HIPRUS 8

Iesu in pris asoli agɨn təuvɨr mapirəkɨs

1 Kitah kəutəghati e nati u,[a] mətəu nəukətɨn tol lanu. Kitah kautos pris asoli agɨn kəti, təhruahru əmə e iətəmi u iəmatəni.[b] In tɨnətəharəg rəkɨs[c] e nɨkalɨn maru rəha Iətəmi asoli əpəha ilɨs e negəu e neai, ikɨn ima rəha nepətiən mɨne nɨsiaiən. 2 In tatol uək əpəha Ikɨn Tasim Ikɨn e negəu e neai, inu Nima Tapolɨn pəhriən[d] iətəm Uhgɨn əmə təmiuvi. Səniəmə iətəmimi iətəm təmiuvi Nima Tapolɨn əha.[e][f]

3 Kəməfəri rəfin pris asoli agɨn mɨn u aupən, məmə okautəfən natimnati mɨn kəm Uhgɨn, kəni mautol sakrifais. E suaru kətiəh əmə, rəhatah u pris asoli agɨn, in mɨn otəkeikei məfən sakrifais kəti kəm Uhgɨn.[g] 4 Nəmə in tətatɨg əha e nəhue nɨftəni u, kəni ko səniəmə in pris kəti, mətəu-inu pris mɨn əpəha ikɨn kəutatɨg nətəm kautəfən natimnati kəm Uhgɨn, təhmen əmə məmə inu Lou təməni mɨne. 5 Pris mɨn u, ilah kautol rəhalah uək e narmɨ nimə əmə iətəm tatɨsɨkəuvɨn[h] natimnati mɨn iətəm tətatɨg e negəu e neai. Tol lanəha nian Uhgɨn təməni=pən kəm Mosɨs aupən, məmə otem Nima Tapolɨn Asim, in təməni məmə,

“Onəkəkeikei mateh vivi məmə onəkol natimnati mɨn u təhruahru təhmen əmə e rəhak mak iətəm iəmol mətəgətun rəkɨs ik lan əpəha ilɨs e nɨtəuət asoli.”[i]

6 Mətəu rəueiu, Iesu, pris asoli agɨn u rəhatah, in tɨnos rəhan uək iətəm təuvɨr pɨk agɨn mapirəkɨs uək rəha pris mɨn aupən. Kəni e noliən kətiəh əmə, Iesu in suaru rəha nəniəskasɨkiən vi rəha nasiruiən u iətəm in təuvɨr mapirəkɨs nəniəskasɨkiən əuas rəha nasiruiən, mətəu-inu nəniəskasɨkiən vi u, in tətəhtul-pəri e nəghatiən mɨn iətəm kotəuvɨr motapirəkɨs.[j]

7 Nəmə nəniəskasɨkiən əuas təməhmen pəhriən agɨn, kəni Uhgɨn təməsəniən məmə nəniəskasɨkiən vi otuva mos nɨmein. Mətəu nəniəskasɨkiən u əuas təsəhmeniən,[k] tol lan əha, nəniəskasɨkiən vi təkeikei muva. 8 Mətəu Uhgɨn təmeruh nərahiən rəha nətəmimi, kəni məni məmə,

“Nian əha ikɨn otəpanuva,

iətəm iəu, oiəkol nəniəskasɨkiən vi rəha nasiruiən rəha nəuanɨləuɨs mɨn rəha Isrel mɨne nəuanɨləuɨs mɨn rəha Juta.

9 Nəniəskasɨkiən rəha nasiruiən u,

in otol pɨsɨn agɨn e nəniəskasɨkiən əuas rəha nasiruiən,

iətəm iəu iəmol kəm tɨpɨlah mɨn aupən,

e nian u iətəm iəu iəmos nəhlmɨlah matit ilah mohiet rəkɨs Ijɨp.

Oiəkol nəniəskasɨkiən vi rəha nasiruiən,

mətəu-inu ilah kəməsotaskəlɨmiən nəniəskasɨkiən u iətəm iəu iəmol kəm lah aupən,

kəni tol məmə iəu iəməpəh ilah məuhlin=pən nəmtahk kəm lah.[l]

10 Kəni iəu, Iərmənɨg, iətəni pətɨgəm məmə,

e nian iətəm otəpanuva,

iəu oiəkol nəniəskasɨkiən vi kəti rəha nasiruiən[m] kəm nəuanɨləuɨs mɨn rəha Isrel.

Oiəkəfən rəhak lou mɨn e rəhalah nətəlɨgiən,

kəni iəkətei rəkɨs=pən e nɨkilah,[n]

kəni iəu iəkuva mol Uhgɨn əhruahru rəhalah,

kəni ilah okəhuva motol rəhak əhruahru nətəmimi.[o]

11 Ilah kəti ko təsuvəniən məgətun nətəm iman ikɨn məmə,

‘Ik onəkəkeikei məhrun Iərmənɨg u.’

Kəni iətəmimi kəti ko təsuvəniən məni=pən nəghatiən u kəm pian,

mətəu-inu ilah rəfin okotəhrun iəu,[p]

tətuəuin e nətəmi əpnapɨn mɨn

muvən mətəuarus=pən nətəm kautos nərgɨn asoli mɨn.

12 Mətəu-inko, iəu, oiəkasəkəhruin ilah o rəhalah noliən mɨn iətəm təsəhruahru agɨniən.

Iəu oiəkafəl rəkɨs noliən tərah mɨn rəhalah,

kəni iəu oiəkalu e noliən tərah mɨn rəhalah.”[q][r]

13 Nian Uhgɨn tətəghati e nəniəskasɨkiən rəha nasiruiən u, məmə in nəniəskasɨkiən vi, in tətəni məmə tateruh nəniəskasɨkiən rəha nasiruiən aupən, tɨnəuas rəkɨs, məmə ko təsoliən mɨn nati kəti əha rəueiu. Kəni nati u tɨnəuas u ko təsol mɨniən nati kəti, otəsuvəhiən təsatɨg mɨniən.

<- HIPRUS 7 HIPRUS 9 ->