2 Jon
Nauəuə iətəm tatol keiu lan iətəm Jon təmətei
Nəghatiən əkuəkɨr rəha nauəuə u 2 Jon
?Pəh təmətei nauəuə u? Aposɨl Jon təmətei nauəuə u.
?Təmətei tatuvən kəm pəh? Təmətei tatuvən kəm pətan kəti rəha niməfaki. Mətəu nəmə təhro nəghatiən u “pətan,” nɨpətɨn təni məmə niməfaki kəti. Kəni “nenətɨn mɨn,” ilah nətəmimi rəha niməfaki. Jon təmətei nəghatiən mɨn əha, təhmen e nəghatiən kəti tətəhluaig. Təsolkeikeiən məmə otəni pətɨgəm nərgɨn mətəu-inu, kol məta nətəmimi nəuvein kotol noliən tərah e lah.
?Natɨgiən təhro lanu nian təmətei? E nian əha, nəgətun mɨn tepət kəutaliuək e ikɨn pɨsɨn pɨsɨn mɨn. Nətəmimi nətəm kəmotətəu nəghatiən rəhalah kɨnotəfən nauəniən kəm lah. Kəni motəfən ikɨn mɨn rəha napɨliən, kəni məutasiru e lah. Mətəu nəgətun eiuə mɨn kautəhuvən əpnapɨn mɨn o niuvi rəkɨsiən nətəmimi rəha niməfaki məmə okotəpəh nəghatiən pəhriən.
?Təmətei nauəuə u o nak? Nian nəgətun eiuə mɨn kəutəhuva, Jon təni məmə nətəmimi nətəm kəutəhatətə e nəghatiən pəhriən rəha Uhgɨn, okotəkeikei motahtɨpəsɨg e nəgətun eiuə mɨn əha, kəni motəpəh noliən mɨne nəgətuniən rəhalah, kəni məsotasiruiən e lah. Mətəu Jon tolkeikei məmə nətəmimi rəha niməfaki okotəkeikei motolkeikei nətəmimi pəhriən rəha niməfaki. Inu nəlpəkauiən rəha Uhgɨn.

Nətuəuiniən

1 Nauəuə u rəha eldə tatuvən kəm pətan Uhgɨn təmɨtəpɨn[a] mɨne nenətɨn mɨn. Nɨpəhriəniən məmə iəkolkeikei pɨk itəmah. Mətəu səniəmə iəu pɨsɨn əmə iəkolkeikei itəmah, mətəu nətəmimi mɨn rəfin u nətəm kotəhrun mɨn nɨpəhriəniən,[b] kotolkeikei itəmah. 2 Kəni iəkotolkeikei itəmah, mətəu-inu o nɨpəhriəniən iətəm tətatɨg e nɨkitah[c] kəni otatɨg itulɨn e nɨkitah.

3 Pəh Tatə Uhgɨn mɨne Nətɨn Iesu Krɨsto okuəfɨnə rəhalau nəuvɨriən, mɨne nasəkəhruiniən, mɨne nəməlinuiən kəm tah nətəm kotohtəu=pən suaru rəha nɨpəhriəniən mɨne nolkeikeiən.

Kitah okotohtəupən nəghatiən pəhriən mɨn

4 Nɨkik təmagiən asoli nian iəmeruh nenətɨm mɨn nəuvein, kəni meruh məmə kəutaliuək e suaru rəha nɨpəhriəniən,[d] təhmen əmə məmə inu, Tatə Uhgɨn təməni kəm tah məmə kotəkeikei motol. 5 Kəni rəueiu əha, nəuvɨnɨk, iəu iəsəteiən nəghatiən vi kəti kəm təmah, mətəu in əmə u kɨnotətəu rəkɨs e nətuəuiniən.[e] Kəni iəkətapuəh məmə okotol əmə nolkeikeiən kəm tah mɨn. 6 Kəni nolkeikeiən u, nɨpətɨn u noliən nəuia Uhgɨn. Kəni in tətəni məmə kitah okotəkeikei motohtəu=pən suaru rəha nolkeikeiən, təhmen əmə məmə inu nəmotətəu e nətuəuiniən.

7 Mətəu-inu nəgətun eiuə mɨn tepət kəutan e nəhue nɨftəni.[f] Ilah kəsotəhatətəiən məmə Iesu in Krɨsto iətəm Uhgɨn təməni məmə otahli=pa,[g] in təmuva iətəmimi pəhriən, e nɨpətɨn pəhriən.[h][i] Iətəmimi tol lanəha in ieiuə kəni in tɨkɨmɨr rəha Krɨsto.[j] 8 Tol lanəha, autətəu itəmah məmə nəsotəmkarəpəniən e nəua uək asoli rəhatah, pəh itəmah onəkotos nətəouiən rəfin lan.[k] 9 Nəmə iətəmi tətətu=pən aru əmə nəgətuniən kəti rəhan e nəgətuniən rəha Krɨsto, kəni məsəkeikeiən e nəgətuniən rəha Krɨsto,[l] noliən rəhan tətəgətun məmə Uhgɨn təsatɨgiən e nɨkin. Mətəu iətəmimi pəh iətəm tətatɨg əskasɨk e nəgətuniən rəha Krɨsto, in tatos Tatə Uhgɨn mɨne Nətɨn ilau pəti e nɨkin.[m] 10 Nəmə iətəmi kəti tuva ohnik, kəni məsəniən nəgətuniən əhruahru rəha Krɨsto, nəsitiən in muvən imam ikɨn, məsəniən “təuvɨr” kəm in.[n] 11 Mətəu-inu iətəmi tətəni “təuvɨr” kəm in, tətasiru lan matol suaru o rəhan nəgətuniən tərah.[o]

Naunun nəghatiən

12 Iatos nəghatiən tepət məmə iəkətei kəm təmah, mətəu iəsolkeikeiən məmə iəkətei e nɨma nauəuə mɨne pen. Mətəu nɨkik tətəhti pɨk məmə iəkuva meruh itəmah kəni məghati əhruahru kəm təmah e nəhmtɨtəmah, pəh nagiəniən rəhatah otəriauəh.[p]

13 Nenətɨ piam[q] nətəm Uhgɨn təmɨtəpɨn, ilah kəutəni təuvɨr kəm ik.