛ su ga saʋagɔ, ma mɔungiti ti Wofela ʋelei zoni, Suale yooi zu ʋele. 18 Felesiɛiti ti li ga Ɓɛte-Ɠolon ʋele, saʋasiɛiti ti li ga kwɛpelema ʋelei nii é liizu ga pɛtugi zu ʋele, nii daa ga Seɓoyime ʋɛtugi, teʋebai ʋɔ pelei.

19 Naama ziɛgi zu, ɠain bo nu nɔpɛ ge la ɠɛni Izilayɛle yooi zu ná tanɔpɛ, mazɔlɔɔ Filisiti nuiti ti ɠɛni ma: «Ade pele ɓesa Eɓulu nuiti tuɠɔ, ga ti mina boɠa zɔkpɔ ɓaa kpɛɛn ɓɛtɛ ɓɔɠɔ ʋɛ.» 20 Kɛni, Izilayɛle nuiti pɛ ti ɓena li Filisiti nuiti pɔ bɛ, ga ti ta-wozawoli nikɛiti ta-ɠaliiti gaali, ta zoovɛiti, naa ʋɛɛ zeɠe wɔɔ ɠɔluiti ba, ta kɔtu wolo ɠɔluiti. 21 Siɛgi zu wozawoli nikɛiti ta-ɠaliiti, ta kɔtu wolo ɠɔluiti, ta gaazaʋa kɔluiti, ta zoovɛiti ti ɠaa a la zaana, ɓaa togani makɛ nuiti ta-ɠɔlu ɠaazoɓagi zokpai zɔle fai zu, kɛni ti li Filisiti nuiti pɔ bɛ.

22 Kɔɔɠɔ voloi zeeliai ma, boɠa zɔkpɔ nɔpɛ ge la nu nɔpɛ zea, anɛɛ kpɛɛin, kɛni Sayile ta Zonatanni nɔ ɠa ta ɠɛni ti ya.

23 Filisiti ɠɔɔʋɛbɛi gila ge ʋaani, é gize yɔɠɔzu ʋelei zo Mikemase ɠobaʋɛ.

<- 1 Samiyɛle 121 Samiyɛle 14 ->