1 Davide kaai ma ga toɠa na ʋa zaazu, é valini ná-doun zunui Salomɔn ma ga niima wooiti: 2 «Nɔ̀un nà ga li ʋɛ ná ga fulu nui pɛ gaaɓelazuʋɛ. Zɛbɛzeɠe, é ɠɛ ga zunu! 3 Ɠolo ɗa-ƓALAGI Ɠɔoɠɔ GALAGI ʋɛ, è ɗa ziima vai nɔ ɠɛ, è ɠolo ná-deveiti ta ná-tɔgiti bɛ, ta ná-kala gooiti, eɠɛʋelei é sɛʋɛai la Moize ná-tɔgi zu, naa ɠa a kɛ è ɓɔɠɔ zɔlɔɔ naa pɛ su, nii ɗa yeeʋuu bu, 4 nii a kɛ ɓalaa Ɠɔoɠɔ GALAGI minazeɠegi naa laazeeli, nii é kɛɛni bɛ̀, siɛgi zu é ɠɛni la mà: ‹Ni è-mavofodaiti ta zìima vai ɠɛna wooɠɛɠiladai zu, ga ti-yii pɛ ta ti-yɛnvui pɛ, nu ɠa zɔlɔɔ nɔ ɠɔ ti zaama, nii a ɠɛ zeizu Izilayɛle masa kpɔkpɔgi ɠa.›

5 «Naa ʋoluma, è kwɛni nii kpein Seluya ná-doun zunui Zoaɓe kɛɛni ga ze, nii é kɛɛni ga Izilayɛle ɠɔɔʋɛbɛi ma lotuɠɔ felegɔiti Nɛɛl ná-doun zunui Aɓenɛɛl, ta Yetɛɛl ná-doun zunui Amasa. É ti ʋaani ziilɛigi ma ziɛgi zu, eɠɛʋelei a la kɛɛ la kɔɔɠɔ ziɛgi zu, naati ma ɲamai ma ɠasɔi ɠa tɔun unma. 6 Ɠɛ ga ɠima nu tetemazu, mina zɛ ná, é ʋa za gaanɛ zu pɔlɔzaɠagi ya.

7 «Mina yeema è Galaade nui Ɓaalazilayi ná-doun zunuiti so ga pagɔ, ti ɠɛ naati saama, niiti è ti ɠɔnɔkulazu, mazɔlɔɔ ʋele ɠana ti dàaɠomini la, kɛ̀ai ma ʋelazu è-liɛ Aɓasalɔme ʋa.

8 «Mina yeema ga Simeyi ɠa è ɠoba, Ɓɛnzamɛn nui, Gela ná-doun zunui, nii é ɠɛni zeini Ɓaɠulime, é pòomuni, é kòto ga ɲɔuɗa, voloi gè ɠɛni liizu la Maɠanayime. Kɛlɛ gàlesuʋɛ ma, é ʋaani, é dàaɠomi Zuludɛn laaʋɛ, gè ɠonani bɛ Ɠɔoɠɔ GALAGI laaseigi zu, gè ɠɛ ma: ‹Gè la è ʋaa ga boɠa zɔkpɔi pɛ.› 9 Niizu mina so ga sɔbalala nu, ɗa ga ɠima nu, è kwɛni ʋelei ɗa so da, anɛɛ ni pɔlɔzaɠagɛ na, kɛni è kɛ ʋele-o-ʋele ti paa.»

13 Ɠagite ná-doun zunui Adoniya liini Salomɔn dee Ɓate-Seɓa ʋɔ bɛ. Naa gaazaɠani, é ɠɛ ma: «Ɗa ʋaazu nɛi ga kisiɛ ʋagɔa?» Adoniya ɠɛ ma: «Ungo. 14 Nà pɔ gè ɓɔɛ è ʋɔ.» Naa ɠɛ ma: «Ɓɔɛna, ɓɛgele ʋe?» 15 Adoniya ɠɛ ma: «È kwɛni ga masadai ɠɛa ga nɔ̀nɔ, ta Izilayɛle nuiti pɛ gaazu ɠɛa bà ga ti kɛ̀ ga masagi, kɛlɛ masadai latiga dèɠei ma, mazɔlɔɔ Ɠɔoɠɔ GALAGI ɠa é seiɗa tuɠɔ. 16 Faa ɠila kpe nɔ ɠa gè falizu è ma, mina ɠɛlɛ gòoi ʋa.» Ɓate-Seɓa ɠɛ ma: «Ɓɔɛna!» 17 É kpɔɛi zeɠeni, é ɠɛ ma: «Nà è maanɛɛnɛzu, bo masagi Salomɔn ma, é Sunɛme nui Aɓisage ve zèa, é ɠɛ ga ànzai. Mazɔlɔɔ nii nɔpɛ ɗa fali ma, é la ɠɛlɛa è-woo ʋa.» 18 Ɓate-Seɓa ɠɛni ma: «Naa ʋagɛ. Nà ɓɔɠɔi nà ɓɔɛzu pɔ é ʋilɛ è ʋa.»

19 Ɓate-Seɓa liini masagi Salomɔn ʋɔ bɛ ga é Adoniya ná-faa wo ma. Masagi wuzeɠeni, é li daaɠomisu, é laani tɔun kɔɠɔwu, é zei ná-masa kpɔkpɔgi ɠa, é masa kpɔkpɔgi taɠili pilɛ, dee zei ga zeezazuʋɛ. 20 É ɠɛni ma: «Gaazaɠa ko ɠila nɔ ɠa gè bosu ga ɗe, mina ɠɛlɛ bà.» Masagi ɠɛni ma: «Ɓɛgele ɠa è pɔ, dèe, gè la ɠɛlɛa.» 21 Ɓate-Seɓa ɠɛ ma: «Ɓɛ Sunɛme nui Aɓisage ve è-ɠɛɛloin Adoniya ʋɛ é ɠɛ ga anzai.» 22 Masagi Salomɔn dee wooɠaaʋoteni, é ɠɛ ma: «Lee vaa zu è Sunɛme nui Aɓisage maavalizu Adoniya ʋɛ? Masadai pɛ maavali bɛ mu, tɛi tɔ ɠa é ga dìɛi, maavali tɔun bɛ, ta zalaɠa ɠula nui Aɓiataal ʋɛ, naa ʋɛɛ Seluya ná-doun zunui Zoaɓe ʋa!»

23 Masagi Salomɔn ɠonani naazu Ɠɔoɠɔ GALAGI ma, é ɠɛ ma: «GALA ge sò ná-ziiɠaawanai pɛ su, ni gè la Adoniya ʋaani, tɔɔzei nuu ʋa é maaɠaazaɠabogai. 24 Gè ɠonaa Ɠɔoɠɔ GALAGI ma, nii é vulua, tɛi é sèiɗai kpaan kɛ̀ɛ Davide ná-masa kpɔkpɔgi ɠa, ta é minazeɠeai bɛ̀ ga masadai nà-o, màvofodaiti-yo, ga za nɔ ta Adoniya ʋa.» 25 Masagi Salomɔn Yeɠoyada ná-doun zunui Ɓenaya leʋeni, é paa, ʋele ɠana Adoniya zaani la.

26 Masagi Salomɔn ɠɛni zalaɠa ɠula nui Aɓiataal ma: «Ɠale ma, è li è-ɠɔligiti saama ɗa-laazu Anatɔte, mazɔlɔɔ saai zoloogɛ è ma. Kɛlɛ gè la è ʋaazu za, mazɔlɔɔ è ɠɛni Maliɠii Ɠɔoɠɔ GALAGI ná-minazeɠe kesui zeɠezu kɛ̀ɛ Davide ʋɛ, ta è ɗɔnɔ zɔlɔɔni ná-ziiɓɔlɔi pɛ su.» 27 Ʋele ɠana Salomɔn Aɓiataal ɓɛɛni la, é kula Ɠɔoɠɔ GALAGI ná-zalaɠa ɠula vai zu, nii a kɛ Ɠɔoɠɔ GALAGI laawooi laazeeli, nii é boni Eli ná-pɛlɛyeɠei ma Silo.[a]

28 Naama wooi zeelini Zoaɓe ma. Zoaɓe ma ge ʋilɛni Adoniya ʋolu, anɛɛ ni é la ɠɛni ʋilɛni Aɓasalɔme ʋolu, naa ɠa é kɛɛni Zoaɓe liini, é lɔɔɠu Ɠɔoɠɔ GALAGI ná-seɠe ʋɛlɛi wu, é li, é zalaɠa ɠulazuʋɛ ma minɛiti so. 29 Ti liini, ti ɠɛ masagi Salomɔn ma: «Zoaɓe lɔɔɠuʋɛ Ɠɔoɠɔ GALAGI ná-seɠe ʋɛlɛi wu, toɠa zalaɠa ɠulazuʋɛ ɠobaʋɛ.» Salomɔn Yeɠoyada ná-doun zunui Ɓenaya leʋeni naazu, é ɠɛ ma: «Li, è paa.» 30 Ɓenaya zeeliai ma Ɠɔoɠɔ GALAGI ná-seɠe ʋɛlɛi ma, é ɠɛni Zoaɓe ma: «Masagi ɠɛ, è ɠula.» Kɛlɛ é gooɠaaʋoteni, é ɠɛ ma: «Ɓa-o! Ʋɛ ɠa gè zaazu ná!»

Ɓenaya ɠaleni ma masagi ʋɔ bɛ, é Zoaɓe ná-gooɠaaʋotegi wo ma. 31 Masagi ɠɛni ma: «Li, è kɛ eɠɛʋelei é bogai la, paa, naa ʋoluma ɗa maaɠulu, è faa zeɠe gi unma gá nà-pɛlɛyeɠei, ɲamai naa vaa zu Zoaɓe puai fuun. 32 Ɲamaiti é ti ʋuai, Ɠɔoɠɔ GALAGI ɠa naati da tɔ ɓɔɠɔ unma, tɔɔzei é zunu felegɔ ʋaani, Nɛɛl ná-doun zunui Aɓenɛɛl, nii é ɠɛni ga Izilayɛle ɠɔɔʋɛbɛi ma lotuɠɔi, ta Yetɛɛl ná-doun zunui Amasa, Zuda ɠɔɔʋɛbɛi ma lotuɠɔi, niiti ti lelebogai, ti vizɔgai é leʋe tɔun ba, é ti ʋaa ga boɠa zɔkpɔi, kɛ̀ɛ Davide ɠwɛɛ faa la ɠɛni su. 33 Ti-ma ɲamai ɠa la Zoaɓe ta mavofodaiti unma eyɛsu ɠɔ. Kɛlɛ Ɠɔoɠɔ GALAGI ná-ziilɛigi ɠa ɠɛ Davide ta mavofodaiti bɛ, ná-pɛlɛyeɠei ta ná-masa kpɔkpɔgi ʋɛ eyɛsu ɠɔ.»

34 Yeɠoyada ná-doun zunui Ɓenaya liini, é Zoaɓe ʋaa. Ti maaɠuluni ná-zooi ma teʋebai zu. 35 Masagi Yeɠoyada ná-doun zunui Ɓenaya ʋilɛni potogi zu kɔɔʋɛbɛi unda, é zalaɠa ɠula nui Sadɔke ʋilɛ Aɓiataal ʋotogi zu.

36 Masagi keela leʋeni Simeyi ma, ti toli é ʋa, masagi ɠɛ ma: «Pɛlɛ lo ɓɔɠɔ ʋɛ Zeluzalɛme, ná ɠa è ɠɛɛzu ná, è mina ɠula, è ʋa ziɛziɛ. 37 Kwɛɛ ga voloi è ɠulazu la taai ʋa, è Sedelɔn ʋɛtugi maaleʋe, ɗa za, è-ma ɲamai ɠa la è unma.» 38 Simeyi ɠɛni masagi ma: «Naa ʋagɛ! Nii nɔpɛ è bosu, màliɠii masagi, nɛ̀i gè ga ɗa-wotiɠɛ nui nà kɛ.» Simeyi lɛbini Zeluzalɛme.

39 Kɛlɛ kona saʋagɔ ʋoluma, ná-duɔ felegɔ ʋelani, ti zeɠe pɔ bɛ, ti li Maaka ná-doun zunui Akise ʋɔ bɛ, Gate masagi. Ti ɠɛni Simeyi ma: «Ɗa-luɔiti ta Gate.» 40 Simeyi wuzeɠeni názu, é ɠɛʋele ɓɛtɛ, é lɛ ná-soovalegi ɠɔma, é li Gate, Akise ʋɔ bɛ, é ná-duɔiti seɠe, é ɠale ma ga tiye. 41 Naama wooi zeelini Salomɔn ma ga Simeyi zeɠeʋɛ Zeluzalɛme, é li Gate, é ɠale ma. 42 Masagi Simeyi lolini, é ɠɛ ma: «Gè la ɠɛni ɠɛɛni è ma: ‹Ɠona Ɠɔoɠɔ GALAGI ma ga è la ɠula taai ʋa,› ɓaa, gè ɠɛ è ma: ‹Voloi è ɠulazu la taai ʋa, ɗa za›? È la ɠɛni gòoɠaaʋoteni, è ʋa ɠɛ mà: ‹Naa ʋagɛ, gè mɛniga,› ɓaa? 43 Lee vaa zu mu è konai naa zeɠea ma, nii boga Ɠɔoɠɔ GALAGI ɠaazu, è la ɠoloni devei ʋɛ gè feeni è ya?» 44 Masagi ɠɛni Simeyi ma: «È kwɛni ɗa ɓɔɠɔi, faa ɲɔi nii è kɛa ga gaaɠilima ga kɛ̀ɛ Davide. Ɠɔoɠɔ GALAGI ɠa ɗa-nu ɲɔulai ma ɠasɔi la è unma. 45 Kɛlɛ Ɠɔoɠɔ GALAGI ɠa tuya loo bɛ̀, é Davide ná-masa kpɔkpɔgi zapelɔ eyɛsu ɠɔ.» 46 Masagi devei veeni Yeɠoyada ná-doun zunui Ɓenaya ya, naa ɠula, é Simeyi ʋaa.

Ʋele ɠana masadai zeini la ga pagɔ Salomɔn yeezu.

<- 1 Masagiti 11 Masagiti 3 ->