1 Piyɛlɛ 3

Anzaiti ta ti-zinigiti ti ɠɛʋelei

1 Anzaiti, wa ɓalaagi, à ɓɔɠɔmaayei wo-zinigiti bɛ, naa ɠa a kɛ, ni tanigaani ta ná, ti la kɛɛzu ti ʋa la GALA daawooi la, naati ti ɠidaaleʋe ga ti-anzaiti siɛ ʋelei maaʋele, kpɔɛzuɠula nɔpɛ ge la ba, 2 ta wo-ziɛ ʋele ɲadegai ɠaana, unfemai zu. 3 Wa-ʋadai un ge mina zei wo-ɓusɛi maaʋɛ nɔ ʋa: unfɛlɛ laalitaaligiti, zanu maaɠili zɔɔlaiti, ta seɠe wola ʋagɔiti. 4 Kɛlɛ wa-ʋadai ɠɛ ga nii dɔɔɠuai wo-yiimaʋɛ, padai é la luulaa, é zɔlɔɔsu ziilɛi zɛnvui zu, gaanɛai, naa ɠa sɔngɔi ɓaɠoai GALA gaazu. 5 Zekana mɔungi anzanu ɲadegaiti ti ɓena ɓɔɠɔ ɓɛtɛ la, tɛiti ti-ɠigi loni GALA ba, ti ɓɔɠɔmaayeini ti-zinigiti bɛ. 6 Eɠɛʋelei Sala ɠɛni la, é ɓɔɠɔmaayeini Abalaame ʋɛ, é ɗa toli ga «màliɠii». Niizu wo ɠɛa ga naa, ná-anzanu lointi, ni wa faa ʋagɔi ɠɛɛzu, wo la ɓɔɠɔ yɛsu ná, wo ʋa ɓɔlɔ ga maalua vaa nɔpɛ.

7 Anzazinigiti, wa ɓalaagi, à eteai ziɛ ʋɔɔma, wa wo-anzaiti, wo ɠizɛ ta-zɛbɛsulala vai zu. À unfe ti ma, tɔɔzei wa tiyani wa zɛnvui ma ʋoganii zeɠezu ʋɔɔma, nii GALA ge feezu ná-zaalai zu, naa ɠa a kɛ faa tanɔpɛ ge mina wa-ƓALA falii zuɠoloɠolo.

Kidaaleʋe nui ziɛ ʋelei

8 Gaaɓelagi ɠa ga: Kisiɛ ɠilagi ɠɛ wo pɛ wo-yiimaʋɛ, ta wo ɗa yeezei ɓɔɠɔ wu wa-ɓalaiti su. Wo-yiimaʋɛ laave ga ɠɛɛɠɛloun nɛɛbɛi, ta maawɔinɠai, ta ɓɔɠɔmaayeii. 9 À mina faa ɲɔi zala ga faa ɲɔi, ɓaa poomugi ga poomugi. Kɛlɛ tɔun, à tuya loo, mazɔlɔɔ naa ɠa wo loligai ma, naa ɠa a kɛ, wo tuyai zɔlɔɔ, nii GALA ge makɛgai wo ʋɛ. 10 Mazɔlɔɔ

«Zɔi é wɔinni ga zɛnvui,

é undaanɛ voloiti sɔlɔɔ,

é nɛgi makɛ, é mina faa ɲɔu ɠɛ,

dakɔlɔgiti ti mina yaava ɓɔɛ wo.

11 É ʋoluave faa ɲɔi ʋa, é faa ʋagɔi ɠɛ,

é ziilɛigi ɠaiziɛ, é ʋilɛ polu.

12 Mazɔlɔɔ Maliɠii ɠaazuʋɛ ɠa telebo nuiti ba,

goilogɛ ta-ƓALA fali wooiti ma.

Kɛlɛ toɠa ɗa ɠaazuʋɛ lati naati daalɔɠɔma, niiti ti faa ɲɔi ɠɛɛzu.»[a]

13 Ɓɛ ɠa a faa ɲɔu ɠɛ ga woye, ni wa zɛbɛzeɠezu faa ʋagɔ ɠɛɛ vai zu? 14 Kɛlɛ tɔun, ni wa kpɔlɔi zɔlɔɔsu tɔɔzei wa telebo fai ɠɛɛzu, undaanɛ nu ɠa ga woye! À mina dua nɔpɛ bo nuiti ba naazu, wo-yii mina ɓɔlɔ pa. 15 Kɛlɛ tɔun, à Kilista lɛbi wo-yiimaʋɛ, tɔ ɠa é ga wo-Maliɠii. Wo ɠɛʋele ɓɛtɛai ɠɛ de yeenɔpɛ, wo naati pɛ gooɠaaʋote, zɔiti ti wo ɠaazaɠasu wa-ɠitogi ma ungi ma. 16 Kɛlɛ à naa ɠɛ ga sɛsɛbogi ta unfemai. Wa-ɠisiɛi ɲade, naa ɠa a kɛ siɛgi zu ti wo ʋeelalazu la, zɔiti ti woo ɲɔi wosu wo-ziɛ ʋele ʋagɔi laalɔɠɔma, nii soloogai Kilista nɔnɔiti ma, ti unfe ga ti-laawooiti. 17 Fizɔgɛ nu maanɔɠɔ faa ʋagɔi ɠɛɛ vai zu, ni naa ɠa é ga GALA ziimai, kɛlɛ è maa mina nɔɠɔ faa ɲɔi ɠɛɛ vai zu.

18 Tama, Kilista ɓɔɠɔi zaani nuɓusɛiti ta-ɠotoiti faa zu, ná ɠɛ ɠila kpe nɔ, tɔungi é ga telebo nui, é naa ɠɛ telebotala nuiti ta-vaa zu, naa ɠa a kɛ é ʋa ga woye GALA pɔ. Kpusɛi zaani, kɛlɛ é zɛnvui zɔlɔɔni ʋolu, é vulu su, Zɛnvu Ɲadegai zaɓui zu. 19 Naama Yɛnvui zɛbɛi zu, é liini é GALA daawooi laazeeli zɛnvuiti ma, niiti ti ɠɛni kasoi ɠa, 20 naati ti-yɛnvuiti ma, niiti ti kololalai ɠɛɛni wɔlɔwɔlɔi zu ga GALA. Naama voloiti su ɠa GALA ge ɠɛni maaɓɔungi wosu da ga ziilɔɔi, siɛgi zu Nowe ɠɛni keingi ɓɛtɛzu la. Nuiti ti la ɠɛni mɔinni, ti ɠɛni lɔsaʋa nɔ, niiti ti lɛɛni ɓatoi naa zu, GALA ti ɠizoni ga ziɛi maaʋele. 21 Ziɛi naa ɠa ga ɓatizei ma ʋoogi, é wo ɠizosu niizu. Tɔ laade é ʋa ɠɛ kpusɛi ná-kɔzɔba vaiti gbazu, kɛlɛ GALA fali wooi ʋe, daazeelizu GALA ma ga kisiɛ ʋagɔi. Toɠa wo ɠizosu ga Yesu Kilista wuzeɠe vai zu, é ɠula saai ya, 22 nii diai geeɠɔlɔgi zu, é zeini GALA zeezazuʋɛ, ʋɛ é masadai ɠɛɛzu ná geezuɠeelaiti ta zɛnvuiti unda niiti zobogiti ti ti ya, naa ʋɛɛ zɛbɛiti ba.

<- 1 Piyɛlɛ 2 1 Piyɛlɛ 4 ->