Hua Uma Carta Hua̠ntu̠ Ca̠tzóknilh
Hebreos
Cumu judíos na̠ tali̠tapa̠cuhui̠y hebreos huatiyá ma̠x hua̠nti̠ ca̠lakmacá̠ncalh eé carta, ma̠squi ni̠ catzi̠cán tícu luu tzokli. Hua̠nti̠ tzokma u̠má carta xcatzi̠ni̠t pi̠ lhu̠hua u̠ma̠ko̠lh hebreos hua̠nti̠ xtali̠pa̠huani̠t Cristo aya xtaakxtekmakamputún xtaca̠najlatcán la̠qui̠ niaj huij nahuán hua̠ntu̠ xpa̠lacata naca̠li̠putzasta̠lacán. Ca̠li̠ma̠kalhchuhui̠ni̠y ca̠ma̠uxca̠ni̠y pi̠ chunatiyá aksti̠tum catali̠pá̠hualh Cristo ma̠squi lhu̠hua hua̠ntu̠ caca̠lakchi tali̠puhuá̠n xa̠hua tapa̠tí̠n chuná cumu lá tati̠pa̠ti̠ni̠t a̠ma̠ko̠lh xalakmaká̠n xli̠talakapasnicán hua̠nti̠ Dios xca̠lacsacni̠t.
Cumu xlacán xtamacpuhuán niaj luu xtaca̠najlay para a̠má Cristo hua̠nti̠ xtali̠pa̠huani̠t xli̠ca̠na xkalhi̠y li̠tlihueke xlacata naca̠makta̠yay nac xtapa̠ti̠ncán, xlá ca̠ma̠lulokniy pi̠ ni̠ chuná qui̠taxtuy, porque a̠má hua̠nti̠ xtali̠pa̠huani̠t a̠tzinú lhu̠hua xkalhi̠y xli̠tlihueke chu lanca xlacatzúcut ni̠ xachuná cumu la̠ hua̠ntu̠ takalhi̠y xli̠hua̠k lactali̠pa̠hu lacchixcuhuí̠n o ángeles.
Ama̠ko̠lh judíos xtakalhi̠y lhu̠hua xamaká̠n xli̠talakapásnicán hua̠nti̠ xli̠ca̠na laclanca y lactali̠pa̠hu lacchixcuhuí̠n xtahuani̠t, pero xlá lacatancs ma̠siyuy pi̠ Cristo a̠tzinú lanca xlacatzúcut y ni̠ti̠ macata̠xtuca nac ca̠quilhtamacú, y na̠ stalanca li̠ma̠siyuy nac xlatama̠tcán profetas, ángeles, nac xlatama̠tcán a̠ma̠ko̠lh xamaká̠n lactali̠pa̠hu lacchixcuhuí̠n cumu la̠ Moisés, Josué, a̠ma̠ko̠lh laclanca xanapuxcún cura hua̠nti̠ xamaká̠n quilhtamacú xtalamá̠nalh y Dios xca̠ma̠xqui̠ni̠t xamaká̠n xtalaca̠xlán, la̠ta pu̠lacatunu hua̠ntu̠ li̠chuhui̠nán u̠má carta stalanca huan pi̠ Cristo a̠tzinú lanca xlacatzúcut ni̠ xachuná la̠ta tícu xtati-latama̠ni̠t, porque xlá xli̠ca̠na pi̠ huá Xkahuasa Dios.
Na̠chuna li̠túm li̠taxtuy xpa̠lacata a̠ma̠ko̠lh takalhí̠n hua̠ntu̠ xtamakni̠y xcurajcán judíos ca̠ta ca̠ta y xli̠lakachixcuhui̠nancán xkalhni nac xlacatí̠n Dios, para xca̠li̠macuaniy cristianos xca̠li̠xacanicán xtala̠kalhi̠ncán u̠má xkalhnicán takalhi̠ní̠n, pus xali̠huacá xkalhni Cristo. Porque acxni̠ Cristo ni̠lh nac cruz niaj xlacasquinca xuani̠t pi̠ ca̠ta ca̠ta nastajmakanicán xkalhni tantum takalhí̠n la̠qui̠ chuná xoko̠nuncani̠t nahuán xtala̠kalhi̠ncán cristianos, porque acxni̠ Cristo maktum tú tamacamá̠sta̠lh la̠qui̠ namakni̠cán, a̠má xkalhni hua̠ntu̠ stajmákalh li̠táxtulh nac xlacatí̠n Dios cumu la̠ aktum li̠lakachixcuhuí̠n hua̠ntu̠ lakáti̠lh Dios.
Na̠chunali̠túm li̠taxtuy xpa̠lacata a̠má tajaxni hua̠ntu̠ judíos xtaputzay nac xlatama̠tcán y ne̠cxni xtamaclay porque ankalhi̠ná akatiyuj xtalay cumu ne̠cxni lay lacatancs xtacatzi̠y para xtala̠kalhi̠ncán xli̠ca̠na xca̠ma̠tzanke̠nanicani̠t. Xma̠n huá Cristo tla̠n nama̠jaxaniy xli̠stacni cha̠tum cristiano hua̠nti̠ akatiyuj li̠lay xtala̠kalhí̠n. Cristo li̠taxtuy a̠má lanca tali̠pa̠hu xapuxcu cura hua̠nti̠ aya tanu̠ni̠tanchá hasta nac akapú̠n la̠qui̠ antá naquinca̠pa̠lacachuhui̠naná̠n nac xlacatí̠n Dios. Caj xpa̠lacata pi̠ “maktum tu̠ tamacamá̠sta̠lh namakni̠cán xlá li̠taxtuy nac xlacatí̠n Dios cumu la̠ aktum li̠lakáti̠t li̠lakachixcuhuí̠n” (9.12, 26). Chuná acxni̠ xlá ni̠lh y Dios li̠lakachixcúhui̠lh xkalhni, caj xma̠n maktum tu̠ quinca̠xacanín quintala̠kalhi̠ncán cane̠cxnicahuá quilhtamacú (10.10).
Umá carta liakasputa antanícu ca̠huaniy xli̠hua̠k a̠ma̠ko̠lh hua̠nti̠ tali̠pa̠huán Cristo pi̠ hua̠ntu̠ aksti̠tum catali̠pá̠hualh xli̠hua̠k xlatama̠tcán, porque Quimpu̠chinacán ankalhi̠ná naca̠pa̠xqui̠y y naca̠makta̠yay, porque xlá “xla̠ta xlama maká̠n quilhtamacú, chuná la̠ ca̠lacchú lama y chunatiyá lámaj nahuán cane̠cxnicahuá quilhtamacú” (13.5-8).

Dios macámilh Xkahuasa la̠qui̠ nama̠catzi̠ni̠nán xtalacapa̠stacni

1 Xamaká̠n hasta la̠ta mini̠tanchá quilhtamacú Dios xca̠macaminti̠lhay xprofetas la̠qui̠ naca̠ma̠catzi̠ni̠y xtalacapa̠stacni quili̠talakapasnicán, y maklhu̠hua chuná ca̠ma̠kalhchuhuí̠ni̠lh. 2 Pero la̠ ca̠lacchú quilhtamacú xlá macamini̠t Xkahuasa la̠qui̠ naquinca̠li̠ma̠kalhchuhui̠ni̠yá̠n xtalacapa̠stacni, xlá maktlahuani̠t xli̠hua̠k hua̠ntu̠ anán, xa̠huachí huá macama̠xqui̠ko̠cani̠t naca̠ma̠peksi̠y xli̠hua̠k hua̠ntu̠ anán nac xli̠ca̠lanca ca̠quilhtamacú. 3 Antá nac xlatáma̠t Cristo ma̠siyuy lácu xkásat Dios xa̠hua lanca xli̠tlihueke, y caj xpa̠lacata xli̠tlihueke xli̠ma̠peksí̠n ca̠li̠ma̠xqui̠y li̠tlihueke la̠qui̠ ni̠ natalaksputa chunacú natalatama̠y xli̠hua̠k hua̠ntu̠ anán. Xlá quinca̠lacxacanikó̠n xli̠hua̠k hua̠ntu̠ xkalhi̠yá̠hu quintala̠kalhi̠ncán, y acali̠stá̠n alh nac akapú̠n y pa̠xtu̠tahuilachá nac xpekstácat xpu̠ma̠peksí̠n Dios.

Xkahuasa Dios a̠tzinú lanca xlacatzúcut ni̠ xachuná ángeles

4 Amá Xkahuasa Dios mákat la̠ta ca̠akapu̠lani̠t ángeles porque a̠má li̠tlihueke hua̠ntu̠ ma̠xquí̠calh a̠tzinú lanca xlacatzúcut ni̠ xachuná hua̠ntu̠ ca̠ma̠xqui̠cani̠t ángeles. 5 Porque la̠ta xli̠hua̠k minko̠ni̠tanchá quilhtamacú Dios ne̠cxnicú huánilh cha̠tum ángel:

Huix Quinkahuasa y aquit mintla̠t,

porque la̠nchú chuná cli̠ma̠xtuyá̠n,

Y ne̠cxnicú chiné li̠chuhuí̠nalh cha̠tum ángel:

Aquit xtla̠t nacuán,

y xlá Quinkahuasa nali̠taxtuy.

6 Pero acxni̠ xlá macámilh xma̠nhuá a̠má cha̠stum xapuxcu xkahuasa chiné huá:

Xli̠hua̠k ángeles hua̠nti̠ tata̠lamá̠nalh Dios nac akapú̠n catalakachixcúhui̠lh.

7 Y xlacatacán ángeles chiné ca̠li̠chuhuí̠nalh Dios:

Dios ca̠li̠ma̠xtuy xángeles cumu la̠ ú̠n,

y xlacscujní̠n ca̠li̠ma̠xtuy cumu la̠ lhcúya̠t.

8 Pero xlá chiné li̠chuhui̠nán Xkahuasa:

Huix lanca tali̠pa̠hu Dios, tamá mili̠ma̠peksí̠n ne̠cxnicú catiláksputli,

porque hua̠ntu̠ aksti̠tum pímpa̠t ma̠peksi̠nana.

9 Cumu huix lakmakani̠ta hua̠ntu̠ li̠xcájnit y ma̠tla̠nti̠ni̠ta nama̠kantaxti̠ya hua̠ntu̠ aksti̠tum,

mintla̠t Dios li̠ma̠xtuni̠tán cumu la̠ xapu̠chiná

hua̠nti̠ a̠tzinú tla̠n y li̠pa̠xúhu nama̠peksi̠nán

ni̠ xachuná xa̠makapitzí̠n hua̠nti̠ na̠ tama̠peksi̠nán.

10 Xa̠huachí nac aktum salmo chiné li̠chuhui̠nancán:

Huix Quimpu̠chinacán, hasta la̠ta xamaká̠n quilhtamacú ma̠lacatzuqui̠ni̠ta xli̠hua̠k ca̠quilhtamacú y la̠ta túcu anán;

y mimacán ma̠n li̠tlahuani̠ta akapú̠n.

11 Xli̠hua̠k u̠má hua̠ntu̠ ma̠lacatzuqui̠ni̠ta namín quilhtamacú hua̠k nalaksputparay,

pero cane̠cxnicahuá quilhtamacú lápa̠t nahuán.

Pu̠tum ámaj laksputa cumu la̠ mactum lháka̠t hua̠ntu̠ lakuán y niaj tla̠n;

12 huix pímpa̠t kapsa xta̠chuná cumu la̠ mactum lháka̠t,

y nalakpali̠ya xta̠chuná cumu la̠ a̠ cali̠talakxtunumpi milháka̠t.

Pero huix chunatiyá lápa̠t nahuán,

porque milatáma̠t ne̠cxnicú laksputa.

13 Xa̠huachí Dios ni̠para maktum xuánilh cha̠tum ángel:

Caquimpa̠xtu̠tahuila uú nac quimpekstácat,

hasta caní nacca̠makatlajako̠y xli̠hua̠k hua̠nti̠ tasi̠tzi̠niyá̠n

la̠qui̠ hua̠k natalakachixcuhui̠yá̠n.

14 Porque xli̠hua̠k a̠ma̠ko̠lh ángeles hua̠nti̠ tascujnimá̠nalh Dios hua̠k caj espíritus y ni̠ tasiyuy, ca̠macamincán uú la̠qui̠ natamaktakalha xli̠hua̠k a̠ma̠ko̠lh hua̠nti̠ Dios ca̠lacsacni̠t naca̠lakma̠xtuniy xli̠stacnicán.

Hebreos 2 ->